Men Rom 10

1

2

3

4

5

6

7

8

9

10

11

12

13

14

15

16

¹RI ai kan, inong en mongiong i, o ai ngidingid kin irail ong Kot pan dore ir ala.

²Pwe ngai kadede parail, me re kin nantiong Kot, ap sasa tiak.

³Pwe re sasa pung en Kot, ap sosong kapwaiada pein arail pung, ap sota duki ong pung en Kot.

⁴Pwe Kristus kaimwisok pan kapung o; karos me poson en pung kila.

⁵Pwe Moses masanier duen pung en me pwili sang kapung o: Aramas o, me kapwaiada song pukat, a pan maur kila.

⁶A iet me pung, me pwili sang poson, kin inda: Der inda nan mongiong om: Is me pan daudala nanlang? Iet wewe: En wadido Kristus.

⁷De is me pan daudi wasa lol? Iet wewe: En wadado Kristus sang ren me melar akan.

⁸A da me a kin inda? Masan o me koren iong uk, a kin mi nan au om o nan mongiong om; iei masan en poson, me se kin padaki wei.

⁹Pwe ma koe pan kadedeki au om Iesus, me i me Kaun, ap poson nan mongiong om, me Kot kotin kaiasadar i sang ren me melar akan, koe ap pan doro kila.

¹⁰Pwe poson kin tapi sang nan mongiong o, pwen pung kila, o kadede kin tapi sang nan au o, pwen maur kila.

¹¹Pwe kisin likau me masani: Amen amen me pan poson i, sota pan soredi.

¹²Pwe sota irair eu nan pung en men Sus o men Krik, pwe Kaun en irail karos me ta men, me dir en kalangan ong karos, me kin likwir ong i;

¹³Pwe amen amen me likwir ong mar en Kaun o pan dore kila.

¹⁴A iaduen, irail pan likwirlang i, me irail sota poson? A iaduen, irail pan kak poson i, me re saikenta rong? A iaduen irail pan kak rong, ma sota saunpadak?

¹⁵A iaduen, irail pan kak padaki wei, ma re sota pan pakadarala? Duen a intingidier: Meid pai nä en me padaki rongamau en popol, me padaki rongamau en me mau kan!

¹⁶A kaidin karos me peiki ong rongamau. Pwe Iesaia masani: Maing, is me kamelele at padak?

¹⁷Ari, poson kin pwili sang padak, a padak kin pwili sang masan en Kot.

¹⁸A ngai me inda: Irail sota rongadar? O ei! Pwe ngil arail leler sap karos, o ar padak lel ong irair en sappa.

¹⁹A ngai me inda: Israel sota wewekier? Pwe iet kaieu, me Moses masani: I pan kasarowei kin komail, me kaidin nai aramas, o I pan kamakara kin komail aramas pweipwei kan.

²⁰A Iesaia kelail masani: Ngai me kadiarokada sang ren me sota rapa kin ia, o Ngai me pwara dong, me sota idok ia.

²¹A kotin masani duen Israel: Kaukaule I kapawei pa i kat ong aramas katiwo o kangudi kan.