Lomu 10

1

2

3

4

5

6

7

8

9

10

11

12

13

14

15

16

¹Konagaꞌnimogitapae, nagaemo Gotiꞌa Isaleli vayaꞌnimo apakufamo alino katino apatesiyafeꞌmo naipafatiꞌmo nahauꞌnigeꞌna nunumu huꞌna neꞌapatove.

²Nagaemo ago apakeꞌnovana apakaemo Gotitefeꞌmo apayamukiki nehae, huꞌna apakeꞌnove. Apayamukiki nehayaꞌmonanafa Goti geꞌamo alagepa huꞌa noꞌafiye.

³Apakaemo, Gotiꞌa fatago kavaꞌamo fiku alino neꞌapamiye, huꞌa apakesa oꞌafiꞌa apakaiꞌapi fatago kavaꞌapigeꞌmo aliꞌa afole aiꞌa atesayafekeꞌmo aliꞌyaꞌmo neꞌaliye. Gotiꞌa agaiꞌa fatago kavaꞌamo alisayafeꞌmo mago kaꞌmo ago valino apateꞌniyaꞌmonanafa ohapauꞌnigeꞌa Goti aiyafiꞌmo oꞌmaiꞌnae.

⁴Kalaisiꞌa apakesa afiꞌa fatago nehaya vayaꞌmogi fatago kavaꞌmo alisayafeꞌmo Goti keꞌaepa geꞌamo ago akame huno hano huꞌniye.

⁵Moseseꞌa keꞌaepa gemo akame nehaya kavatetiꞌmo Goti aulagaleꞌmo fatago vayaꞌmo maisaya kavafeꞌmo avo kaenoꞌaeꞌmo, muki keꞌaepa geꞌamo akame nehisaya vayaꞌmogimo akame nehaya kavatetiꞌmo afaꞌa maisaya yaꞌmo aligae, huno avo kae maleꞌniye.

⁶Kae maleꞌniyaꞌmonanafa vayaꞌmogi apakesa afiꞌa fatago nehaya kavatetiꞌmo fatago kavaꞌamo alisaya kavatefeꞌmo ava gemo hunoꞌaeꞌmo, ina laꞌmo haino Kalaisiꞌmo avalelino eminesiyafeꞌmo kokuꞌnapiꞌmo haigiye, hutapa lapakesa oꞌafiyo. Ago emineꞌniyaꞌmofeꞌmo ani agufa kavaꞌmo hisaya aliꞌyatapimo ohaneꞌniye.

⁷Ina laꞌmo Kalaisiꞌa faliꞌniyatetiꞌmo avalelino haisiyafeꞌmo ma mopamo afeꞌalumelaga lamigiye, hutapa osiyo. Ago he tino haiꞌniyaꞌmofeꞌmae.

⁸Ani kava hiyo, huno nosifa na agufa kavakeꞌmo hiyo, huno nehiye. Ani gelefeꞌmo, Goti geꞌamo lapaopaleꞌmo haneꞌneno lapavayafiꞌe lapaipafiꞌeꞌmo haneꞌniye, huno hapa paiꞌniye. Lagaemo ani gelefeꞌmo apakesa afiꞌa fatago hisayafeꞌmo aeta hakalo huta hapa nepaune.

⁹Lagaemo, Gotiꞌa Yesuꞌmo faliꞌniyatetiꞌmo ago alino he tino ateꞌniye, hutapa lapakesa afita fatago hutetapaeꞌmo, Yesuꞌa Ala kava netimo maiꞌniye, hutapa lapavayafatiꞌmo aeta hakalo nehisayana Gotiꞌa lapakufamo alino katino lapategaiye, huta lapa nepaune.

¹⁰Ani kavatefeꞌmo laipafiꞌmo lagesa afita fatago nehunagenoꞌaeꞌmo Gotiꞌa, naulagaleꞌmo fatago vayaꞌmo maiꞌnae, huno nehiye. Ani kava huno Gotiꞌa lagufamo alino katino latesiyafeꞌmo lavayafatiꞌmo aeta hakalo nehune.

¹¹Ani kavatefeꞌmo Goti mukufiꞌmo avo kae maleꞌniya gemoꞌa, Ina lagimo agaefeꞌmo apakesa afiꞌa fatago nehisafigeꞌa apavagage osuge hapai oꞌvaige huꞌa maigae, huno avoꞌmo kae maleꞌniye.

¹²Na kava haneꞌniyaꞌmofeꞌmae. Yu nofi vayaꞌe alu nofi vayaꞌmogiꞌeꞌmo hailami salami huꞌa oꞌmaiꞌnae. Magokeꞌage Ala kava neꞌmoꞌa muki vayaꞌaiteꞌmo yagaino neꞌapateya vekamo maiꞌnigeꞌapaeꞌmo muki vayaꞌmogimo agaefeꞌmo keya aeꞌa ge nehaya vayaꞌaitefeꞌmo alopa kagemi yaꞌe vekagana huno maiꞌneno fiku hapa maeno neꞌapamiye.

¹³Ani kavatefeꞌmo Goti mukufiꞌmo magoꞌe gemo hunoꞌaeꞌmo, Ina lagimo Ala kava neꞌmo agiꞌalefeꞌmo keya neꞌaesafigeno afaꞌa apakufamo alino katino apategaiye, huno hapa paiꞌniye.

¹⁴Ani gemo huꞌniyaꞌmonanafa agaefeꞌmo apakesa afiꞌa fatago nosisaya vayaꞌmogimo haiya kava huꞌa agaefeꞌmo keya aeꞌa ge hugae. Agaefeꞌmo ava gemo oꞌafiꞌnisayana haiya kava huꞌa agaefeꞌmo apakesa afiꞌa fatago hugae. Mago vayaꞌmogi agaefeꞌmo ava gemo aeꞌa hakalo huꞌa hapa nopaisayana haiya kava huꞌa afigae.

¹⁵Mago vekamoꞌa alino apatesigeꞌa oꞌusayana haiya kava huꞌa uꞌa aeꞌa hakalo huꞌa hapa paigae. Ani kavatefeꞌmo avoꞌmo kae maleꞌniya gemoꞌa hunoꞌaeꞌmo, alagepa faigoko geꞌaletiꞌmo alino nanu aeno neꞌapateya gemo aliniꞌeꞌa aeꞌa hakalo huꞌa hapa nepaiya vayaꞌai apaiyamo kanale apaiyamo haneꞌnigeꞌa aliniꞌa neꞌae. Apakaemo alagepa kavafeꞌmo ava gemo afiteꞌa apamogaga aisayafeꞌmo ani gemo aliniꞌa neꞌae.

¹⁶Neꞌayaꞌmonanafa muki vayaꞌmogimo alagepa faigoko geꞌamo alagepa huꞌa akame nosae. Aiyeyaꞌa aise vayaꞌmogi akame nehaya kavafeꞌmo, Ala kava nene, huno, ina lagimo ketieꞌmo apakesa afiꞌa fatago huꞌnae, huno ha paiꞌniye.

¹⁷Huno ha paiꞌniyaꞌmonanafa mago vayaꞌmogi Goti geꞌamo aeꞌa hakalo huꞌa hapa nepaigeꞌapaeꞌmo neꞌafiye. Neꞌafigenoꞌaekeꞌmo apakesa afiꞌa fatago nehaya kavaꞌmo anile afole neꞌaiye.

¹⁸Afole neꞌaiyaꞌmonanafa Goti geꞌamo oꞌafiꞌnafiye, huꞌna loka huꞌna lapafi nekove. Haꞌao, ago afiꞌnae. Avoꞌmo kae maleꞌniya gemoꞌa hunoꞌaeꞌmo, Apake neꞌaiya apakemoꞌmo ma mopafi muki haopalegamo aino atagu faeno uneno huꞌniye. Geꞌapimoꞌa muki ma mopa atupalegamo aino atagu faeno uneno huꞌniye, huno huꞌniye.

¹⁹Huꞌniyaꞌmonanafa Isaleli vayaꞌmogimo Goti gemo oꞌafiꞌnafiye. Hogoteno Moseseꞌa hunoꞌaeꞌmo, Nagaemo magoke nofi vayaꞌmo oꞌmaiꞌnisaya vayapatiꞌmo alu nofi vaya alu nofi vayaꞌmo apavalesugetapaeꞌmo lapaipa kafamo hapaegae. Mono gemo oꞌafiꞌa negi nagi huꞌa neꞌmaiya vayapatiꞌmo apavalesugetapaeꞌmo lapaipamo legaiye, huno huꞌniye.

²⁰Henagaꞌamo Aiyeyaꞌa koli osuno huno haleno hapa painoꞌaeꞌmo, Nagaefeꞌmo kahauya nosaya vayaꞌmogimo nageꞌnae. Ge huꞌa nafi okeꞌnaya vayaꞌmo naipa nagesa aliꞌna apave liꞌnove, huno huꞌniye.

²¹Huꞌniyaꞌmonanafa Gotiꞌa Isaleli vayaꞌaifeꞌmo, Nagae gemo oꞌafiꞌa himuꞌnamu kavaꞌmo nehaya vayaꞌaitegamo yatala afinaꞌmo he tiꞌna maiꞌneꞌnaeꞌmo eyo, huꞌna huteꞌna nahakumo aliꞌna ataleꞌna maiꞌnove, huno hapa paiꞌniye.