1Cyak'e'u' chik'ajsbilu' tetz Ryos, cyakil yi e'u' yi e'u' balaj. Na chumbalaj nin na ban swutz Ryos, yi na cyak' yi e' balaj chik'ajsbil tetz.
2Katyoẍink bin tetz Kataj. Ba'n kak' len kak'ajsbil tetz i' tan e'chk jilwutz ma'cl chi tane'n arpa tu salterio.
3Kabitzij jun ac'aj bitz swutz i'. Nin xconken e'chk ma'cl. Poro na taj yi sk'il cu'n sban e'chk kulil.
4Yi yol Kataj bintzi nin tetz. Nin yi na kil e'chk takle'n balaj yi bnixnak ta'n, ba'n tzun k'uke' kac'u'l te'j.
5Wi'nin na pek' i' scye'j yi e' tz'aknak cu'n, nin yi e' yi jicyuch te cyajtza'kl. Nin yi banl talma' i', at nintz bene'n tzi'n.
6Cyakil yi tcya'j tu cyakil yi at tul, i' bnol tetz. Ntin ncawun i', nin ja bnix.
7Ja xcye' i' tan jutz'e'n, nin tan colche'n cyakil yi a' yi at xe mar.
8Kak'e' bin k'ej i' cyakil o' yi o' wunak. Qui'c na ban alchok ato't bene'n tzi'n wi munt.
9Na ja tal Kataj: “Na waj bnix e'chk takle'n.” Nin ja bnix. Ja cawun, nin ja chibixe' quen cyakil e'chk takle'n yi at jalu'.
10Qui na tak' Kataj ama'l scyetz yi e' mal wunak tan bixewe'n yi cyetz cyajbil.
11Poro cyakil yi e'chk takle'n yi na xtxum Kataj, cya'l jun na xcye' tan xite'n.
12Ba'n teri yi ketz kanación na yi Kataj i' yi kaRyosil. Na i' nko' txa'one'n tan koque'n tetz tanum i'.
13Na che' til Kataj cyakil yi e' wunak yi ate' bene'n tzi'n wi munt.
14Cho'n at i' jalen tzi'n tcya'j, poro na ko' til na' ato' quent lakak e'chk ama'l. Na na til i' na' najlche't cyakil wunak.
15Na i' mbnon cyakil chiwankil, nin i' na i'lon cyakil yi na chitzan tan banle'n.
16Quil clax jun ajcaw, yi ko cho'n tu' k'uklij c'u'l te jun c'oloj sanlar. Nin quil clax jun yaj tan yi tetz ẍchamil.
17Nin quil xcye' jun chej tan colche'n jun yaj, mpe chin cham nink yi chej.
18Poro yi Kataj, na che' q'uicy'lej yi e' yi na cyak' k'ej i', nin yi e' yi cho'n k'uklij chic'u'l te yi tetz balajil.
19Na na chiclax ta'n tk'ab quimichil. Nin na che' ẍch'eyaj tc'u'l yi tiemp yi na ul we'j ẍchiwutz.
20Yi o' ketz, cho'n k'uklij kac'u'l te Kataj, na tz'ocopon i' tan kacolche'n nin tan kuch'eye'n.
21Yi o' ketz na katzatzin te'j. Nin cho'n k'uklij kac'u'l te'j, na chin xan nin yi tetz bi'.
22Kataj lok ltak'u' yi xtxaxl talma'u' sketz, na ntin at kach'iw te'ju'.
