1O tuak ka ahinkuli keil, ek vati li mok keke Ahi houtut meatin kati keil onak. Ka lisenges namul navis keih mini en usite one.
2Nakilea mahiteni min kami keke me-Isrel keil e vati mok avousil kat Ahi, ka armumontei en sakien koa vi anatin koa Ahi rie lati min keil.
3Ka veni keil areingeingen sise koa Ahi lingi keke meatin keil umai amal en meten, asak visi avoumon sise sav keke avakur maluen enek. Sakini, aling rendemien one keke avarmusiltei sise ten maluen koa Ahi mumoni tuai.
4Veni Kristo sakin avong koa meatin keil asak visi avakur maluen vaka en mengkatien keil mai rokol keite teni. Sakini, kosa, koakeil aling demkatien one eni, keil varei umai amal en meten Ahi.
5Mosis mutis selusien koanik usil mukave meatin kilea vamal en meten Ahi ka en sise ten mengkatien keil vit, “Koakeil vasi along kat selusien vasi ten mengkatien keil ekek imoul.”
6Ka en usite ten selusien koa vit usil mukave meatin keil akilea avamai avamal en meten Ahi ka en sise ten demkatien, Tus Votut vit, “Keik konahistei en rendemien onom konahit, ‘?Isei hehina en out nesa keke vakuri?’” Veni koanek suval koa e vat Kristo vamita ris en out netan keke vaselus usili. Ka kei mita tuai.
7“Vuo kovahisi kovahit, ‘?Isei hehita en out ten matien vakuri?’” Veni koanek suval e vat Kristo vamea ris ran out ten matien keke vaselus usili. Ka kei mea moul eris ran matien tuai.
8Ka asa koa Mosis viteni ekek, “Selusien onen Ahi mul vesesal ven kami, mul tuai en ongomi ka tinomi.” Ka koanek vi selusien ten demkatien koa komai memul mevitehiteni.
9Veni munak mivit leini en ongomi keke Iesu vi Asuv, ka mikur anatin eni en tinomi keke Ahi rali lati ran matien, Ahi houtut moulien onami.
10Veni navong meatin tai kur anatin eni en tin, Ahi lesi mal tuai en meten. Ka navong vit leini en ongon, Ahi mutut moulien onen tuai.
11Veni Tus Votut viteni vit, “Koakeil akur anatin en kei, tounah tovuol kilea vasakin keil avamemou eni.”
12Koanik vit usil ir vasi. Veni, en meten Ahi, tounah tovuol vateisav en Siu keil ka koakeil arvitei Siu. Ahi vi vati Asuv etin onen meatin vasi keil, ka san tokolkatien koa mariso va min koakeil vasi avise ven kataunien.
13Koanek suval Tus Votut viteni koa vit, “Meatin vasi koa avise Iahova ven kataunien, kei houtut moulien one.”
14?Ka meatin keil akilea avahis Ahi ven kataunien hemukave munak arkultei veah anatin eni? ?Ka keil akilea avakur anatin eni hemukave munak arlongtei veah selusien usili? ?Ka keil akilea avalong selusien usili hemukave munak meatin tovuol vaha vahitehiteni min keil?
15?Ka meatin keil akilea avaha avahitehiten selusien enek hemukave munak meatin tovuol vasila lat keil avaha? Koanek suval Tus Votut viteni koa vit, “Navong meatin keil akur more longlongien, amaien one moreite mok.”
16Ka rovitei meatin vasi keil koa along kat more longlongien enek. Veni provet Aesea viteni mun vit, “?Iahova, isei kur anatin en selusien onomai? Meatin tovuol.”
17Sakini, helamu, meatin tai heha hehitehiten more longlongien usil Iesu Kristo min meatin keil. Hevus, meatin keil akilea avalonge. Ka navong alonge, akilea avaling demkatien one en kei.
18Ka navis kami, “?Mukave, vi anatin keke me-Isrel keil arlongtei more longlongien usil Kristo?” Vuo, keil alonge tuai. Veni koanek suval Tus Votut viteni koa vit, “Rea one karahit out vasi, ka longlongien keil one usil Ahi va rokol meatin vasi keil en out netan.”
19Navis ris kami, “?Mukave, vi anatin keke me-Isrel keil arkileatei asa koa Ahi vit voumoni?” Vuo akilea, veni Mosis mutisi keke Iahova varei viteni vit, “Inau nitokol kat koakeil arvitei meatin kati keil onak keke vasakin kami, meatin kati keil onak, mivahi elu eni. Anatin, numoni hetahos en kantri onen koakeil arkileatei inau. En sise enek, nisakin kami, meatin kati keil onak, tinomi hetisa eni.”
20Ka Ahi vit kilea imok eni navong selus ka en provet Aesea vit, “Koakeil arlei kattei nau, keil varei avotin nau. Anatin, navothot enau min koakeil armultei avahise inau.”
21Ka Ahi vit usil me-Isrel keil vit, “En avong vasi, namutelan hek keke makur revi meatin keil onak. Ka arlong kattei inau ka vatie keih ramat.”
