ROMA 16

1

2

3

4

5

6

7

8

9

10

11

12

13

14

15

16

¹Ita taihuda Foibe e vasimu; ia na Kenkrea diakono hahinena ta.

²Lohiabada bagunai bavabia dae, ani, helaḡa taudia o abidia daemu na heto; bona ena ḡaukara ai ba durua. Badina be ia ese hutuma vada e durudia; bona lau danu eme durugu.

³Priskila bona Akula, Keriso Iesu bagunai lau ida a ḡaukara hebouva taudia, ba hanamodia.

⁴Idia na lau daigu ai mokona e mase. Lau ese na hanamodiamu; a dia lau mo, bese idau-idau edia ekalesia oreadia iboudiai danu.

⁵Bona edia ruma ai e heboumu oreana danu ba hanamodia. Na lalokau heniamu tauna, Epaineto, danu ba hanamoa; ia na anina roboana Keriso ena, Asia ai.

⁶Maria danu ba hanamoa; ia na umui daimui ai vada e hekwarahi bada.

⁷Varavaragu Androniko bona Iunia danu ba hanamodia; idia be lau ida dibura rumana ai e koumai bou. Haridia na bada aposetolo taudia bogaragidiai. Idia danu Keriso ena orea lalonai e vareai guna, lau be gabe ai.

⁸Amplia, Lohiabada bagunai na lalokau heniamu tauna,

⁹bona Urebano, lau ida a ḡaukara hebouva tauna, bona Staku, egu lalokau tauna,

¹⁰bona Apele, Keriso enai e gini tutukatutukamu tauna, iboudiai ba hanamodia. Aristobulo ena ruma taudia ba hanamodia.

¹¹Varavaragu Herodion ba hanamoa. Narakiso ena ruma taudia ba hanamodia; idia na Lohiabada ena orea taudia.

¹²Trufena bona Trufosa ba hanamodia; idia na Lohiabada ena orea hahinedia; Peresi, lalokau hahinena, ba hanamoa; ia na Lohiabada ena ḡaukara vada e heckwarahilaia.

¹³Rufo, Lohiabada ese e abia hidi tauna, ba hanamoa; ia sinana danu, natuna ai e halaogu hahinena, ba hanamoa.

¹⁴Asunukrito bona Flegon bona Hereme bona Patroba bona Herema, mai bamodia ida, ba hanamodia.

¹⁵Filologo, bona Iulia, bona Nerea, mai taihuna ida, bona Olumupa, bona helaḡa taudia iboudiai idia ida e nohomu, ba hanamodia.

¹⁶Ba hahenamo heheni; ba haherahu heheni. Keriso ena ekalesia oreadia iboudiai ese e hanamomuimu.

¹⁷Varavaragu e, heai taudia bona hekwakwanai ihavaradia taudia nahuada ba toho. Hahediba herevadia vada a henimui na idia ese e tata utumu; edia amo ba raka ohu.

¹⁸Taunimanima unuhetomadia na Keriso iseda Lohiabada isiaina asie lao henimu, a bogadia mo e lalomu; bona idia ese danu hereva manau bona ere namo amo asi dibadia taudia na e koidiamu.

¹⁹A umui emui haheauka harina na taunimanima iboudiai ese vada e kamonai; taunabunai, lau na umui daimui ai na moalemu. To lau na uramu umui na ḡau namodia ai ba aunega, ḡau dikadia ai ba kavakava.

²⁰Asi vanahana Maino Diravana ese Satana baine moia patapata umui aemui henudiai. Iseda Lohiabada Iesu ena harihari-bada ese baine bamomui.

²¹Timoteo, lau ida a ḡaukara heboumu tauna, bona varavaragu Luka bona Iason bona Sosipatro, hahaniosi ese e hanamomuimu.

²²Lau Teretio ese imagu amo ina revareva name torea: Lohiabada ladana ai na hanamomuimu.

²³Gaio, lauegu badiholo tauna bona ekalesia taudia iboudiai edia badiholo tauna, ese e hanamomuimu. Erasto, hanua monina inarina tauna, bona Koato, ekalesia tauna ta, ese danu e hanamomuimu.

²⁴Eda Lohiabada Iesu Keriso ena harihari-bada na iboumui ai emui ai baine mia. Amen.

²⁵Dirava aita hanamua, ia na mai goadana baine haginimui tutuka-tutuka, egu sivarai namo bona Iesu Keriso ena haroro herevadia heḡereḡeredia. Hereva hehunidia ihahedinaraidia heḡereḡerena danu, nega gunadia amo e hehuni,

²⁶a harihari vada eme hedinarai; noho hanaihanai Diravana ena hahegani dainai, peroveeta taudia edia buka ese bese loḡora ibuudiai vada e hadibalaidia, edia abidadama ihavarana.

²⁷Aonega Diravana tamona aita imodaia, Iesu Keriso bagunai; ia hairaina baine mia hanaihanai. Amen.