Rom 10

1

2

3

4

5

6

7

8

9

10

11

12

13

14

15

16

¹Erau lala, nemloge piowagan nap̃a kiau lus ruru nena lala, sa nap̃a le Yu lala, pe amlelaga re poli. Ana sineun manene nesape monar atol natamaliaena, nane nesum̃a nemlen manene ke pa Ntewa vanon la ne.

²Asum̃a ap̃ikeyon nap̃a akale Ntewa e kiela malena, ana nepisa lelaga, amninue mrapa, yoko tap̃atete alualia.

³Nanene komin ga nap̃a asum̃a ataveve ke ga kiela sitomena lala, ana yepela mavin taveveen mrapa nap̃a Ntewa miyum̃aenia vena kilaen yaru imi mesmesu sina e marana.

⁴Asum̃a am̃areran ke ga nap̃a asape nalogearen ga navisaluaena naga pe mrapa, ana mrapa nene piowa rui, komin nap̃a ita make ga tekilaro navisaluaena lala. Mrapa nap̃a tesape temesmesu temio Ntewa komin nap̃a temlogear navisaluaena, Kristo suwo rui, a naga miyum̃aen kieta mrapa viu tai. A nagane, visae telelaga tevisave Kristo p̃ar plan kieta mlamulen viowa lala, ana Ntewa kilia kila ita teim temesmesu e marana.

⁵Visae ve tekilaro re navisaluaena, yoko woga ga, tekilia teim temesmes e marana Ntewa komin nap̃a temlogear navisaluaena, komin Mosis pisa visena tai e lepas nene rui, pisape “Yaru nap̃a taveve ruru sur make ga nap̃a navisaluaena nene pisa, yoko tol malena.” Ana pe yar re tai nap̃a kiena malena po sa nap̃a Mosis pisa poli, ana tap̃atete tetol malena kome kieta yum̃aena wo la nap̃a tekila.

⁶Nakilaen sanene, naga m̃arera pap̃isi, ana visae telelaga ga e Kristo tekilia teim temesmesu e marana Ntewa, a naga pe pe sur re tai nap̃a m̃arera poli. Sane visena tai nap̃a Mosis pisa, nap̃a pisape “Pe pon re asitom avisave sur nene m̃arera pap̃isi, ana asum̃a aviuviun avisave ane yoko kilap̃esan mrapan ita vena vaen ma e peni?” Naviunena nene kana kinasa sape ane kilia va tol ma e peni were Kristo vitom tano e nini vena tamalia ita, ana sitomena na sanene piowa ga.

⁷Pona aviun naviunena tap̃ena nap̃a sike e Nasiriena Wa la yo, nap̃a sape “Ana ane kilia vito tano vito tol yo kiena yar mare lala ana wasup̃e sina?” Naviunena nene, kana kinasa asitom sape Kristo mare e lak torovia, ana naga m̃ena ga pito sike e lelen marena, ana asitom asape tap̃atete yar tai kilia vito si werelua naga e yo nene vena vam tamalia ita, ana tekilia tesape visena la nene pe po re poli. Tekilia ruru rui tesape Kristo molue ma e peni pitomi tano rui, a siraunia mare, p̃isi na naga sum̃alu mal sina a pa si ma e peni rui.

⁸Visae ve sanene, tekilia tevisatam̃e naviunena la nene, tevisa visena tap̃ena nap̃a Mosis pisa nanua sumo, nap̃a pisa pisape “Visena kiena ne Ntewa nap̃a pan ita ita yeririna lala sike amio ita rui. Sike e limata, ana tekilia teligan se gota, tekilia teligan ruru se kieta sitomena lala.” A visena kiena ne Ntewa nap̃a visena nene pisayuia, nane Lologena Wo nap̃a mesum̃a melologon ke ne, nap̃a pisawal ke sape yar lala monar alelaga e Yesu Kristo.

⁹A ko ai nap̃a olelaga e Yesu Kristo e losinem̃a, ovisave Ntewa naga kila naga mal si petan marena, a okekaran nap̃a ovisawal e yo metava ovisave omla Yesu pe kiom̃a Sup̃e, yoko otol malena.

¹⁰Nanene komin nap̃a visae yar nap̃a lelaga e losinena visave Yesu naga mal sina petan marena, a visawal e yo metava visave Yesu naga pe kiena Sup̃e, yoko Ntewa ve la re si nakoaena vania komin kiena mlamulena viowa lala, yoko tamalia naga.

¹¹Naga nene sane visena tai na Siriena Wa, nap̃a sane pisayu nap̃a temlelaga e Kristo, nap̃a pisape “Yaru nap̃a mlelaga ea, naga tap̃atete kiena sitomena loru pog tai.”

¹²Yaru nap̃a mlelaga naga pe Yu yo, pona naga pe pe Yu re poli, ana Sup̃e naga taaga pe kiela sup̃e la punu ga, kila make po pan la nap̃a atag ke pania.

¹³Naga sane visena tai nap̃a Navisawalena Soel siriyu nanua sumo, nap̃a sape “Yaru ai nap̃a vio kia kiena Sup̃e, yoko tamalia naga.”

¹⁴Ana lelaga, le Yu la mok liu nap̃a pe apio re Kristo asape tamalia la poli, ana sanape na sanene? Nanene komin tap̃atete avio naga visae ve alelaga re ea, a tap̃atete alelaga ea visae ve alogeli re kiena kia pogos tai, a tap̃atete aloge kiena kia visae ve yar va lologon re van la.

¹⁵A tap̃atete yar va lologo visae Ntewa ve ligan lua re naga vano, ana visae yaru nene kekaran nap̃a vano, yoko ve sa nap̃a Siriena Wa pisayu rui, nap̃a sape “Potena pap̃isi pa Ntewa nap̃a kiena nalologena lala, temloge la amial tam̃in ke ava e kiela mraplepa la ne, asum̃a apava ke amio kiena lologena wo.”

¹⁶Nane visena nap̃a yar lap̃as asum̃a apisasa, ana nekilia nesape Peraga, Ntewa sum̃a pitetalia kiena nalologena lala apava ke rui, ana piowa pap̃isi nap̃a le Yu la mok liu yepela mavin ga logeena. Nanene taveve ke sina ga visena na Siriena Wa tai, nap̃a Navisawalena Aisea tagi pa Ntewa na mava, sape “Ake Sup̃e, mesum̃a memlologon m̃a kiom̃a visena pano-o, ana sane yar la yepela mavin ga logeena.”

¹⁷Ana nagane imimi sanene, mesum̃a memlologon ke Yesu Kristo pan la, a pogos nap̃a mesum̃a memlologo, lap̃asa amloge, a pogos nap̃a amloge, lap̃asa amlelaga.

¹⁸Nane nesum̃a nemlologon ke pa le Yu la ne, ana yoko naviunena tai kilia kate e nene, sape Pona osum̃a omlologon ke pan la sanene komin nap̃a ositom osape pona la pe amloge re ya nap̃a Siriena Wa pisayu poli yo? Ana yoko nevisatam̃ea nesape, Peraga, visena kiena ne Ntewa tol la nakonua rui. La make ga akilia maran taaga torokin ke nap̃a la make ga apisu ke mrae amio kupario a verue lala, sa ke ga nap̃a visena tai e Tus na Yauena pisayuia, pisape “Yeririna make ga na yomarava nini wetelu apisu sur la meta e sinapane, a apisu kilalea sane Ntewa sike na, pano-o tol yeririna la e yo la nap̃a asike koperina, la m̃ena apisu kilale asape kiena m̃areraena keviu pap̃isi.”

¹⁹Sanene, sane le Yu lala apisu kilale sur mokliu rui, ana sur viowa tai, la asitom asape Ntewa tamalia la ga yo. A pe apisu kilale re asape Lologena Wo naga kiena yar make ga, komin Ntewa sinenan sape tamalia m̃ena yeririna la nap̃a pe ape Yu re poli. Ana popon avisu kilale sur nene, komin kiela navisawalena marua lalua apisayu nakonua rui e Siriena Wa lala asape yoko ve sa nene. Mosis p̃esa, nap̃a pisayu visena tai nap̃a Ntewa pisa pa le Israel lala, nap̃a sape “Apisu piowa e la nap̃a pe ape Yu re la poli, sa nap̃a la ape sur korena ga, ana yoko amiu avielue e navisa ruruena la nap̃a yoko nekila van la. Amiu asitom asape tap̃atete la nene akilia akila sur wo tai, ana yoko sinemiu kari la e pogos nap̃a amiu avisu netamalia la m̃ena ga.”

²⁰A nalua nena, naga Navisawalena Aisea, naga m̃ena sum̃alu pisawal nena visena tap̃ena si tai kiena ne Ntewa e marana kata apua ita le Yu lala, nap̃a Ntewa pisayu la nap̃a pe ape Yu re poli, pisa pisape “Nanua sumo, pe akale in re poli, ana siraunia, yoko atam̃an inu, nanua pe apiunin re poli, ana yoko siraunia, sinelan asape neva nakaten la.”

²¹Ana Aisea siri plan tap̃enan sina visena kiena ne Ntewa tai, nap̃a Ntewa pisayu la nap̃a pe ape Yu re poli, pisape “Yar la nene asum̃a amlogelu inu, asum̃a akovenlua inu silaga. Nakonua rui nepikep̃a ga lum̃au pan la, sineun nesape awasup̃ela aimi si pun inu, ana la na peraga narui.”