1(David ko wur) Ani Yawe ko nup patawurikko; angamang motam lilim te noko nup laili mu patawurikko.
2Ani Yawe ko nup patawurikko; noko munan ago ko beteram mu me ta ko angamili saparukko.
3Nu aninga memek suen la kututuwuso, ale aga kuera ikes menawuso.
4Nu kuera mutim ningi aga bataguru taso ale gomang aisu se kua aisu lagoso.
5Nu munan ningo ningo angimik te beteso se ani taraga iwita kulak sokel ago la bagasam.
6Yawe ko munan ningo diram mu te, kariimet nunga bita maguwusan mu nunga sangarso.
7Nu ko munan, ko ikia mu Moses kausam, ale kilek bibiya Israel te nunga sangukko mu beteram se ari gilingiman.
8Yawe ko gomang bataga se ko gomang lila mu biya, se nu gomang tairate me magoso, se ninguru nanga kueso.
9Nu ana ining me nangaru lagoso, ale ko gomang magara me ilu lagoso.
10Ana nanga memek koma memek tanakko, bare nu memek me nangarso; ana memek suen biya mu ko koma, memek biya tanakko, bare uwuta me beteso, mena.
11Taiti kalel biya ali kiaram iwita, noko kua nangara ana kariimet nu bowa ningi bagasan mu nanga iramuram.
12Koma worem bausa se worem kapara mu awar bibiya iwita, nu nanga memek mu siwu waram se awar bibiya namaram.
13Se kari bo ko kuriang gomang nungarso iwitatala, Yawe ana kariimet nu bowa ningi bagasan mu gomang nangarso.
14Mu awuk, nu aguwaya anananga nungam mu ko ikiso, ale nu ko ikiso mu ana ali te nanga nungam.
15Sirsir tom tukunangta baga marakaso iwita, ana kariimet nanga marak bagara ko tom mu uwutata. Ana diri wakala tom tukunangta baga,
16marir nanga ituguso se piri palaga namasan se udagi me nangarkasan iwita.
17Bare kariimet Yawe bowa ningi bagasan, mu nu pempem nunga kua lagoso; ale ko ningo nuam mu nunga kuriang imas mu karogo la nongote beteso.
18Awiriya noko den kaolam mu ko sinar taso ale ko kuring karo tuso, mu nu uwutata nunga beteso.
19Yawe duruk wonong te baga se mel singir la nu la bitarso.
20Nina Yawe ko engel sokel ago, nu kuring bowa ningi baga se noko den karo tusan, mu noko nup patawuralko.
21Nina suen la nu ilak baga se kuring karo se ura betesan, mu noko nup patawuralko.
22Nina melmasak suen la nu nungam se noko bitua bowa ningi bagasan, mu noko nup patawuralko. Se ani mu betela ko nup patawurikko.
