1Óo qiní qíkaqaafasaauqa Roomma máqusai máriasa. Qeeqá qímuqusa óokiqari qeeqá máqannaasa Isaraee máqannaasara Yísufinnai anirée miná asumu márirana máraaqeera firaaqóo qímuqusidanoo. Qinée Pauroosa misára Ánutufinnai firaaqóo innaaru qídaqa.
2Misá Ánutunara áidiranaki kéeqaranara rírafa firaaqóo márifaqa qinée níndafaunaqa sía ánoona íriranamau fída Ánutunara rídaqa, káqi rúnnambidaqa.
3Misá Ánutufa faiqí maréeqeenoo narí áfusaa andeeqára oosanaki quqáranara sía írimariafaqa náriqa kai nári fíroosana náriqá kai uqéerasee mi-maú fídaqa, sía Ánutuna andeeqáranaki fímaria óosana iriséeqa sía miná ámeemaanai kéeqaidaqa.
4Ánutuna ásauku mundírafa Mooseena sándufamau Ánutuna andeeqáranaki amanímariana áru taikéenoo narí Yísunasaa náaqoo rusímariasa kai Ánutuna andeeqáranaki kéeqaidaqa.
5Ánutuna andeeqára oosanaki faiqí finára maaqí qímasee Mooseefa ákara rinau. Faiqí moó fannoo ánaaqisaa fíndifunakiqari andeeqásee Mooseena sándufamau fídanoo sía moo kári áaqainafa ámiqisaa fínafa kúqinoo innaarúna asumu márirana máraannoo.
6Kafáa miná dínni ásauku mundírana saqárikiranannai asumu márirafa maaqímminoo máridanoo. Mooseefa kafáa minára maaqí qídanoo. Ínnee Mooseena sándufamau fímariasa fífau firaaqóo múnari mínari maríasa innaarúnai asumu máriranaki fíraree qímariasa. Ínnee innaarunái óoruree ásauku mundíranara randásee paqúrimasee áfiqee qumu dadaaqíanifee qímariana fífau sía amanaikímari ainainara fífau kadáapirumasee máree maríafanoo. Ásauku mundírafa dóo qumu márinoo. Ínnee fífau máqa ámeemaanai óoqu kéeqafi ásauku mundíranara paqúrimandee áfiqee múrusaifanoo mifá dadaaqíanifee qímariafanoo fífau sía amanaikímari ainainara fífau kadáapiri maríafanoo. Ásauku mundírafa dóo kúqiranakiqari fíndifinoo máridanoo.
8Ákara fannoo maasá ínni qímannimira ufara maaqí qídanoo. Ánutuna qímannimira ufa ínni naaqá máridanoo ínni nífaurusaa máridanoo ínni nímuqusaki máridanoo. Miqímmasee Mooseefa maasá faiqí ánaasee qímannimimari úfanara Yísunasaa írirana mundíranara qídanoo.
9Maaqí qímasee qímannimidaqa, anée aneenná áfaurunnai Yísufa kúqaa karaambáiqa máridanoo fee qímasee, aneenná ámuqusa óokiqari kúqaa Ánutufa Yísuna kúqiranakinaana uqéeranau foo qímasainanoo Ánutufa narí asumu máriranaki aní mara quqáannoo.
10Maasá qeeqá qímuqusannai Ánutuna andeeqáranaki fídaqa qeeqá qífaurunnai miná kooroo íranannai Ánutuna asumu máriranaki fídaqa.
11Tamummáqarausa ufa minára maaqí qídanoo. Ánutunasaa írirana rusírafa sía mi-rusiránarau kadóoparáannoo.
12Mi-ufána aiqámausara qídanoo Yuda máqannaa faqa ánaamuru faqa sía rainárafa máridanoo Ánutufa aiqámausa narí áarée maríasa dadaaqírafa máridanoo. Aiqámausa amana amana kái Ánutufa narí áarée maríasa firaaqóo naundurá márirana ámiqi ámiqimánnimaqáannoo.
13Tamummáqara fasiqa ákarakinaafa minára maaqí qídanoo. Aiqámausa karaambáiqa dadaaqíanifeera áaréemariasa misá Ánutuna asumu máriranaki fifáranoo.
14Náqimásee faiqí ánaasee karaambáiqara sía írirana minásaa rusímarinausa áareefaree sía amana áareefaranoo. Sía karaambáiqara írimariasa náqimándee fee írirana minásaa rusífaree. Moó fannoo óonu qímanniminaqa írifaranoo sía óonuree qímannimifaqa sía írifaranoo.
15Náqi fee máseenoo fee moó fannoo óonu qímannimiannoo fee moo áfeeqáseeqa miná áti uaqéeifanoo amaná óonu máridanoo qímannimiannoo. Tamummáqara fasiqa minára maaqí qímasee ákara rúmaqoofa máridanoo. Ámiqira fasaasa ufa máree ánimariasa ánirafa ámiqirafa máridanoo. Tamummáqara fasiqa miqí qímaqoofa máridanoo.
16Misá ámiqira fasaasa ufa míni qímannimisoofaqa sía aiqámausa íriqau akaqáusa kai íriqau. Eesaiaafa minára maaqí qímasee ákara rinau. Óo karaambáiqa maasá qímannimira ufa yáusee íriaa, akaqáusa moodáa kai íriaa. Eesaiaafa miqí qímasoofaqa qinée Pauroosa minára maaqí qídaqa. Faiqí ánaasee sía fífau káqi Yísuna saqárikidaqa, miná áufakiana náaree irisée miqóo Yísuna saqárikidaqa, Yísuna áufakiana sía fífau náaqooki kambíqaannoo, faiqí qímannimiafanoo náaqooki kambíqafifaqa saqárikidaqa.
18Qinée Pauroosa minára iráidaqa Yuda máqannaasa óoqaindari sía fee Ánutuna ufa írideeaa. Eeóo kúqaa misá íriaa, ákarakinaafa misára maaqí qídanoo. Misá úfa fannoo aiqáma maqa afaaqásasa Yuda máqannaa fímaruqoo dáraaninau. Misá ufa fannoo maqá dínni dínni ati múnu ráquraminau.
19Qinée Pauroosa kafáa iráidaqa, Isaraee máqannaa Ánutuna ufa íriqee iqau sía fee íriqau. Mooseena óoqai ákarakinaa ufa dauní qímaqimida maaqí qídanoo. Qinée Ánutusa qumeé Isaraee máqannaasa naundurái sáikiafanaqa fífau moo máqannaasara Ánutuna ufa íridammiafoo qímasaidaqa rairai qímannimaqaidaqa. Qinée Ánutusa qumeé fuki faakí qúnaqa fúrufárira máqannaasa qiní ufa irisáifaqa qiní faiqi námu Yuda máqannaasa miná qáfamasee mi-maqannáasara rairai qímasee dóo mi-rairai qiránannai nári faqa qiní úfa írifaranoo.
20Mooseefa miqí qímasoofanoo Eesaiaafa áranaiqi kooroomásee mi-furufarira maqannáasa ánaamuruara maaqí qinau. Qinée eedóo qímasaunaqa sía qiníara randéemaria fasiqa anaaseesa qiní Ánutusa paqúriqa. Sía qiní dáaree maríasa nífusaa qinée óonu kikíqiqa.
21Miqí qímaseenoo Isaraee máqannaasara maaqí qinau. Qinée faasaambáasaana ínni rafúsira rúnaqa ínnee ufa rukíeeqa káqirunna fímaria máqannaasa máridaqa rafúsiranara rufíee maríafanoo.
