ROMA 10

1

2

3

4

5

6

7

8

9

10

11

12

13

14

15

16

¹Varavaragu e, lalogu ena ura, bona egu noinoi Dirava enai danu, be Israel taudia do bae mauri.

²Lau dibagu idia ese Dirava e ura heniamu; ḡau tamona, lalodia asie pararamu.

³Badina be Dirava ena kara maoromaoro asi dibadia; sibo-lia edia kara maoromaoro e goadalaiamu, a Dirava ena kara maoromaoro asie badinaiamu.

⁴Badina be taravatu ihaḡuḡuruna be Keriso: bae abidadama henia taudia iboudiai maorodia bae gwaurai, ia bagunai.

⁵Mose ese taravatu ena kara maoromaoro e helevalaia, eto, E karanm taudia na unu Ḡau daidiai do bae mauri.

⁶A heabidadama ena kara maoromaoro ini e gwau tomamu: “Lalomui ai basioto, Daika guba ai baine dae, Keriso baine hakaua diho

⁷eiava, Daika gabu dobuna ai baine diho, Keriso mase taudia bogaragidia amo baine hakaua dae?”

⁸Ma e tomu “Hereva na dekemu ai, udumu ai, lalomu ai”. Heabidadama herevana binai ai ese a harorolaiamu:

⁹udumu ai Iesu Lohiabadana ba gwaurai, bona lalomu ai bavabia dae Dirava ese mase amo e hatorea isi; bena ba mauri.

¹⁰Badina be lalo ena heabidadama amo kara maoromaoro e varamu, bona udu ena hegwaurai amo mauri e varamu.

¹¹Badina be buka ai e tomamu, Ia bae abiabiraia taudia iboudiai na basie hekwakwanai.

¹²Iuda tauna na dia idau; Helene tauna na dia idau. Badina be iboudiai edia Lohiabada na tamona; bona e hahaneamu taudia iboudiai e harihari henidiamu;

¹³bona Lohiabada ladana e hahaneamu taudia iboudiai na bae mauri.

¹⁴A asie abiabiraia taudia na ede bae hahanea toma? Bona harina asie kamonai taudia na ede bae abiabiraia toma? Bona haroro tauna bema lasi, harina na ede bae kamonai toma?

¹⁵Bona haida ese basie siaidia, haroro taudia na ede bae haroro toma? Buka ai e torea heḡereḡerena eto, Ḡau namodia haridia moaledia e mailaimu taudia aedia daka namo!

¹⁶A haida na sivarai namo asie kamonai henia. Isaia eto, Lohiabada e, daika ese emai hereva vada e abi dae?

¹⁷Taunabunai, heabidadama badina be kamonai, bona kamonai badina be Keriso ena hereva.

¹⁸A lau na tomamu idia na asie kamonai a? Lasi, e kamonai. Eredia na tanobada heḡeḡe-madai eha piua, Bona edia hereva na tanobada dokodia ela.

¹⁹Ma na tomamu: Israel asi dibadia a? Be! Gunaguna Mose eto, Asi besedia taudia ediai emu vaḡeḡe baina havaraia, Bona lalo-duhu besena enai emu badu baina havaraia.

²⁰Bona Isaia e hereva goadagoada, eto, Asie tahugu taudia ese e davarigu, Bona asie nanadailaigu taudia ediai na hedinarai.

²¹A ia ese Israel e herevalaia, eto, Dina idoinai gwau-edeede bona gwautubu besena na imagu na pala henia.