LUUKA 8:9-32

⁹Dhali ki imanciḵ a’di gwo doṯki a’di gwo mo gom ’pemen gi gwom ’bi’th/e yan ta’da ta mo tani

¹⁰a’di ki o uni gwo mo ki: E um mo tani um c̱ikunu gwo mo mmomish gwo jin c̱inu ki jim bag mo gom Bampa/ ma Arumgimis mo, hili gom unin tiya mo tani uni ṯoru ki jim ’bi’th/e mo, wakan ki uni gwansan kun mishi mo mo tani mini ’koki mish mo mo dhali uni kun ciḵki gwo mo tani uni mini ’koki mish gwo ’ban mo be.

¹¹Gwom ’bi’th/e a’di a’dihe/ mo be: Aḵa’bany to a’di ta gwo ma Arumgimis mo be.

¹²Dhali unin tiya kun biṯkin mo e bway tur mo tani uni ita uni gwansan kun ciḵki gwo mo. Yan’ko’d tap̱a ma ruma ’cesh p̱u’dki’d mo dhali ’do gwo ’pena dum buni mo ki uni mini ’koki gam gwo is mo dhali ki uni minu ’koki woṯẖ mo be.

¹³Dhali unin tiya kun biṯkin mo e mowosh mo tani uni ita uni gwansan, ki uni ciḵki gwo mo tani bu’th a’di ki bwaŋ ’kunyu’d mo hila/. Hili uni gwansan idar ga birman mo. Uni gam gwo is mo ari’ceenne/ mo dhali ki mo p̱u’dki’d jin paluwa pal mo tani uni ṯa’kkin mo be.

¹⁴Dhali gom uni gun biṯkin mo e bwam ma ’de/ mo tani uni ita uni gwansan kun ciḵki gwo mo hili ki uni iikin mo e bway buni mo tani uni koṯẖa to gun noni ’twa/ mo dhali mo jin tanu pa gi pa mo dhali to kun se ’kwani ki ’pen mo e moŋ’ko mo, dhali maman buni ’koki is mo be.

¹⁵Dhali gwo gom uni gun ṯa’kkin mo eya ’cesh kun ’bora’bor mo tani uni ita uni gwansan kun ciḵki gwo mo mmodhu uni ki ’bore/ mo ka duŋ gana/ mo dhali ka dum ’borga/ mo dhali uni ki dho’th maman ki mo jin ’kuc̱u/ bwa mo ki ’kari’th mo be.

¹⁶Wathiŋ kamu/ diki c̱itha lamba/ mo mmokum a’di ’kup̱ ki ’kwa mo walla mmokar a’di e bwaŋ ’kwariny ma ci mo, hili a’di ki kar a’di ap̱o/ ṯirkina/ mo ki uni gwansan kun cic̱ki gu’b mo tani mini p̱ar moŋkush e mo be.

¹⁷Haali/ toŋ kamu/ yisa baguwa jin minu ’koki ṯor eya tente/ mo walla jin ’dap̱u ’kup̱ mo jin minu ’koki mish mo dhali guyu/ ki moŋkush mo.

¹⁸Hil ki ’bore/ mo ma, gwo jin ciḵa um mo. Haali/ a’di jin ta’d gi to mo tani a’di minu c̱i ki nyanye/ mo dhali ’peni a’di jin dara’d mo tani to jin ṯosha a’di jin tana a’di mo tani minu bu’th ’peni a’di mo be.

¹⁹Dhali yan’ko’d kum dhali ikam piti uni p̱u’dkin ’kup̱ ki a’di mo dhali hili uni ’koki ’dish a’di is mo goma waambuhany ’kwani mo be.

²⁰Dhali a’di ṯorkunu gwo mo ki: Kwan dhali ikam pini uni doshkina pije/ mo, ona bwa mo mmop̱ar /e e mo be.

²¹Hili a’di o uni gwo mo ki: Ata’dam pem dhali ikam pem ta uni gwansan kun ciḵ gwo ma Arumgimis mo dhali mii uni mo be.

²²Ka cima kamu/ mo tani a’di seki’da ḵur mo nyaḵki imanciḵ a’di gwo mo dhali a’di ki o uni gwo mo ki: Dhalki ana ’ciṯẖa/ gap̱ ki ’bana kamu/ ma al mo ma. Wakan uni karkina ḵur ’pen mo be.

²³Dhali me’d jin hashkina uni mo eya ḵur yi’de/ mo tani a’di ishki e mo. Dhala p̱unthar ’tham p̱u’dki’d ap̱o/ ma al yi’de/ mo dhali uni ’tu’dkina yi’de/ bwa ḵur mo dhali uni ’kokin mo e mo jin ṯagu wu mo be.

²⁴Dhali uni iikin mo mmomer a’di e mo mmo/o a’di gwo mo ki: Tap̱a, Tap̱a, ana ’ce’du/ sho’k mo. Dhali a’di merki e mo dhali ḵucur ’tham ki gwo mo dhali yi’de/ jin bir bakal mo. Dhali uni daḵkan mo dhali mo dosh ki biyuu mo be.

²⁵Dhali a’di ki o uni gwo mo ki: Mane moŋgam gwo is bum mane? Dhali uni ḵo/ki is mo be dhali uni merkin mo mmo/o gwo ka rem ’kup̱ mo ki: Wathi/ yan ta’da ja sa/ haali/ a’di ḵanki ’tham gwo mo dhali yi’de/ mo, dhali uni ha gwom piti e mo be.

²⁶Dhali uni merkin mo e bampa/ gi Paŋ Gadara mo a’di jin di’d ka par ’twa/ ki Pany Jaliil mo be.

²⁷Dhali ki a’di thulki’d ka ’cesh mo tani wathiŋ kamu/ ’peni ’peŋkuman bampa/ jin ta’d ga ruma ’cesh mo gamki a’di ’kup̱ mo. Haali/ isa gush mo tani a’di diki hi’th burrinyeŋ kamu/ i/is mo dhali a’di diki c̱a’b e gu’b mo, hili a’di c̱a’bki’d mo e bwaman moŋ’kup̱aje mo.

²⁸Ki a’di p̱arki’da Yesus e mo tani a’di cuu’d ki ’twa/ jin caaca mo dhali biṯa ’cesh mo mbwambori a’di mo dhali o gwo mo ki dhan ’twa/ jin caaca ki: /e mini mii aha/ katinta mo, Yesus jin ta Ya/ ma Arumgimis jin Cayaa/ e ki Ca mo? Aha/ ’thokina /e mo ki dhalku/ ki ṯocaa/ ’kus mo.

²⁹Haali/ a’di ḵanki’da rum thus jin nyo/o’d gwo mo mmoya ka pije/ mo ’peni wathi/ mo. (Haali/ me’d ka ris a’di bu’thki a’di mo dhali a’di karkunu mo mmoji mo dhali a’di deḵkunu ka jindhiir mo dhala maḵḵiya mo, hili a’di ’ce’dki mondeḵ mo dhali a’di urkin ma ruma ’cesh ka pije/ mo e bwam ma si’b mo.)

³⁰Yan’ko’d Yesus ki doṯ a’di ki: Gway pini yuḵu kata mo? Dhali a’di ki thoḵ a’di gwo mo ki: Karis mo. Haali/ ama’dinya ruma ’cesh uni sekini a’di mo be.

³¹Dhali uni ’thoki a’di mo mmodiki ḵan uni gwo mo mmo/ii mo e bwany jisa ’kulga/ mo.

³²Dhali hili ama’diny ḵuthar caaca shwani ’bambala wosh mo dhali uni ’tho a’di mo mmodhal uni bway mo mmose i uni gwansan mo be. Wakan a’di dhalki uni bway mo be.