Text copied!
CopyCompare
Bab-Dummad-Garda-Islidikid - Proverbios

Proverbios 18

Help us?
Click on verse(s) to share them!
1Dule-na-eginbi-binsaedi, unnila egarbi ibmar-nued abeged, dule-ega-binsaed-nued-ukeddi, abesulid.
2Dule-binsaedsulidaedi, magar-ibmar-itoged baisur-daked, unnila e-ibmar-sogedgi na san-odummodiid.
3Ibmar-isgana-imaklegedgine, dule-sae-dakleged nononidaed. Bingegulegedba-mai dule-nug-gagaleged danidaed.
4Dule-e-gayaburba, dii-wiladyob gued. Diwar-iirmakemaiyob egi binsaed-nikagued ainimaid.
5Dule-ibmar-oakalosad ibmar-oakalossuliyob-imakedi, ibnuedsulid. Dule-ibmar-oakalossulidga ega igar-innikigwad-imaksulile, ibnuedsurbalid.
6Dule-binsaedsulidaed-e-sunmakedi, unnila neg-urwed onoged, e-sunmaked emarga urwed-amied.
7Dule-binsaedsulidaed e-sunmakedgi na dukin san-wioged, e-sunmaked na dukin egi aibinega-imaked.
8Gakangi-sunmaklegedi, mas-nued-gullegeyobid. Gakangi-sunmaklegedi, ulubse uboged.
9Dule, e-arbaedgi nue-arbasulile, dule-ibmar-ogiloged-e-sordaga gued.
10Bab-Jehová-e-nug, neg-matusulid-gandikid-geg-ayaredyobid. Dule, bendakleged-amiegala, a-negse abarmakdedaed. Bab-Jehová-e-nug dule-innikimaladga deyob gued.
11Igi neggwebur-e-akwa-galu-matusulid-ebirnai, mani-ibmalad na deyob e-ibmar-nikad egi ebirnai itoged. Degisoggu, gwen akar-guosuliyob na binsamalad.
12Dule, ibitoged-idu, e-daed bule-bule na san-oyoged. Dule, e-nug-ogannoleged-idu, e-daed na san-bipii oyoged.
13Yogasaar gwen ibmar-itossuli-emar-abinsaele, binsaedsulidalegedid, dule-emar-obingeg-saedid.
14Dule-uelleged bonigan-itomaidgi niga-gandikgudele, gwae nugudoed. Ar dule-uelleged niga-batismaile, ¿adi, igi nuguosunna?
15Dule-itoakwaadaed ibmar-nuegan baramied. Dule-binsaed-ibed gatik ibmar-wisgued-nikuegala, nue ibmar-itodaed.
16Ibmar-binsa-uklegedba belagwable yawagakmar argaed, abali, dule-dummaganse warmakleged.
17Dule-na-e-inse-san-bendakedi, e-ibmar-sogedi, e-gussuliyob sunmaked. Geb dule-baid-ebo-boni-nikadi, sorba ibmar-sognonimogale, akar egi sunmaknonimogoed.
18Ibmargi-wilubdaklegar-imakleged igar-apurnaid nabir nudaked. Dule-gandikidga, dule-gandikid-baidbo boni-nika-gunair, nabir ega igar-nudakbalid.

19Neggwebur-e-akwa-galu-ebiris-bukwad-earedba bur undarad, gwenad-oululesad-e-gwage gadi-gadi-imaked. Neggwebur-yawagak-geg-argaedba bur undarad, gwenadgan-na-muchub-muchub-urwemalad walikaa-gudigued.
20Dule na e-sunmakedba yeer-itodiid, na e-sunmakedba immee gudiid.
21Sunmaklegedgine, burba-dulad maid, burgwed-igar maibalid. Dule na e-sunmakedbali, e-igar abingaoed.
22Dule ome-nikunonikile, ibnued nikued. Bab-Jehová-egi-nued-binsaed ega oyoleged.
23Dule-wileged wilesakwaa ibmar egised. Dule-mani-ibeddina, sabsur dule-abin-imaked.
24Dule, aimar-nikale, aigwar guergebed. Abar-aimar nikad, gwenad-gargwenadba bur bule walikaa daed.