Luka 8:9-32

⁹Eme motecfâcne jaŋe kesaic dâŋ irec fuŋnere wiocnepie jazawec:

¹⁰“Anuture uucmaŋko raraʒire dâŋ soŋne i ŋoŋe mananiŋte mukicne, gâcne jaŋe ine kesaic dâŋ mananʒepieŋ. Ehuc ʒâŋe fiipiehuc wiac mi hone taranʒepieŋ â hazeczi dâŋ mana‐bipiehuc fuŋne mi mana taranʒepieŋ.

¹¹Kesaic dâŋ mupac irec fuŋne ine ʒiŋuc: Anuture dâŋzi hândâŋ ekac.

¹²Hândâŋne hatao hewec sâc iŋucne juniŋmu jaŋe miti manapie maŋjeŋicko huhame izia, mana ʒakierâ juju bâfuanʒipiŋte Sataŋzi fisi ro bawiseekac.

¹³Hândâŋne qânâ siecko hewec sâc iŋucne juniŋmu, jaŋe miti manarâ izia aŋac‐jopaocmu. Eme maŋjeŋicko gâtâ mi bakicnere dameŋ bembeŋne mac bajuhapie eesâic fuame miti râpeckeeŋgopieŋ.

¹⁴Hândâŋne hofâ qinʒiŋko hewec sâc iŋucne juniŋmu, jaŋe miti mamana i mananiŋmu, erâ sahackopec wiac irec mamaŋ gugutuŋ jupie moneŋ mafa mâriri irec aŋaczi miti hehâmome fârimâc eekac.

¹⁵Hândâŋne mâreŋ guecko hewec sâc iŋucne juniŋmu, jaŋe miti manarâ maŋjeŋic emasaŋkerâ aimuŋ bajueŋgopieŋ, ehuc ɋic wânʒâŋ erâ fârine bâfuaeŋgopieŋ.

¹⁶“Mo ŋiczi lambe qazerâ kuʒizi hetutuckeocmu, me ŋeŋe rurumaŋko heme ŋeocmu? I aricne, lambe i ŋeŋe‐ticnao hepene ŋehuc fic maŋne âke tamaeme ŋic jaŋe sâcne honehuc feniŋmu.

¹⁷Wiac soŋsoŋ fokac i foku mi foocmu, i bataniŋkezo, â wiac hemackekicne fokac i foku mi foocmu, i qaratiezo, eme fuŋne jaŋgeŋkeocmu.

¹⁸Moc e wiac râcnekicne bajume kiqecnecnezo, â moc e wiac râcnekicne burec burec bajume jâoc rofârezo. Irec ŋoŋe miti hazec uruc jaha manapaŋkenʒepieŋ.”

¹⁹Dameŋ mocko ŋic guru sâko Jesu orâŋkerâ domahapie neŋgoc ɋafâc‐ticne warerâ ŋic jaŋerao quŋkerâ taic domambiŋ.

²⁰Iŋuc epie ŋic moczi honec‐joparâ Jesu ʒiŋuc âzâcnewec: “Neŋgoc ɋafâcge honecguniŋte juwic hae ʒoŋao domaŋgopieŋ.”

²¹Mume Jesuzi ŋic ʒiŋuc jazawec: “Anuture dâŋ manarâ reŋkeeŋgopieŋ kecʒizi neŋgoc ɋafâc‐nane eŋgopieŋ.”

²²Ʒoaŋ mocko Jesu â motecfâcne wokeo fembiŋ. Wokeo ferâ ʒiŋuc jazawec: “Nâŋâc riqic fotâcnerâ ocniŋuc raʒinaŋ.” Mume manapie rambiŋ.

²³Rahuc Jesu guŋte ecneme waha fowec. Fohame mâŋâŋ hâhâwicne qame riqic sâqoreme sirizi wokemaŋko hume riqicko huzo embiŋ.

²⁴Eme Jesu wiwickerâ ʒiŋuc âzâcnembiŋ: “Qaqazu, qaqazu, nâŋe riqicko huzo eŋgopeneŋ.” Mupie fahare mâŋâŋ â siri dâŋ mujacteme niniŋkepire benoŋ bawec.

²⁵Eme ʒiŋuc jazawec: “Ŋoŋe mamanasiŋ‐ŋeŋic weni.” Motec jaŋe ine wiac i honerâ tuc ŋeŋe farac erâ mumbiŋ: “Opo, e mo ŋic mo, irec mâŋâŋ â siri dâŋ jasame reŋkekopirec.”

²⁶Eme raku riqic fotâcnerâ Galilaia mâreŋ ŋifecnao Gerasene ŋic jaŋerao fisimbiŋ.

²⁷Ira fisirâ tiŋko feme haeonec ŋic moc warewec. Ŋic ere maŋko demoŋ bocjaha jupie dameŋ ʒora ŋaqi mi rojuwec â ficko mi fojujec. E mâc ʒâŋeruŋ gieo sasawa qac qâsoric juwec.

²⁸Eme Jesu honerâ owackerâ mâreŋko rândiŋke qa erâ dâŋ hahaŋne bahuc ʒiŋuc muwec: “Jesu, go Anutu femicne sâkore Ŋokâzi wemocte norao warekomec? Go ʒâic gie mi mac narezemec.”

²⁹Jesuzi “demoŋ go ŋickonec wefu rac” mume iŋuc hâcne âzâcnewec. Demoŋ e dameŋ ʒora ŋic maŋne bâpuriŋkeme momori eme ŋic jaŋe me kikene qarâ soŋaŋ‐ticne jumbiŋ. Eme demoŋzi ecneme repa hetâc qâtâcnerâ tuhuo wiserâ rajujec.

³⁰Eme Jesuzi wiocnerâ muwec: “Ʒâŋege mo?” Wiocneme muwec: “No ʒâŋe‐nane Gurusâko.” Demoŋ bocjahazi ŋicmaŋko jumbiŋ irec.

³¹Eme jaŋe Jesuzi hârâcko sorec‐jopame hunʒipiŋte mu wâwâsic ecnembiŋ.

³²Eme mâreŋ ira bec guru sâko qondaŋ gieo jumbiŋ. Irec demoŋ jaŋe mana‐jareme becmaŋko huniŋte âzâcnembiŋ.