Prabebs 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Wal det sabibala tok dijan, “Main biginini, yu len wanim mi titjimbat yu. Yu garra oldei jinggabat wanim mi oldei dalimbat yu blanga dum.

²Yu garra lisin langa ola brabli gudwan wed en trai blanga sabi detlot ting.

³Yu garra kipgon askimbat mi blanga meigim yu jidan sabibalawan.

⁴Yu garra wek brabli adbala blanga jidan sabibala, jis laik wen yu go lukabat blanga silba o gol, en yu kaan gibap, najing.

⁵If yu dum lagijat yu garra sabi en shoum rispek langa YAWEI det trubala God en yu garra sabi mowa blanga im.

⁶Oni YAWEI na garra meigim yu jidan sabibala, en album yu blanga sabi mowa.

⁷Im na oldei maindimbat en albumbat detlot pipul hu oldei dum wanim rait en jidan trubalawei.

⁸Im na oldei maindimbat detlot pipul hu oldei gibit feyago langa najalot pipul en im oldei maindimbat detlot pipul hu oldei jidan trubala langa im.

⁹“Wal if yu dum lagijat yu garra sabi hau blanga jidan trubalawei en gibit pipul feyago, en hau blanga jidan raitwei.

¹⁰Yu garra jidan sabibala en yu garra jidan brabli gudbinji wen yu sabi brabliwei.

¹¹Detlot brabli gudwan wed garra seibum yu en album yu nomo blanga dumbat eni nogudbala ting, en im garra seibum yu brom detlot pipul hu oldei toktokbat nogudbalawei blanga yu.

¹³Olabat bin stap dumbat ola rait ting. Dei oldei dumbat ola nogudbala ting jis laik dei wok langa brabli dakbala pleis.

¹⁴Olabat oldei laigim dumbat ola nogudbala ting en olabat gudbinji blanga dumbat detlot nogudwan ting.

¹⁵Yu kaan trastim olabat dumaji det wei blanga olabat nomo trubalawan.

¹⁶“Wal detlot brabli gudwan wed garra album yu blanga gibit bekboun langa eni tufeis gel weya tok garram brabli switwan wed langa yu.

¹⁷Det gel nomo jidan trubala langa im hasbin. Im fogedabat det pramis weya imbin meigim lida langa God.

¹⁸If yu go langa im haus, wal yu garra dai dumaji im jis laik yu wokwokbat langa det nogudwan roud langa det pleis weya ola dedbala pipul oldei jidanbat.

¹⁹Nobodi kaan go langa im haus en kambek laibwan brom det pleis.

²⁰Bat yu garra bulurrum det wei blanga ola sabibala pipul en jidan gudwei.

²¹Detlot pipul hu oldei jidan trubalawei garra jidan langa olabat kantri.

²²Bat detlot nogudbala pipul hu oldei dumbat nogudbala ting, wal God na garra andimwei olabat brom olabat kantri.”