ሮሜ ዓጮ'' ዓሶም 10

1

2

3

4

5

6

7

8

9

10

11

12

13

14

15

16

¹ታ ዒሾንሦ! ታ ሚሾንሦ! ታኣኮ ዒኖ''ይዳ ዓኣ ዼኤፖ ማሊፆና ፆኦሲ ታ ሺኢቃ ሺኢጲፃ ዒስራዔኤሌ ዓሳ ዻቃንዳጉዲኬ።

²ጎኔና ዔያታ ዔሩዋዖ ማዻኔ፤ ፆኦሲ ዛሎ'' ባኮ ዒናፓ ናሽካ ዓያና ዔያቶኮ ዓኣሢ ታ ታ ቶኦኪና ዔያቶኮ ማርካኬ።

³ፆኦሲ ዓሶ ፂሎ'' ማሂ ዛጋ ጎይፆ ዔያታ ዔሩዋዖ ዔያታ ፔኤሮ ፂላ''ኒ ኮዒፆና ፆኦሲ ፂሉሞም ዓይሢንቲባኣሴ።

⁴ዓሲ ቢያ ኪሪስቶሴ ጉሙርቂሢና ፂላ''ንዳጉዲ፥ ሙሴኮ ዓሶ ዎይሦ ዎጋ ኪሪስቶሴና ኩሜኔ።

⁵ዎጎ ኩንሥሢና ጴዻ ፂሉ''ሞ ዛሎ'' ሙሴ ፃኣፔሢ፦ «ዎጎ ኩንሣሢ ቢያ ሼምፔና ናንጋንዳኔ» ጋዓያኬ።

⁶«ኔኤኒ ዒኖና ‹ፔቴ'' ዓሲ ኪሪስቶሴ ኬይሳኒ ሌካ ጫሪንጮ ኬስኮንጎ› ጌዒፖ፤» ሃሣ «ኔ ዒኖና ‹ፔቴ'' ዓሲ ኪሪስቶሴ ኬሳ''ኒ ሓይቄ ዓሳ ዓኣ ቤዞ ኬዶ''ንጎ› ጌይፖ» ዬይ፦ ኪሪስቶሴ ሓይካኬ፤ ፆኦሲ «ፂሎ''ኬ» ጌይ ዛጋ ዓሳ ያዺ ጎዑዋሴ።

⁸ሓሣ ጊንሣ፦ «ፆኦሲኮ ቃኣላ'' ኔኤኮ ኮይላ''ኬ፤ ፔቶ'' ሃሣ ኔኤኮ ዻንጎና ዒኖናይዳኬ» ጌይንቲ ፃኣፒንቴኔ። ዬይ ቃኣላ'' ኑኡኒ ኬኤዛ ጉሙርቂፆ ቃኣሎ''ኬ።

⁹ዬሱሴ ጎዳ ማዔሢ ኔ ዒኖና ኔ ማርካዺ ፆኦሲ ዒዛ ሓይባ''ፓ ዔቂሴሢያ ኔ ጉሙርቄቶ ዻቃንዳኔ።

¹⁰ዓይጎሮ ጌዔቴ ዓሲ ፔ ዒኖና ጉሙርቂ ፂላ''ኔ፤ ፔ ዻንጎና ማርካዺ ዻቃኔ፤

¹¹ዬይያ፦ «ዒዛ ጉሙርቃሢ ቢያ ቦርሲንቲንዱዋሴ» ጌይንቲ ፃኣፒንቴሢጉዴያኬ።

¹²ዓካሪ፤ ፔቴ'' ፆኦዛሢ ቢያሢኮ ጎዳ ማዔሢሮ ዓይሁዴ ዓሶና ዓይሁዴ ማዒባኣ ዓሶና ባኣካ'' ዱሙሞ ባኣሴ፤ ዒዚ ኮሺ ፆኦሲ ማዔሢሮ ሺኢቃዞንሢም ቢያ ዻቂንቶ ዓንጆ ሚርጌና ዒንጋኔ፤

¹³ዓይጎሮ ጌዔቴ ጌኤዦ ማፃኣፖይዳ፦ «ጎዳ ማኣዳ''ንዳጉዲ ዔኤላ''ሢ ጉቤ ዻቃንዳኔ» ጌይንቴኔ።

¹⁴ጋዓንቴ ዒዛ ጉሙርቂባኣታዖ ዎይቲ ዔያታ ዔኤላ''ኒ ዳንዳዓይ? ሓሣ ዒዛ ዛሎ'' ዋይዚ ባኣዖ ዎይቲ ዔያታ ጉሙርቃንዳይ? ዔያቶም ኮዦ ሓይሶ ቃኣሎ'' ኬኤዛ ዓሲ ባኣንቴ ዎይቲ ዔያታ ዋይዛኒ ዳንዳዓንዳይ?

¹⁵ጌኤዦ ማፃኣፖይዳ ኮዦ ሓይሶ ቃኣሎ'' ኬኤዛዞንሢ ኬኤዞም ዳኪንቲባኣያታቴ ዎይቲ ዔያታ ኬኤዛኒ ዳንዳዓንዳይ? «ኮዦ ሓይሶ ኬኤዛ ዓሶኮ ቶካ ዎዚጉዴ ኮሺዳይ?» ጌይንቲ ፃኣፒንቴሢጉዲኬ።

¹⁶ጋዓንቴ ፆኦሲ ማሊፆ ኬኤዛ ዒሲያሴ፦ «ጎዳሢዮ! ኑኡኒ ኬኤዛ ቃኣሎ'' ዖኦኒ ዔኬይ?» ጌዔሢጉዲ ቢያሢ ኮዦ ሃይሶ ቃኣሎ'' ዔኪባኣሴ።

¹⁷ዓካሪ፤ ኪሪስቶሴ ጉሙርቂሢ ጴዻሢ ኮዦ ሓይሶ ዋይዚዳፓኬ፤ ኮዦ ሓይሳኣ ኪሪስቶሴ ዛሎ'' ኬኤዛሢኬ።

¹⁸ሂንዳ ታ ሂዚ ጎዖም፤ ኮዦ ሓይሶ ዔያታ ዋይዚባኣሴ ጌይሢዳ? ጌኤዦ ማፃኣፖይዳ፦ «ኮዦ ሓይሳ ዓጮ'' ቢያይዳ ኬኤዚንቴኔ፤ ዬይ ዑኡዛ ዓጮ''ኮ ጋፖ ሄሌ''ኔ» ጌይንቲ ፃኣፒንቴሢጉዲ፥ ጎኔና ዒስራዔኤሌ ዓሳ ዋይዜያኬ።

¹⁹ሓሣ ዒስራዔኤሌ ዓሳ ኮዦ ሓይሶ ዔሪባኣሴ ጌይሢዳ? ዬይ ያዺ ጌይንቱዋጉዲ ሙሴ ሃያኮ ቤርታ፦ «ቦሂንቴ ዓሶ ዓሲ ማሂ ‹ዎይቲ ዔያታ ኑጉዲ ማዔይ› ታ ዒንሢ ጌይሲሳንዳኔ፤ ዔኤቢ ዔሩዋ ዓሶ ዔርዚ ታ ዒንሢ ዻጋሳንዳኔ» ጌዔኔ።

²⁰ፆኦሲ ማሊፆ ኬኤዛ ዒሲያሴ ሓሣ፦ «ታና ኮዒባኣሢም ታ ጴዼኔ፤ ‹ፆኦሲ ዓንካዳይ?› ጌይ ታና ዖኦጪባኣዞንሢም ታ ፔጋዺ ጴዼኔ» ጌዒ ጫርቂ ኬኤዜኔ።

²¹ጋዓንቴ ዒስራዔኤሌ ዓሶ ዛሎ'' ኬኤዛዖ፦ «ዓይሢንቱዋ፥ ዒፃ ዴሬ ታ ባንሢ ሙካንዳጉዲ ቢያ ዎዴ ኩጮ ታ ቤኤዜኔ» ጌዔኔ።