Romanos 10

1

2

3

4

5

6

7

8

9

10

11

12

13

14

15

16

¹Oigamina, onofidanokiki ida judeus kaija'ari Deus va'ora akava'ijoavini-ra vanofivini. Kodija'ari vihiki adani. Deus kania okanikhariadanokiki afobakhia ida va'ora akava'ijoavini.

²Vara ovani'aki ida vakadihojai onokibakhia'iki. Vanofi'iki ida Deu-ra khai vani'avini afojahaki. Vanofivini kaba'i, ni-avigaki ida niha ninini Deua binofiki-ra khai vani'avini.

³Ni-avigaki ida niha ninini Deus ija'ari kamahi-ra nasohika'oavini, bikapoarija kaimoni ida ija'ari. Avigaravini mani ida vakadimahi-ra vanasohika'oavini-ra vakaijo'avini hija, Deus va'ora kapoarira kaimoni. Deus ija'ari-ra va'ora nava'isohivini hiki ida vakadimahi sohika'oani niha ninini viaha. Judeus kaija'aria vakajoniki ida Deus va'ora kapoarivini niha ninini binofikia.

⁴Cristo kha'ina mani ida Deus kava'isohihi jiriki-ra nihima'ia, oniani ida Deus ija'ari Cristo-ra vakaijokaki kamahi-ra nasohika'oa'ia, bikapoariki ida jaboni kidija'ari hija kaimoni.

⁵Hari. Moisés kohana vara bivani'aki ida ija'ari Deus kava'isohihi jiriki-ra naabavini, oniani oa kidimahi-ra nasohika'oavini-ra nofihi ida ija'ari Deus viaha. Moiséa binajiriki hida athi: “Ija'ari Deus kava'isohihi jiriki-ra ragaririhi; Deus kava'isohihia bibananihi ida ija'ari Deus kania, kidimahi anokhomirija kaimoni.” Niha ada Moisés kohana.

⁶Deus athi kapapirani kania hojaki ida athi pitani hoariha. Vara bivani'a'iki ida ija'ari Deu-ra vakaijokaki kamahi-ra nasohika'oavini. Nihi ida athii: “Hari'a iabono nana'dohi: ‘Nahina vania koda bianikasira ada Cristo nama, joirarira kaimoni?’

⁷Hari'a iabono nana'dohi jaboni: ‘Nahina vania koda bianigarira ada Cristo ija'ari kohana vaibavia, bivajoisira kaimoni?’ ” Ni-niki hida varani asohiki.

⁸Nimania hida moni jiriki Deus athi kapapirania hojaki: “Ni-napaja hojaki hida moni Deus a'onira nava'isohivini hi'iki. Avamaakarinia hojaki hida. Avabodinia hojaki hida moni vara avavani'aja kaimoni. Avava'ini bodinia hojaki jaboni ida moni.” Deua bivava'isohihiki ida ija'ari vakaijokana hiki kavaranihi. Onivani fori hiki ida Deus kavarani vara avani'abakhiaki vahoariha mitha vani'aja kaimoni.

⁹Iva'ini bodinia ikajari'darihi ida Deus Jesu-ra anahokivini abini'ina naothinia; vahoariha vaviaha vara ivani'ahi jaboni: —Kodika'da'di ada Jesus — inihi, Deus ira akava'ijoahi.

¹⁰Ava'i bodinia Deu-ra avakaijokahi; binasohika'oahi ida akadimahi; haria kapoariha. Vahoariha vaviaha ajari'darina-ra vara avani'ahi; Deus haria akava'ijoahi.

¹¹Hojaki hida athi Deus athi kapapirania: “Deua binava'iponi'imarinirihi ida ija'ari vakaijokana hiki.”

¹²Ija'ari hahavi vakadimoni hida athi. Judeus kaija'ari vakadimoni hida athi. Judeus kaija'ari vihiriki vakadimoni jaboni hida athi. Ni-bianahoarihaki hida athi va'ora akava'ijoara kaimoni adani judeus kaija'ari vihiriki. Hojaki ada ka'da'di hoarana ka'oa ija'ari hahavi vakadimoni. Ovari va'ora kajoamorajahakiki adani ija'ari hahavi Deu-ra vakanikhariaki.

¹³Hojaki hida athi hoariha Deus athi kapapirania: “Akadika'da'di va'ora akava'ijoaki bana adani ija'ari hahavi kanikhariana vihiki.” Niki hida athii.

¹⁴Ija'aria vakaabokarihi ida Cristo-ra vakanikhariavini, vajari'dana oadani. Ija'aria vakaabokarihi ida Cristo-ra vakajari'daravini, vakamitharavini oadani ida monina. Ija'aria vakaabokarihi ida monina vakamithavini, vahoariha vara vavani'aravini oadani.

¹⁵Athi avikhava abonoa vakaabokarihi ida monina avavaadahaonivini, vahoariha va'ora vakaronaravini oadani. Deus athi kapapirania hojaki hida athi hoariha: “Jaha'oamanija ida moni jahaki avavaadahaoniva abonoa vavikhavini.”

¹⁶Hari. Ni-ija'ari hahavia vakapoariki ida moni jahaki-ra vakamithavini. Isaías kohana binana'dohi'aha: “Kodika'da'di, hana vihina vania vakajari'darija ida akadivarani?” Niha ada Isaías.

¹⁷Ija'ari Cristo monina-ra vakamithavini vani binakama'daja ida vakajari'daravini. Ija'ari vania vara vavani'aja ida Cristo monina ija'ari-ra najari'dariki.

¹⁸Hari. Ona'dohihi: Vakamitharia koda ida moni jahaki? Ha'a, vakamitha'oamani'ia ida. Deus athi kapapirania hojaki hida athi hoariha: “Ija'ari arabo hahavia vahojakia vakamithaki ida monina vakavaranina athi 'barakia. Aakhanakhama'iki ida vaathi arabo napaja.”

¹⁹Ona'dohi'ianahi: Israel kaija'aria avigaria koda ida moni? Ha'a, avigaki ida. Moisés kohana miro'a va'ora vara vani'a'iki adani Israel kaija'ari: “Deus avakadija'ari vihiriki-ra va'ora kajoamoraki bana, kidija'ari vihira kaimoni, oniani ida bana a'onira anakabajahaja. Deus ija'ari vava'i bodinariki fori vihiki-ra va'ora kakodiaki bana, oniani ida a'onira naihamahija.” Nimania hida Moisés kohana judeus kaija'ari vihiriki-ra vara va'ora vani'avini.

²⁰Isaías kohana jaboni ofinirina vara bivani'a'iki ida Deus athi: “Hora vakaraga'aha adani judeus kaija'ari vihiriki hora vanako'diriki. Hora vanana'dohiriki vakadiania oabono onanokia'ihi.” Niha ada Deus.

²¹Vara va'ora vani'avini adani Israel kaija'ari Deus bini'aha: “Mahi oadani ovadi-ra oanavirami'ihi, kodiania vajoira kaimoni. Vamorobohariki fori vihiki adani. Vakajoni'oamanija hida oathi-ra vanaabavini.”