Roma 10

1

2

3

4

5

6

7

8

9

10

11

12

13

14

15

16

¹Mgo suwod, dakkoo kos ingowollon ku nod kotobbus iddos iling ku no mgo Judio, woy ini en kos dosalon ku riyon to Monama.

²Od pokoposivonnaa a no mohi-od dan nod puung atag to Monama, piru iddos kodpuung dan, waa noko-ikuu taddot bonnaan nonaw.

³Su id podtohon dan iddos po-ukit to Monama nod podmotallong to minuvu. Iyon dan baling noonokkali tid ikuu iddos kandan dad no po-ukit nod komotallong ukit to kodtuman to mgo Suhu, woy waa ran id po-iraom taddot po-ukit to Monama.

⁴Oyyos notuman diyot ki Disas Krays iddos dontulon to kodboggoy taddot mgo Suhu, amoy iddos langun nod pomakoy kandin, od komotallong diyot kod-ontong to Monama.

⁵Na, ini en kos id sulat ni Moises moka-atag to minuvu nod tuman to mgo Suhu amoy'd komotallong diyot kod-ontong to Monama. Kahi rin to, “Iddos minuvu nod tuman to langun no Suhu, od pokotanggap to umuun waad tomanon.”

⁶Piru moka-atag to po-ukit nod komotallong kos minuvu riyot kod-ontong to Monama ukit to kopomakoy, duwon mandad no-ikahi riyot Nosulat no Kahit Monama no mid ungketen to, “Yo kowd poomdomma no, gali ra od komotallong kos minuvu riyot kod-ontong to Monama otik duwon od undiyot datas to langit amoy'd angoy ki Disas Krays.

⁷“Yo kow mandad od poomdomma no, ko-ilangan pa no duwon od undiyot daom to lugaa tid poomatoy amoy'd badnow ki Disas Krays.

⁸Su no-ikahi riyot Nosulat no Kahit Monama no, “Iddos kahi to Monama, diyon don to koniyu. Diyon don idda to bivig dow woy riyot ginawa row.” Idda en kos kahit Monama no id ponudtuu roy moka-atag to kopomakoy,

⁹no otik id ponudtuu row riyot duma no si Disas Krays kos od Longaggon, woy od pomakoy kow riyot ginawa row no id badnow sikandin to Monama, na od kotobbus kow en.

¹⁰Su otid pomakoy ki to bonnaavonnaa, od komotallong ki riyot kod-ontong to Monama. Woy pomon to id ponudtuu ta riyot duma kos kopomakoy ta, od kotobbus ki.

¹¹Oyya su no-ikahi riyot Nosulat no Kahit Monama no, “Iddos langun nid pomakoy kandin, konna en od pokodsondit.”

¹²Inin tandu, atag to langun, Judio man o konna, oyyos sokkad da man kos od Longaggon ta no od busbus to kopiyannan diyot langun nod nganoy kandin.

¹³Su no-ikahi riyot Nosulat no Kahit Monama no, “Iddos langun nod nganoy tod Longaggon, od kotobbus en.”

¹⁴Piru momonnu ran man od nganoy kandin otik waa pa sikandan id pomakoy? Woy momonnu ran od pomakoy kandin otik waa pa sikandan nokorinog moka-atag kandin? Momonnu ran mandad od pokorinog otik waa od ponudtuu kandan?

¹⁵Woy momonnu ran mandad od koponudtulan otik waa od popiyod amoy'd ponudtuu kandan? Iling taddot no-ikahi riyot Nosulat no Kahit Monama no, “Oraroy ki en nod kahaa otik duwon od inguma nod ponudtuu to Moppiyon Dinoggan.”

¹⁶Piru simbokkad da kos id tanggap to Moppiyon Dinoggan, su no-ikahi ni Isaias no, “Longaggon, pilopila ra kos id pomakoy to ponudtulon doy.”

¹⁷Piru ahad ungketen, bonnaa en no iddos kopomakoy to minuvu, id pomon to kodpominog dan to ponudtulon moka-atag ki Disas Krays.

¹⁸Piru duwon intud ku. Waa vo nokorinog kos mgo Judio moka-atag ki Disas Krays, no idda en kos unayan no waa ran id pomakoy? Nokorinog en sikandan, su no-ikahi riyot Nosulat no Kahit Monama no, “Dos kahit Monama, norinog to langun no minuvu woy nokoso-ob don to intirut ingod.”

¹⁹Na, duwon mandon intud ku. Ondan, waa vo nokaabbot iddos mgo Judio taddot norinog dan? Nokaabbot en sikandan. Su id oseng kos Monama riyot mgo Judio ukit taddot id posulat din ki Moises. Kahi rin to, “Id pokita ku kos kopiyannoy ku riyot mgo minuvu nid kolingasa-i row amoy od kosina kow kandan. Id pokita ku kos kopiyannoy ku riyot mgo minuvu no waa sinorollan moka-atag koddi amoy id kolingasa-i row sikandan.”

²⁰Mid ikahi mandad kos Monama kandan ukit ki Isaias, woy to waa kod-aang-aang, mid ungketen si Isaias to, “Nokita a taddot mgo minuvu no waa id nangkap koddi. Id pokilaa a riyot waa id intud-intud moka-atag koddi.”

²¹Piru moka-atag taddot mgo Judio, mid ikahi kos Monama to, “Nouhoy ad mid umow nod porani koddi iddos mgo minuvu no diid pominog woy mgo motoggas kos uu.”