1Ndugu zangu, sulukila ya moyo wangu na nhambiko yangu ha Mulungu nolonda wanhu wa Islaeli wakomboligwe!
2Kinidaha kulonga mmbuli ya wanhu wano icho kino, kamba wokiiyoha ng'hani kumzahila Mulungu. Ila vija viwomzahila, hawamzahila na nzewele.
3Kwavija hawaitangile nzila ya kuwa bule uzenzeleganye ilawa ha Mulungu, ila wozahila kutenda mbuli zao wenyego, avo hawatogole kulongozigwa na nzila ya Mulungu ya kuwatenda wawe bule uzenzeleganye.
4Kwavija Kilisto kakigala ikimambukizo cha Malagizo ga Musa, giladi wanhu wose wotogola wapetigwe kuwa bule uzenzeleganye.
5Mmbuli ya nzila ya kuwa bule uzenzeleganye ilawa mkugagoga Malagizo ga Musa, Musa kandika vino, “Munhu yoyose yogagoga malagizo gali Mmalagizo ga Musa kowa mgima kubitila Malagizo higo.”
6Ila mbuli ya kuwa bule uzenzeleganye, ikwiza kulawa mnhamanila, yolonga, “sambiulonge mmoyo wako, ‘Yalihi yondayakwele mbaka kuulanga?’ nhegulo yake, kumuhumulusa hasi Kilisto.
7Ama sambiulonge, ‘Yalihi yondayahumuluke mbaka kuzimu?’ nhegulo yake, kumwinula Kilisto kulawa mkudanganhika.”
8Ila Nyandiko Zing'alile zolongaze? “Usenga wa Mulungu wa habehi nagwe, mmulomo wako na mmoyo wako.” Uno uwo usenga wa nhamanila utuwapetela wanhu.
9Kwavija kamba uhatogola na mulomo wako kamba Yesu iyo Mndewa na kutogola mmoyo wako kamba Mulungu kamzusa kulawa mkudanganhika, kokomboligwa.
10Kwavija munhu yahatamanila mmoyo wake kopetigwa kamba kabule uzenzeleganye, na munhu yahatogola na mulomo wake kokomboligwa.
11Nyandiko Zing'alile zolonga, “Munhu yoyose yomtamanila hageligwa kinyala.”
12Kwavija Muyahudi na Mmhazi haduhu yam'banzile miyage. Wana Mndewa imwe, na iyo Mndewa wa wose, yowamemeza motelo wose awo womkema.
13Kwavija, “Munhu yoyose yodikema twaga da Mndewa kokomboligwa.”
14Avo wodahaze kumkema ayo walekile kumtogola? Na wodahaze kumtogola ayo walekile kumuhulika? Na wodahaze kumuhulika bila munhu kuwapetela?
15Na wodahaze kuupeta Usenga Unogile kamba hawatumigwe? Kamba viyandikigwe Mzinyandiko Zing'alile, “Ganoga ng'hani magulu ga awo wougala Usenga Unogile!”
16Ila siyo wose wautogole Usenga Unogile. Kwavija Isaya kalonga, “Mndewa, yalihi yautogole usenga wetu?”
17Avo, nhamanila mwanduso wake kuhulika, kuuhulika Usenga Unogile wa Kilisto.
18Ila nouza, hewo hawahulike? Si vivo, wahulika, “Dizwi jao jenela muisi yose, na mbuli zao zenela mbaka hana zisota za ulumwengu.”
19Nouza kabili, Waislaeli hawavitangile? Tanhu Musa kolonga, “Nowatenda mweye mwone migongo mwa awo wali si isi, na nowatenda mweye muwe na lusango na isi ija ilibule nzewele.”
20Isaya kagangamiza kulonga, “Nyoneka na awo walekile kunizahila, na nikiifunula mwenyego mwa awo walekile kunipula.”
21Ila mmbuli ya Islaeli kolonga, “Imisi ngima nigolosa makono gangu kuwabokela wanhu awo walekile kutogola na wadulu.”
