1Ena mono weninane-motao, Isilaeli weninane yagunu holito Goti lomuwobo, ya li nomudina wa betiyageto ya lune-haneu dowa loto holinowe, loto lomumo yowowe.
2Weninawa yasi Goti yagunu auba iti holiyafa, ido holifefe ladámo minae. Aya monatina ya wa betifefe loto ya lowe.
3Gotikafo monatina fefe libo wenina minae, loto lo ledanaibo mona yagunu holifefe ladámoti, lo molaibo ha meyalo molanubo ya Goti nomunalo ya monate fefe lanogolaiye, loti eimotina monatina yagunuko holimo yowabo yagunu ya Gotikafo monatina fefe libo wenina minae, lo betinaibo hanu ya metina mu minae.
4Yagunu holilo. Kilistokafo Goti lo molaibo ha ya moda fefe loto meyalo molo hulo fulitaibo, yagunu holi hikitabo wenina muki ya ebate lito eimola fefe libo monalawa ya lemodoka moloto, ya monatina fefe libo wenina minae, loto lo ledaibo ne.
5Holiyafe? Lo molaibo ha meyalo molado ya monatina fefe libo wenina minae, loto lo betinaibo mona yagunu Mosesekafo feto loto lufuwa ibo, Lo molaibo ha ononawa linabo wenina ya hawa muki meyalo molanabo yako nomudina hofawa minanae, loto ha mono lufuwau (Wkp 18:5) ya nebo ne.
6Feto loto nebo nefa, ido holi hikitabo yagunu ya monatina fefe libo wenina minae, loto lo betibo mona yagunu feto libo, Hemotina hema ya okulumau yonaibo ne? loti lutina-hatinau holiyámilo, loto ha mono lufuwau (Lo 30:12) nebo ha, ya yoto Kilisto ilimito lumunune, loti lutina-hatinau holiyámilo, loto libo ne.
7Ido, Hema ya no-lowa feumau ya lumunaibo ne? loti yagi lutina-hatinau holiyámilo, loto ha mono lufuwau (Lo 30:13) nebo ha, ya lumuto Kilisto fuliguti li sinoi edoto ilimito yonune, loti yagi lutina-hatinau holiyámilo, loto libo ne.
8Aya ha ya neidafaiye liye? Hawa ukuwa ya moda hemotinaloka selo moloto minoto, ya lutinau wetinau moda mino betima ne, loto ha mono lufuwau (Lo 30:14) nebo ha, ya hawa ukuwa holi hikitanae, loto lo oloto molo-molo onibo ha ya ne.
9Moda holiyafe? Hemo ya Yesu ya Wenaba ne, loto wekagunu lo oloto molananibo, ido Gotikafo fuliguti li sinoi edaibo ne, loto luka-hakau holi hikitananibo, ya li nomuga wanaibo ne.
10Holi minafe? Lutekafo holi hikitanubo ya Gotikafo monatina fefe libo wenina minae, loto lo ledanogolaiye. Ido wetekafo lo oloto molanubo ya li nomude wanaibo ne.
11Aya yagunu ya feto libo, Emotina holi hikito muwabo wenina muki ya utinalo holiyámanigilae, loto ha mono lufuwau (Ais 28:16) ya nebo ne.
12Feito ya Yuda wenina, Giliki wenina, eito feka wenina li eito-eito itanaibo ma minámiye. E'e, Wenaba mako ya muki Wenabate nenako, emokafo wenina muki sula finabo ya li dowa lo betimo yonogolaiye.
13Aya yagunu ya feto libo, Wenaba huliyalo sula finabo wenina muki ya li nomudina wanaibo ne, loto ha mono lufuwau (Jol 2:32) ya nebo ne.
14Feito neboma nenako, yagunu masi holi hikito umámabo wenina ya igaidana oti sula finabo ne? Ido hala ukuwa holiyámabo wenina ya igaidana oti holi hikito munabo ne? Ido hawa ukuwa lo oloto molanaibo we ma minámanaibo ya igaidana oti holinabo ne?
15Ido idipi molámanabo ya igaidana oti lo oloto molanabo ne? Aya yagunu ya feto libo, Ha dowa liti loti lo oloto molabo wenina ya hidina omonala ne, loti muludina yoito dowa wa betiyabo ne, loto ha mono lufuwau (Ais 52:7) ya nebo ne.
16Feito nefa, ido hawa ukuwa dowa ya ma holiti holiyámoti o minae. Yagunu ya Aisaiyakafo feto libo, Wenabao, ha eteme o biyonibo ya hemakafo holi hikito ne? loto ha mono lufuwau (Ais 53:1) ya nebo ne.
17Feito hawa holinabo yako holi hikitanabo ne. Ido Kilisto hala lo oloto molanabo yako holinabo ne.
18Feito nebo nefa, ido ha ma lanogolowe. Holilo. Emotina ya hawa ukuwa ya ma holiyámafe? E'e, moda holitabo ne. Aya yagunu ya feto libo, Notina fefeluma mikau-mikau u fulitaibo, ido ha labo ya eba negu-negu ba lomo u hulibo ne, loto ha mono lufuwau (Sng 19:4) ya nebo ne.
19Ido ha ma lanogolowe. Holilo. Isilaeli wenina yasi holifefe ladámafe? E'e, moda holifefe lotabo ne. Aya yagunu Mosesekafo homu Goti welaloti ya feto libo, Nemo ya wenina ma hulitina minámibo ya li faka lo betinobo, ya hemotina wauwa linigilae. Weninawa ha manadinau minámibo ya adina li faka lo betinobo, ya hemotina lutina hala-kala lanogolaiye, loto ha mono lufuwau (Lo 32:21) ya nebo ne.
20Ido aliga Aisaiyakafo Goti welaloti ha ma auba ito feto libo, Nemo moni witane ámabo wenina yasi li oloto pi nedabo ne. Nemogunu holiti loga-miga ámabo wenina ya monane li oloto pi biyobo ne, loto ha mono lufuwau (Ais 65:1) ya nebo nefa,
21ido Isilaeli wenina yagunu feto libo, Lutina-hatina gedito, ha holiti holiyámoti abo wenina ya hamena fana ane sinolo biyobo ne, loto ha mono lufuwau (Ais 65:2) ya nebo ne.
