Text copied!
CopyCompare
Yi Antiw Bible / Yi Ac'aj Testament - Salmos

Salmos 46

Help us?
Click on verse(s) to share them!
1KaRyosil, i' colol ketz. Nin i' na ak'on kachamil. Nin list nin i' tan kuch'eye'n, yi na ultzaj e'chk sotzaj c'u'lal skawutz.
2Cha'stzun te quil kaxob, mpe nink ẍchuc tib cyakil yi munt, nin mpe nink tz'icy' yi e'chk wutz xe mar.
3Mpe nink jincan yi mar, nka nink ẍchek'e'n tib yi pak'bil mar, quil kaxob. Ncha'tz mpe nink ẍchuc tib yi e'chk wutz, quil kaxob.
4Na at jun tzanla' yi na tak' tzatzin tetz yi tnum tetz Ryos. Cho'n at le luwar yi chin xan nin kale najle't i'.
5Stz'a'tok yi wi'tz Ajcaw le jun tnuma'tz. Nin qui't xit tetz ben k'ej ben sak. Na yil tz'ul skil tane'n, tz'ocopon i' tan quich'eye'n yi e' aj tnuma'tz.
6Cyakil yi e' nación ẍchixobok, nin wi'nin ẍchilucne'. Na ẍchixobok yil quibitnin yil jilon tzaj Kataj. Nin chelepon cu'n swutz, yil quibit yol i'.
7Na yi kaRyosil xomij ske'j, yi Ryos yi cya'l na xcye' quen te'j, i' yi Ryosil kamam Jacow, ite'n nin i' colol ketz jalu'.
8Or bin cyeru' chisajku' tan xmaye'n cyakil yi e'chk takle'n balaj, yi ja bnix tan Kataj tzone'j wuxtx'otx'. Jun cu'n chelepon yabu' te'j.
9Na ja xcye' tan makle'n e'chk oyintzi' bene'n tzi'n wi munt. Ja xcye' scye'j yi e' contr, na wak'u'n cu'n nsaj chiflech tu chilans ta'n. Nin ja oc k'a'kl cyakil yi chicare't, yi na xcon cya'n tetz oyintzi'.
10Ma jalu', je yol i'e'j: “Makwok itib te oyintzi' swe'j. Tajwe'n tan itocsal yi i ina'tz in Ryos. Nin yi i ina'tz in Ajcaw squibaj cyakil yi e'chk nación. Wetz cu'n cyakil yi ama'l bene'n tzi'n wi munt,” stzun i'.
11Na xomij yi Kataj Jehová ske'j, yi jun yi cya'l na xcye' quen te'j. Na ite'n nin Ryosil Jacowa'tz, i' colol ketz jalu'.