1Wajcaw, at wi'nin ẍchamilu'. Ilu' yi Ryosil Jacow, nin ẍchajnaku' yi poreru' tetz. Ncha'tz, ulk tx'akx tc'u'lu' yi q'uixc'uj yi muc'nak Luwiy.
2Ulk tx'akx tc'u'lu' yi yol i' yi suknak teru'. Na je yol i'e'j:
3“Quil na'tij xe inca'l, nin quil nuje'.
4Quil chinwit, nin quil tz'oc inwatl,
5jalen yil bnix yi ca'l Wajcaw wa'n. At wi'nin ẍchamil i', na i' tajcawil Jacow.”
6Te yi ato' Efrata, ja kubit yi na' atite't yi caẍa' kale at cu'nt yi ca'wlu'. Nin ja xka'k tan ticy'le'n. Cho'n jale'n ka'n le ama'l Jaar.
7Quin bin xe ca'l Kajcaw. Quin kamejek swutz i'.
8Ma jalu' Kajcaw, sajku' skaxo'l, tuml yi caẍa'u' yi wi'nin porer. A'toku' skuch', tzone'j wi'wtz. Najanku' skaxo'l tetz ben k'ej ben sak.
9Nink chiwekxij yi e' pale'u' tan be'chok yi chin stum nin yi na ẍchaj yi at chibalajil. Lok chiẍch'in yi e' tanumu', yi xansa'n che't, tan yi tzatzin yi ate' cu'nt.
10Bantz tele'n cu'n te yi yolu' yi talnaku' tetz Luwiy yi ẍchakumu', qui bin ltil cyenu' yi rey yi je'nak xtxa'olu'.
11Na je bin yolu'e'j yi talnaku' tetz Luwiy, nin yi talnaku' yi tz'elepon cunu' te'j:
12“Swak'e' ama'l tetz jun axonl tan toque'n tetz jun rey. Nin ncha'tz, kol chiban tane'n yi ara xonl yi katrat, nin kol chiban tane'n yi wetz inca'wl yi swale', swak'e' tzun ama'l scyetz tan chicawune'n tetz ben k'ej ben sak.”
13Je'nak xtxa'ol Kajcaw kaRyosil yi wi'wtz Sión tetz najbil i'. Na je yol i'e'j:
14“Yi jun ama'le'j, wi'nin na chimpek' te'j, na ya'stzun kale chin najewe't.
15Swak'e' imbanl tibaj chiwa' yi e' yi najlche' le yi jun tnuma'tz. Snojk chic'u'l cyakil yi e' me'ba' yi ate' ẍchixo'l.
16Che' inweke' yi e' pale' tan be'chok yi chin stum nin yi na ẍchaj yi at chibalajil. Nin chiẍch'ink yi e' intanum yi xansa'nt wa'n tan yi tzatzi'n yi ate' cu'nt.
17Nin swak'e' ama'l tetz jun xonl Luwiy tan cawune'n tzone'j wi Sión. Nin yi jun txekbila'tz quil tzaj, na scawunk yi jun ajcawa'tz yi bixba'ntz wak'un, tetz ben k'ej ben sak.
18Tz'elepon chitx'ix yi e' tetz contr wa'n. Ma yi i' tetz, sjalok wi'nin tetz k'ej tan cawu'n,” stzun Kajcaw bantz.
