Luk 8:9-32

⁹Ano oro lau tan ndremenya Jises, ta moso sahou sokek nane doh.

¹⁰Eme iy anya, “Kindrei aseken ado lau tek katanan iri sahou mene aton ta nyala tondrok ta Kindrei. Arile, i tiri lau buku liliy badeh, jo asehek i san ta sahou sokek. Eme ya, ‘Iri kameh anyolom anyolom ja, arile iri winiyan baseleyani bwe; ya iri anuhun amwenen, arile batu iri winiyan baleu ta aliy bwe.’”

¹¹Ano Jises tiye, “Sali sahou sokek asah i buku doh: Buwa wit badeh, moson i buku sahou ta Kindrei.

¹²Ya oro buwa wit taku udu san badeh, i buku none lau rayah ai. Oro doh badeh, anuhun sahou ta Kindrei, arile balik eme kuhi iu sahou mwasin Kindrei tahiy ereu budon toro, eme ya oro satehei budon toro handru sa-en ta sahou. Koro-an sahou doh, kasebenei koha oro kudu mwasin.

¹³Ya buwa wit taku udu bwele-e bek badeh, i buku none lau rayah ai. Oro doh badeh, sekesek ta anuhun sahou ta Kindrei, arile kandro oro badeh, barih bala andri handru bwe. Ya oro badeh, atehei budon handru, arile bado luwen bwe, eme ya buku none ndrine sen asahan deh, ndra-i asahan toro badeh, oro taku.

¹⁴Ya buwa wit taku udu bolo malou bobodon badeh, i buku none oro lau doh, anuhun sahou ta Kindrei, arile oro ado badeh, abudon boto-on ta lakou solo-an badu kon munyak. Ya oro abudon boto-on labai ta atukum iri luk, ma hawe bale oro asin ta kandriyen badu bada oro tinan labai. Eme ma, oro badeh, buni ta budon bwe.

¹⁵Arile, buwa wit taku udu munyak mwasin badeh, i buku oro lau anuhun sahou ta Kindrei, eme oro tawi sahou doh, udu ndrine oro ihis labai, ma udu le udu, oro ato-ou sali oro mwasin.

¹⁶“Ki buku ari ndramak katelem sun, iy winiyan batone bado bolo sabok bwe, ma iy ale winiyan batehei bala baha sau bwe. Iy kameh suriniy udu loken. Ya, i buku none are lau eme anyolom kameh iy eme asiu.

¹⁷Eme ya lakou mari aton badeh kameh asahan eme lewan. Ma saba lakou tubuluhiy kameh asahan eme lewan ale.

¹⁸Eme ya, ou lomondra kamwenen ta sahou ou anuhun ma an hamon ta aliy. Ndramak tanan tan mwasin udu aliy, iy kameh akohok tanan mwasin labai ja i la-un. Ya eme, are lau anya iy tan tanan sese udu aliy, idah kameh, tanan sese le doh kameh kuhiy mari iu.”

¹⁹Ano, tine Jises hawe nadu tinen oro ame anyolom iy, arile lau solo-an labai ya oro winiyan bala mirihik tan bwe.

²⁰Eme ndramak ari ili tiye tan anya, “Jises ei, tinem hawe nadu tinem oro ales ado manan, anya katou ou.”

²¹Eme Jises tiye i tan anya, “Tine hawe oro nadu tine handru asah oro are hawek anuhun sahou ta Kindrei, ma oro amekes lahou ta aliy dah.”

²²Ano na len ari ja badeh, Jises tiye i toro lau tan anya, “To ka-au kala kapa gwa bilisiu kodo-oh.” Eme oro sandroh a ndron ra-ei badeh, ma oro alakak ala bilisiu.

²³Eme oro alakak ala badeh, Jises ndramadin. Eme laba jor atohou eme andri bwele-e gwa li, ya bayau i tinan ma eme ndron, eme ya oro akohok andra-i labai.

²⁴Eme oro lau tan ala badeh, mete-ei iy anya, “Laban, Laban, to dah kameh atuh ma amak ai!” Ano Jises suri iy eme loken, tiye sahou boto-on i ta jor hawe bayau, ma jor amondrei hawe bayau ameres.

²⁵Ano iy tiye i toro, “I deh, budon tado handru ndraheh?” Eme oro anoh, hawe mani oro atur, ma oro tiye i toro ari ari anya, “Iy are lau handru kede-eh? Iy tiye sahou boto-on le badeh, jor hawe bayau anuhun bohon!”

²⁶Ano, oro alakak ala loboho Gerasa. Kon doh, udu bilisiu ta Galili.

²⁷Eme Jises sandroh i babi le badeh, ndramak ari badu kon tinan doh, iri malawin ndra-in udu la-un eme hawen. Ya ndramak doh badeh, ndra bwena ndra-au badeh, iy ndrakane le. Iy badeh, ari asumwen bwe, asumwen badeh, munu bek ta ndrahu lau amak ala aliy.

²⁸Eme iy atou Jises le badeh, iy anyar ma aluh i andri udu mada Jises ma iy aloh i tinan i tan anya, “Jises, Nadu Kindrei badu loken, ou anya amekes sasah keme tek? Ndri-iy, ou samekes sisi-in same badak!”

²⁹Iy aloh i buku doh, tasah Jises badeh, ndratiye sahou boto-on ndra ta malawin ndra-in ta anya keme len. Ya malawin ndra-in badeh, ndrahas ndrado la-un luluwen labai. Iri sawei minen hawe katin na sen, ma lau ta ndrokei atondrok iy, arile iy mindrindri sen, eme malawin ndra-in lolowa iy ili kon lomale an, ili bolo ndrokowa bek.

³⁰Eme Jises ndremenya iy, “Nyaram are lau?” Eme iy anya, “Nyarak badeh, Solo-an.” Tasah, malawin ndra-in solo-an ndrado bwele-en badeh nyaran bwe.

³¹Eme oro asehek sahou ta tikisiy i ta Jises i buku doh, “Ou satikahei aso sala bolo lek ta isi.”

³²Eme udu loboho doh badeh, bou rakou aimon nyamon are ka-u mandrei. Eme oro tiye sahou ta tikisiy i ta Jises anya, “Ou tikahei aso kala bwele-e iri bou nane doh.” Eme ya Jises tiye le badeh,