Roma-satzi 10

1

2

3

4

5

6

7

8

9

10

11

12

13

14

15

16

¹Iyekiite, nokowi rawisakoshireyetai nosheninkapaini Israel-iite. Iro namanantaiyaariri Pawa.

²Niyotzi ithaamentashiwaitari Pawa, rantashiwaitawo te ikemathaperotzimaitawo.

³Te riyotaiyini ikowatzi Pawa rotampatzikashiretairi, te ikemisantzi, tema rithotyaakotashitawo intampatzikashiretantyaari apaniroini.

⁴Tema rithotyaakero Cristo Inintakaantaitakeri pairani, iri tampatzikashiretakagairiri ikaatzi awentaashiretaariri.

⁵Iriitake Moisés-ni osankenatakotakeriri rimonkaaterome Inintakaantaitakeri pairani intampatzikashiretantaityaarime. Jiroka ikantake: Inkaate monkaatairone, iri ñagairone rañaashireyetai.

⁶Te imonkatziyawo awentaashirenkantsi otampatzikashiretantatsiri. Te okowaperota impankenawaityaawo rimonkaatairo tsikarika oita. ¿Kantachama riyaate inkiteki pankenawaitachari ishintsineenteri Cristo rayiitantyaari isaawiki rowawisaakoshiretantairi?

⁷¿Kantachama riyaate sarinkaweniki rowiriintairi Cristo ikamawetapaintaga?

⁸Jiroka ikantaitake, rakaite: Piyoshiretakero ñaantsi, piyowaantetakero eejatzi. Kantakotachari jaka “ñaantsi”, irojatzi nokenkithatakotapiintziri awentaashiretaarira Cristo. Jiroka okanta:

⁹Arika piñaawaitero pinkante, “Nowinkatharite rini Jesús,” arika pawentaashiretanakyaari Pawa, iriira owiriintairiri ikamawetakaga, ari pawisakoshiretai.

¹⁰Awentaashiretaari, iro rotampatzikashireyetantairi. Añaawaitairo, iro rowawisaakoshireyetantairi.

¹¹Ari okantzi Osankenarentsipero: Inkaate awentaashiretaiyaarine, eero raminaashiwaitaawo.

¹²Onkantawetakya aakarika Judá-ite, aakarika Grecia-thatotatsiri, iri Cristo Awinkathariteta maawoini. Itzimirika amanaiyaarine, iriitake ineshironkatairi.

¹³Tema jiroka ikantaitake: Itzimirika amanaiyaarine Pinkathari, raakotairi iwairo, aritake rawisakotai.

¹⁴¿Kantachama ramanaityaari Pawa terika rawentaashiretaitari? ¿Kantachama rawentaashiretaityaari Pawa, terika ikemakoitziri? ¿Kantachama inkemakoiteri, tekaatsirika kenkithatakaantatsine?

¹⁵¿Kantachama inkenkithatakoiteri, tekaatsirika otyaantantatsine? Iro rosankenatantaitakawori, kantatsiri: ¡Osheki inkameethayitzite amerone kameethari ñaantsi risaikantaitari kameetha!

¹⁶Iro kantzimaitacha, te maawoini inkemisantaitero Kameethari Ñaantsi. Iro ikantantakari Isaías-ni: Pinkatharí, te ikemisantaitziro nokenkithatziri.

¹⁷Ari okantari. Ontzimatye inkemaitawakero riñaane Pawa ompoñaantyaari rawentaashiretaityaari.

¹⁸Nokantzi naaka, “¿Ikemaitakeroma?” Mataka, tema rosankenaitake kantatsiri: Ikenkithatakoitakero nampitsikipaini, Ikemaitakero maawoini kipatsiki tsikarika risaikaitzi.

¹⁹Napiitero nonkante, “Jirika isheninkapaini Israel-ni, ¿Ikemathaperotakeroma?” Iri Moisés-ni ooñaawontakerori rosankenareki, ikantake: Ari nonkantakaakyaawo pisamaneentyaari itsipasatzipaini atziri kaari sheninkatawakaachane. Osheki pinkisaneentashireteri piiyetziri “masontzishireripaini”.

²⁰Irojatzi ikantakeri Isaías-ni irirori: Iñaayetaana kaari kowakowatenane. Noñaagaari kaari aminaminatenane.

²¹Iro kantzimaitacha, ikantzitaka eejatzi Isaías-ni, ikenkithatakotakeri Israel-iite, ikantake: Nowaankawakowetashitapiintakari, temaita ikemisantaiyanani, piyathari rinaiyakeni.