1Ne Iesusa rɨpacrena laiplacar, aukna iro inikca aku toŋgorinanna, Raraŋ Aetaniaca Israelnandmo mac nda aŋgɨ, memetmbaca aku Raraŋ Aetaniacmo an reacna moca memetmbac ŋgoinna mbendeirena.
2Aku minmo matau ŋgoin ndamŋirena, ainda moca aku mina moca gainda waeke mbopnande, mina Raraŋ Aetaniacna toŋtoŋna kirara raŋgaina moca aiŋ wakikia morena. Na mina Raraŋ Aetaniacna toŋtoŋna kirar ŋgoinna mina matau lamŋi ŋgocor tik, mina ainda morena.
3Mina mba lamŋireke, Raraŋ Aetaniacna morena tɨpna kirara ma raŋgaica aimo meikramtaɨr wandoik ŋgacna, mina ndorimo ndorita gargar mbuŋa anna aiŋa moca ndorimo wandoŋ ndaruna ndoprena. Ainda moca mina ndorimo watcarica Raraŋ Aetaniacna kaŋgaukca mba eacrena, na ma minmo moi aŋgɨri, mina meikramtaɨr wandoik ndaru mbe.
4Na aia lamŋirena, Karais ma Tɨp Wandɨkna gargarmo, moa mairikrinan, na meikramtaɨra muruŋcamiŋa mana rɨpac te, mina Raraŋ Aetaniacna lamnɨacmo meikramtaɨr wandoik tarunande.
5Na Mosesa gan kammo tiratna, te, meikramtaɨra Tɨp Wandɨkna kirara raŋgairenan, na mina anmo mo te, Raraŋ Aetaniaca mimo meikramtaɨr wandoik ŋgacnande. Na ma aindopatna, “Ramootta Tɨpemb Wandikmo muruŋcamiŋa raŋgai te, ma eteacna wat aŋgɨnande.”
6Na ramootta rɨtɨpacna kirara raŋgaica Raraŋ Aetaniaca manmo ramoot wandoŋ ŋgac te, ma an kamma raŋgaiapekna, “Na ŋarikca ne ndorimo gaindop nari, ‘Mandaia ndo tamuŋna auŋ nagacit?’” Anna ne Karaismo mac nda aŋgɨra wɨkɨnna irikrina.
7“Na ŋarikca ne gaindop nari, ‘Mandaia ndo an memenacna meikramtaɨr tɨkrena taup ŋgirikit?’” Anna gaind, ne Karaismo muk iniknan mac nda aŋgɨra mac nda ŋgacatnan.
8Na an kamna mɨnɨŋ ŋgoinna gaind, “An kamma nena kɨtɨm ŋgoin maeacreke, na nena iroar inkar koind maeacreke, na nena upa maeacreke.” An kamma anna rɨtɨpacna kam, aia nenmo anna waekeca wiwitirena.
9Na u Iesusna kamma u up mbuŋa gainda waeke mbop te, ma Kacoot, na una iro inikca u rɨpacrina Raraŋ Aetaniaca manmo mukca tɨkca mac nda moa ŋgepatnanna rɨpac te, Raraŋ Aetaniaca unmo mac nda aŋgɨnande.
10Na aia ndorita iroar inkar puŋga rɨpacrenan, Raraŋ Aetaniaca aimo meikramtaɨr wandoik ŋgacnande. Na up mbuŋa aia ndorita rɨpacna kam ndopca waekerenan, na Raraŋ Aetaniaca aimo mac nda aŋgɨnandet.
11Na Raraŋ Aetaniacna timbigta kapca an reacna kamna kammo gaindopatna, “Meikramtaɨra mana rɨpaceknan, mina numbira mba moitndai.”
12Na Iudanandapa, Iudana meikramtaɨr wanaiŋmo aŋgɨra tumbunna tɨkca. Na Kacoot, ma aina muruŋcamiŋna Kacoot. Na man niŋgikca ndo meikramtaɨrmo muruŋcamiŋa matau ŋgoinna moreke, mina manmo ndori ŋgotacna digireke ma minmo otacrena.
13Ainda moca, “Meikramtaɨra muruŋcamiŋa Kacootmo ndori ŋgotacna digi te, ma minmo mac nda aŋgɨnande.”
14Na mina manmo rɨpac ŋgocor te, titoca tɨk te, mina manmo ndori ŋgotacna moca anna digiit? Na mina mana kam mbarac ŋgocor te, titoca tɨkca mina mamo rɨpacit? Na ramoot ianna an kamma wiwiti ŋgocor te, titoca tɨk te, mina an kamma waracit?
15Na mina kam wiwitina ramtaɨrmo mbagɨri ŋgocor ndacari te, titoca tɨkca ramtaɨra an kam wiwitiit? Na Raraŋ Aetaniacna timbigta kapca gaindoprina, “Meikramtaɨra kam wembaŋ laŋ aŋgɨra kɨprena ramootta watreke, mina toŋgorena.”
16Na Israelna meikramtaɨr wɨtta mina muruŋa kam wembaŋ laŋmo mba aŋgɨca raŋgaireke. Wanaiŋ. Na Aisaia ma gaindopatna, “Kacoot, mandaia ndo aia gan wiwitirena kambca waraca rɨpacit?”
17Na aia lamŋirena, aia Raraŋ Aetaniacna kam mbaracreke, anna ndo aina rɨtɨpaikca moa ŋgeprenan. Na an kamma aia waracatnanna, anna Karaisna kam.
18Na aku gainda diginande, ŋarikca mina an kam wembaŋ laŋa warac ŋgocor ki? Wanaiŋ. Mina waraca mamaiat. Na aia lamŋirena, “Gan tiacarpaikna meikramtaɨra mina muruŋa mina mbopatna upna kambca waraca maiatna. Na mina mbopatna kambca gan tiacarpaikna auŋembca muruŋa kocnaia taŋga mamairi.”
19Na aku kabena digdigi ianap. Na Israelnaŋgepca mina an kamna mɨnɨŋa lamŋi ŋgocor ki? Wanaiŋ. Mina lamŋirena. Out ŋgoinna ne Mosesa wiwitiatna an kambca ne an tamŋirena, na ma gaindopatna, “Aku an iremb kocorta ŋairemb teacrena ainta landamŋiar kocorta ramtaɨrta wiwitnan aŋgɨ te, na aku ainda mo te, nemo moi nikembkatca ne kaega monande.”
20Na Aisaia, ma toco an kamna moca ma kam gargar mbuŋa gaindopatna, “Meikramtaɨra mana moca mba orerenanna, mina manmo orea watrina. Na mana moca digi ore ŋgocorta meikramtaɨrmo, ma minmo raek ndaruatna.”
21Ainda moca Aisaia Israelnanta ndamŋica ma gaindopatna, “Ra, ra aku an kammo nda ipuŋreke, na kam mbarac narica morena meikramtaɨrta ndamŋica, aku ndona parniŋ aŋgɨra ŋgepca aku minmo ndo ndambuŋ nakɨpna moca, aca anna ndabirena.”
