San Lujc 8:9-32

⁹Dxel gunabdiidx ree xbejn Jesús lojman, rëb reeman: ―¿Xhie rën guiëb cwent guin?

¹⁰Badxiꞌ Jesús laan rëbaman: ―Lëjt, Dios ma basaꞌn lëjt din chigniaꞌdi xhienaag na̱j xguialrniabeeman. Per loj gra reeman rünan ziꞌc cwent din majsi rani loj reeman, per ad zuguiaat reeman, majsi riguiejn reeman, per ad zigniaꞌt reeman.

¹¹’Ni ne rën guiëb xcwent bén rtieꞌch bin: Bin guin na̱j ziꞌc xtiidx Dios,

¹²guiáad bin biajb runejz na̱j ziꞌc ree bén riguiejn xtiidx Dios; per rdxin gajc xindxab rquiedix laan luxdoo reeman chitëë chililadx reeman laan abiꞌ gac reeman perdon.

¹³Guiáad bin biajb loj ree guiaj, na̱j ziꞌc ree bén riguiejn xtiidx Dios, abiꞌ dád nix ru luxdoo reeman riguiejn reeman laan, per guial na̱j reeman ziꞌc cwaan ni ad yuꞌt liuj, rliladx reeman laan tibladëd abiꞌ chi rzagdiaj reeman laa rusaꞌn gajc reeman ni rliladx reeman.

¹⁴Guiáadza bin biajb loj ree yaquiëjch, na̱j ziꞌc ree bén riguiejn xtiidx Dios; per ru reeman xgab por gra ree guialnazaꞌc rigaꞌ loj guidxliuj guie rüjn tëë reeman ni rëntzi reeman, abiꞌ zianz rucwëëz rucaagdiajg reeman xtiidx Dios ad rüjn tëët reeman ni rënman.

¹⁵Guiáad bin biajb loj yujzaꞌc, laan na̱j ziꞌc ree bén rucaagdiajg xtiidx Dios, rucaagdiajg reeman laan con guidib luxdoo reeman zaꞌdxiꞌch tëë reeman loj xnejzaman, zianczi rüjn reeman ni rënman.

¹⁶’Achut bén ruzeꞌc tijb guij dxel rutaꞌcwaman laan, ad rudxeꞌ tëëtaman laan xan lon, ruzujman laan ya din gusnin loj ree bén chuꞌ lënü.

¹⁷Achet ni naguieꞌch yuꞌ ni ad zaguient ad yuꞌ tëët ni ralan ni ad zagbeet bejn, zadxin dxej gagbee bejn laan.

¹⁸’Zeel gol bacaagdiajg zagdxe, bén ma rigniaꞌ gusnuu chigniaꞌman mazri, per bén ad rigniaꞌt, xt taꞌn ni naladxaman rigniaꞌman ad zigniaꞌtraman.

¹⁹Xniaa Jesús con ree bijchaman bidxin reeman lod zaꞌman, per ad gojct nibig reeman lojman guial dád zien bejn rigaꞌ.

²⁰Abiꞌ yuꞌ bén bagojn Jesús rëbaman: ―Laa xniaal con ree bijchil zaꞌ luleꞌ guin rën reeman guinieenë reeman lüj.

²¹Badxiꞌ Jesús laan rëbaman: ―Bén rucaagdiajg ree xtiidx Dios rüjn tëë reeman ziꞌc rënman, laa reeman na̱j da nan laa tëë reeman na̱j da bichan.

²²Tijb dxej guyu Jesús loj barcw con ree xbejnman, abiꞌ rëbaman loj reeman: ―Yoꞌ ree zatiblad roꞌ nijs guin. Zianz zë reeman.

²³Laꞌtgaj cadëd reeman loj nijs guin, goodyëjs Jesús. Dxel guzuloj cabiꞌ bidoxh loj nijs guin, abiꞌ cadxa nijs loj barcw guin, ma cazëëbczi barcw guin xan nijs.

²⁴Dxel bacwëën reeman Jesús, rëb reeman: ―¡Mextr! ¡Mextr! ¡Ma cayzëëb ree xan nijs! Abiꞌ bixche Jesús gunabeeman bacwëëz bidoxh guin në xtüjp nijs guin, zianz gulëjz reen dxel bayajcdxe.

²⁵Abiꞌ rëbaman loj reeman: ―¿Conza xguialrliladxidi? Per laa reeman dád bidxeb reeman badxa tëë loj reeman, abiꞌ canabdiidx loj lasaꞌ reeman rëb reeman: ―¿Chu bén guin zeel rniabeeman bi në nijs, abiꞌ ruzoob reen xtiidxaman?

²⁶Dxel badxin Jesús con ree xbejnman xdajn ree bén Gadara, ni rigaꞌ zatiblad roꞌ nijs Galilea.

²⁷Chi barii Jesús loj barcw guin, bibig tijb xin luguiedx guin lojman. Ma gojc xchej daꞌt yuꞌ xindxab luxdoox. Ad rajcwt xabix, ad nabantix lënü, ganaxzi roꞌ ree baa nabanx.

²⁸Chi baguiaax Jesús bazuxibix lojman, guneex rejs rëbix: ―¿Xhie rënl con naj, Jesús, Xiꞌn Dios yuꞌ xanyabaa? Rniaaban lojl ad gusagzil naj.

²⁹Rëbix zian guial ma canabee Jesús din yarii xindxab guin luxdoox. Ma gojc xchej naaz xindxab guin laax. Abiꞌ ma guxhii ree bejn yaax në guiaꞌx con caden chitëë ban chex, per rutüguiaꞌgajquix caden guin abiꞌ rulaagdxa xindxab guin laax niz lod achut bejn zojb.

³⁰Gunabdiidx Jesús lojx rëbaman: ―¿Chu lal? Badxiꞌxan rëbix: ―Legión lan. Rëbix zian guial zien daꞌt ree xindxab yuꞌ luxdoox.

³¹Rëb ree xindxab guin loj Jesús chitëë guixhiaalaman laa reex gabijl.

³²Dajn guin rigaꞌ zien ree cüch cayaw reeb. Zeel rëb ree xindxab guin lojman din gudëëman mod chuꞌ reex lën ree cüch guin, dxel cwëjbaman.