1Ntin cu'n te Ryos na jale't tzatzin paz wa'n, na i' yi colol wetz.
2Ntin cu'n i' ch'eyal wetz, na list i' tan incolche'n. Cha'stzun te k'uklij inc'u'l yi quil chinlo'on, na i' yi colol wetz.
3Ma axwok itetz yi axwok incontr, ¿tona' cxo'c tan imbiyle'n? ¿Tona' chincu' ita'n? Na yi itajbil, i'tz tan incwe'n junawes, chi na cu' woc' jun tapij, nka chi tane'n jun pe'm yi na cu' ch'uk.
4Na yi mero itajbil i'tz tan wele'n cu'n swutz. Nin na baj itxumul e'chk takle'n swe'j yi i'tz la'jil tu'. Na itak'wok ink'ej tane'n, poro iwutz tu', iplaj tu'. Poro te italma' nternin na chi'ch ic'u'l swe'j.
5Ntin cu'n te Ryos na jale't tzatzin paz wa'n, na i' yi colol wetz.
6Ntin cu'n i' ch'eyal wetz, na list i' tan incolche'n. Cha'stzun te k'uklij inc'u'l, yi quil chinlo'on, na i' yi colol wetz.
7Ntin cu'n Ryos tz'ocopon tan incolche'n bantz qui tele'n ink'ej. Na i' yi ama'l yi ba'n tzincolwib tul, bantz qui inlo'one'n. Na i' yi colol wetz, nin yi q'uicy'lom wetz.
8E'u' intanum k'ukek bin chic'u'lu' te Ryos. Cuk chiwutzu' tetz. Ilenin chijake'u' ẍch'eybil cyeru' tetz, na i' yi colol ketz.
9Na jun yaj, qui'c nin mu'ẍ tal xac swutz Ryos. Qui'c na ban yi ko i'tz jun prow me'ba' nka jun ric, na yi nink tz'oc chima'le'n, quil chima'lan na qui'c cyalil. Qui'c mu'ẍ jatxbil chixo'l yi e' ric tu yi e' me'ba' na qui'c mu'ẍ tal chixac.
10Cha'stzun te qui'c ltak' kol jal oyintzi' skaxo'l, tan tu' yi kame'bi'l, nka kol kamaj kib te'j. Poro kol jal mu'ẍ kame'bi'l, ba'n tcu'n quil kocsaj kib nim tuch', nin quil k'uke' kac'u'l te'j, na sotzok tera'tz.
11Ma na je talnak Ryose'j, nin ala'ix tir tal i': “Qui'c jun e'chk takle'n yi qui'k chinxcye' te'j.”
12Yi kaRyosil wi'nin banl talma' i'. Na na tak' i' kabanl nka kacaws. Xomcyen tu' te yi mbi na kaban.
