1Ba'n cyeri yi e' yi ja cuy Ryos cyakil chipaj chitx'ok'be'n. Ba'n cyeri yi e' yi ja wi't stzajsaj Ryos quil.
2Ba'n cyeri yi e' yi nk'e'tz txumijt nin cya'n tan banle'n e'chk takle'n cachi', na qui'c cyetz quila'tz swutz Ryos.
3Poro tan paj yi quinin mintxol wil tetz Ryos, jalt nin bis wa'n cyakil k'ej. Nin chebele'n cuntu' ja chinyabtij.
4Ncha'tz ja chinnachon te'j yi inchuc atin cyakil k'ej, na qui'ct Ryos xomij swe'j. Na ja chinlo'on, chi na ban jun wi' xtze' le tiemp cresum, yi ẍchuc na cu' mol.
5Cha'stzun te tetz cu'n walma' mintxol cyakil yi impaj intx'ok'be'n teru'. Ja bixe' wa'n tan intxolil cyakil yi wil teru'. Nin ja cuyu' impaj.
6Cha'stzun te ba'n yi nink cho'c cyakil yi e' yi cho'n k'uklij chic'u'l te'ju', tan na'wse'n bi'u' yi na ul sotzaj c'u'lal ẍchiwutz. Nin ko ya'tz chiban, pe nink tz'ul jun c'oloj sotzaj c'u'lal ẍchiwutz, quil chilo'on ta'n.
7Wajcaw, ilu' colol wetz. Wi'nin na chintzatzin, na na ocu' tan incolche'n. Nin yi na ul e'chk takle'n tzinwutz, na chinclax tanu'.
8Na je bin yolu'e'j Ta': “Xomchin tzawe'j tan tak'le'n awajtza'kl, nin tan achusle'n. List in tan ẍchajle'n yi balaj be' tzatz.
9Poro ploj yi awajtza'kl, yi ko ni'cu'n tu tetz jun chej nka jun buru' yi qui na pujx ta'n yi mbi tajwe'n tan bnol. Na jun chej nka jun buru' tajwe'n jun prenu' le stzi' tan talche'n tetz yi na'l bene't,” chiju' bantz Ta'.
10Na ilenin tz'ul chicaws cyakil yi e' mal nak tanu'. Nin ẍchitije' wi'nin q'uixc'uj. Poro yi e' yi cho'n k'uklij chic'u'l te'ju', at yi banlu' squibaj.
11Kak'e' bin kak'ajsbil tetz Kataj, cyakil yi o' yi cho'n k'uklij kac'u'l te'j. Ba'n yi ko nim kawi' yil ko'c tan tak'le'n kak'ajsbil tetz i'.
