1Wajcaw, ilenin swale' tc'u'l yi imbitz yi chumbalaj nin ilu'. Ilenin tzimbitzij yi ba'n k'uke' kac'u'l te'ju'.
2Tzintxole' yi quinin bajsbe'n tetz yi banl talma'u', nin yi qui na xtx'ixpuju' yi yolu', chi tane'n yi tcya'j, yi qui na xtx'ixpuj tib.
3Bnixnak jun trat tanu' tu Luwiy yi ẍchakumu' yi je'nak xtxa'olu'. Na je bin suku'e'j:
4“Ilenin swak'e' ama'l scyetz yi e' axonl tan chicawune'n tetz axel yil cẍquim.”
5Wajcaw, cyakil yi e' yi ate' tcya'j na cyak' chik'ajsbil swutzu', tan yi e'chk milawr yi na bnix tanu', nin tan yi na el k'abu' te yolu'.
6Ilu' kaRyosil, cya'l nin jun yi at tcya'j yi cho'nk yi ẍchamil chi yi teru' ẍchamilu'.
7Cha'stzun te, cyakil o' na kek ẍchi'u'. Nin cyakil yi e' yi ate' xlaju' na cyek ẍchi'u'.
8Kataj, ilu' kaRyosil yi cya'l na xcye' quen te'ju'. Na cyakil yi porer tu yi bintzi, cho'n na saj te'ju'. Nin cya'l jun tz'opon tan stz'amle'n yi ẍchamilu'.
9Na na xcye'u' tan makle'n yi pak'bil mar. Pe najk saj colp wi' yi mar, na xcye'u' tan makle'n.
10Ja xcye'u' te yi jun chin wutzile'n txuc yi at xe mar. Qui'c mu'ẍ xac mban swutzu', na junawes mme'l cu'n tanu' swutz. Nin tan yi ẍchamilu', ja che'l cu'n cyakil yi contru' tanu' swutz.
11Cyakil yi at tcya'j, tu cyakil yi at wuxtx'otx', i'tz teru'. Na ilu' bnol tetz cyakil yi at bene'n tzi'n.
12Ilu' bnol tetz cyakil yi at je'n tzi'n tu yi at cwe'n tzi'n. Nin ilu' bnol tetz yi wi'wtz Tabor tu yi wi'wtz Hermón yi na jal k'eju' ta'n.
13Wi'nin ẍchamilu', nin wi'nin poreru', na na xcye'u' te cyakil e'chk takle'n.
14Nin yi na ocu' tan cawu'n, na xomu' te yi bintzi, na na el k'ajabu' scye'j yi e' yi qui'c quil, nin na tak'u' chicaws yi e' aj paj.
15Ba'n cyeri e' yi na cyak' chik'ajsbil teru', yi e' yi na chixom te yi teru' tajtza'klu' yi chumbalaj nin.
16Cyakil nin k'ej na chitzatzin cyera'tz tk'abu'. Nin na chipek' te yi tajtza'klu' yi chin jicyuch nin te'j.
17Na ilu' na ak'on chiwalor tu chibalajil. Nin tan banl talma'u' na tak'witu' yi chichamil.
18Na yi ilu' teru' Kataj, ilu' yi colol ketz yi o' xonl Israel, ilu' kareyil yi wi'nin xanil.
19Ja jilonu' tul wutzicy' tane'n scyetz yi e' ẍchakumu' yi nk'uke' c'u'lu' scye'j. Nin je yolu'e'j: “Ja je' intxa'ol jun yaj ẍchixo'l yi e' intanum, jun yaj yi qui na xob. Ja wak' k'ej i'. Nin ilenin nocopon tan ẍch'eye'n.
20Ja bin nojpon inwutz te Luwiy tetz inchakum. Ja je' inkojol yi wetz inaceit twi' tan bixbaje'n tetz rey.
21Nocopon tzun tan ẍch'eye'n i'. Swak'e' imporer tan ẍch'eye'n. Nin quil wil cyen i' ẍchuc.
22Quil lo'on i' cyak'un yi e' contr. Nin quil chixcye' yi e' mal nak te'j.
23Ma na swutz cu'n i' ẍchilo'onk yi e' tetz contr wa'n. Nin cyakil yi e' yi ẍchi'chok chic'u'l te'j, ẍchiquimok wa'n.
24Swak'e' cyakil imbanl tetz i', bantz xome'n i' te yi bintzi, nin tan in sjalok mas k'ej i' tan cawu'n.
25Tz'opon yi ca'wl i' jalen tzi mar Mediterráneo, yi at toque'n tzi'n, nin tz'opon jalen tzi yi tzanla' Eufrates, yi at tele'n tzi'n.
26Ilenin stale' i' swetz: ‘I ilu'a'tz ilu' intaj, ilu' inRyosil yi colol wetz.’
27Nin swak'e' ama'l tetz i' tan toque'n tetz Bajx inCy'ajol, nin tetz wi'tz ajcaw squibaj cyakil yi e' rey bene'n tzi'n wi munt.
28Ilenin chimpek'ok te i', nin nelpon cu'n te yi inyol yi ja insuk tetz.
29Na yi e' tetz xonl ẍchinajank le tetz ama'l. Ẍchinajank sbne' opon tunintz, jalen yil xit yi tcya'j.
30”Poro kol chijatx len quib yi e' tetz xonl te weri inchusu'n, nin ko quil chiban tane'n wetz inca'wl,
31nin ko tz'el k'ej inca'wl cya'n, nin ko quil cho'c c'ulutxum jak' inca'wl,
32swak'e' tzun chicaws, tan paj yi quil. Nocopon tan chijicyle'n tan xicy'xab.
33Poro quil tzincy'ajlen yi xtxaxl walma' te Luwiy, ma na nelpon cu'n te yi inyol yi minsuk tetz.
34Nelpon cu'n te yi trat yi mbixe' ka'n tuch', na qui't na'j wutz incoc tu inyol.
35Ja wi't insuk jun inyol. Nin qui'c la'jil swuch'. Cha'stzun te sne'lk cu'n te inyol yi ja wi't insuk tetz Luwiy.
36Na yi e' tetz xonl ẍchinajank le tetz ama'l. Ẍchinajank sbne' opon tunintz, jalen yil xit yi k'ej.
37Yi jun reya'tz stz'a'tok i' sbne' opon tunintz, chi tane'n yi xaw, nin jalen yil sotz yi tcya'j.” Ta', ya'stzun yolu' banak cyen.
38Poro yi jalu' Wajcaw, ja cyaj cyen tilolu', nin ja el k'ej yi jun reya'tz, yi je'nak xtxa'olu'.
39Quinin mme'l cunu' te yi trat yi suknaku'. Ja el k'ej yi ẍchakumu' tanu'.
40Ja el cu'n yi tnumil i' tanu' swutz. Na ja cu' woq'uilu' yi tapij yi at solte'j.
41Tu na chicyequen cyakil wunak tc'u'l. Nin na cyalk' nin yi e'chk takle'n yi na cyaj. Ja oc yi tnumil i' tetz chitze'lbe'tz cyakil wunak.
42Ja tak'u' ama'l scyetz yi e' tetz contr tan chitx'acone'n te yi rey.
43Na quinin ntak'u' ama'l tetz tan xcone'n yi tetz spar tan oyintzi'. Nin quinin xomu' te'j tan ẍch'eye'n te yi oyintzi'a'tz.
44Ja el k'ej i' tanu'. Junawes qui'ct xac i' mban, na qui't na cawun.
45Qui't ntak'u' mas ank'i'n tetz, na junawes ja el xtx'ix i' tanu'.
46Ilu' Wajcaw, ¿junawes pe' ntew tibu' skawutz? ¿Junawes nin pe' nje' lajp wi'u' ske'j, chi na ben lo'on jun k'ak'?
47Ta', ulk tx'akx tc'u'lu' yi ank'i'n yi ak'ij tanu' swetz. Qui tunin k'usij. Na cyakil wunak yi bnixnake' tanu' qui'c mas chitiemp ak'ij tanu'.
48Na qui'c jun yi nink ben ẍkon jun c'oloj tiemp nin yi qui'k quim. Na qui'c nin jun yi nink clax tk'ab quimichil.
49Wajcaw, ¿ja pe' tzaj yi banl talma'u' yi nẍchaju' sketz le xe'tzbil tzaj? ¿Ja pe' tzaj yi banl talma'u' yi suku' tetz Luwiy?
50Sak swutzu' yi cyakil wunak na chitzan tan kabuchle'n. Chin ch'on nin na wil yi na cho'c tan kajisle'n.
51Ilu' Wajcaw, ya'stzun na chiban yi e' contru' ske'j. Nin ya'stzun na chiban te yi ẍchakumu' yi je'nak xtxa'olu'.
52Poro yi o' ketz, ilenin skak'e' k'eju' Kataj. ¡Amén!
