Luku 8:9-32

⁹Jisasanya disaipele dupame, “Kongali pii dokonya tenge doko akipi?” lao baa pisiami-pyaa.

¹⁰Dokopa baame pii yanu pyao, “Goteme baanya isingi dokonya yalo petae dupa nyakama laitaka petelyamo. Dopaka doko, endakali waka dupame lengeme kandatala angi doko nakandena lao, dokaitame pii sepala masala naena lao kongaliaka silyaminona,” lea-pyaa.

¹¹“Ee wai lyandeana lao kongali lalo dokonya tenge doko dapa petae silyamo: ee wai doko Gotenya pii doko.

¹²Ee wai mendapua kaitininya peamo dokaita joo endakali mendapuame Gotenya pii silyaminoaka doko, masoo minataminopa Goteme pyoo nyetame latala Sataneme ipupala monanya pii masingi doko nyoo nepenge.

¹³Ee wai mendapua kana palenge yuunya peamo dokaita joo endakali mendapuame Gotenya pii doko auu kayao kaleme silyaminoaka doko, moname auu pyoo masala naengema. Dupame gii kuki masoo minilyaminoaka doko, makande pingi mendeme pilyamo gii dokopa pii doko yapa yakinengema.

¹⁴Ee wai mendapua lyiki tenge palengenya peamo dokaita joo endakali mendapuame Gotenya pii doko sepala kalyaminoaka doko, auu pyoo katapu laka lao nea kaenge dupapi, muni akipi, dee mona yaepasingi tata tata dupapi dupame awapa pyalya minilyamopa ee wai dupa auu pyoo andao dii namandenge.

¹⁵Dopaka doko, ee wai mendapua yuu epenya peamo dokaita doko endakali mendapuame Gotenya pii doko sepala mona epe paliuu pii doko yakinala nayao yapa maka nakayao dii mandengemana,” lea-pyaa.

¹⁶“Endakali mendeme lama mende kaiyepala titopene penge mendeme sanga napingi. Palenge toko mendenya pundipundi setala naengeaka. Endakali andaka kolandatamino dupa tii pisina lao setapenge panda mendenya setenge daape.

¹⁷Yalo petae silyamo dupa tenda Goteme panaseta. Sanga pyatae silyamo dupa tenda Goteme panasetamopa endakali dupame kandatamina,” lea-pyaa.

¹⁸“Opale singi endakali doko konda pyoo maita. Dopaka doko, opale nasingi endakali mendeme silyamona lao masilyamo dolapo nyokonyetana, nyakamame pii aipa pyoo silyamape lao kandao soo kalyepape!” lea-pyaa.

¹⁹Gii dokopa Jisasanya endangipi kaiminingipi dupa baa kateamo dokonya epeami-pyaa. Epeaminoaka doko, endakali longo limbiamino dokome dutupa baa kateamo dosa ipupenge nanjia-pyaa.

²⁰Endakali mendapuame Jisasa lamaiyoo, “Embanya endangipi kaiminingipi dupa kamanda katao emba kandapumali lao masilyaminona,” leami-pyaa.

²¹Dokopa baame dokaitanya pii yanu pyao, “Gotenya pii doko soo watao minilyamino endakali dupa nambanya endangipi kaiminingipina,” lea-pyaa.

²²Koto mende Jisasapi baanya disaipele dupapi sipi mendenya pyakalyetala, baame dokaita lamaiyoo, “Naima endaki pete lemba yangi-kaita muaa,” lea-pyaa. Dopa latala sipinya pituu peami-pyaa.

²³Pao pituu Jisasa baa sipi dokonya luu palea-pyaa. Palipiamopa poo andake mende endaki pete dokonya lao ipupala sipi doko endakimi tumbatala nyoo landa pyalanya piamopa endakali dupa koyapenge jia-pyaa.

²⁴Dokopa dokaitame Jisasa pyale tatala, “Akali Andake! Akali Andake! Naima indupa kumalanya pilyamanona kanda!” leami-pyaa. Dokopa baame sakatatala poopa endaki buli piamo dokopa dolapo kaena leamopa poo doko yatu leamopa endaki doko ema napia-pyaa.

²⁵Dopa piamopa Jisasame dokaita lamaiyoo, “Nyakamanya masoo miningi doko aipimipi?” lea-pyaa. Dopa leamopa dokaitame etete paka kayapala mona andao mende lamai lamai pyoo, “Baame poopa endakipa dolapo kaena lapumopa dolapome baanya pii sakamaingimba lamo doko akali dake api laa kanjemape?” leami-pyaa.

²⁶Maitakao dokaitame sipinya pituu Getasa tangemanya yuu dokaita pao pyakameami-pyaa. Galili yuu doko endaki lemba yangi-kaita silyamopa Getasa tangemanya yuu doko lemba yangi-kaita singi-pyaa.

²⁷Jisasame sipi doko yakinatala lembatena pyakameamopa akali yuu taono dokonya tange enjele koo mendapua paleta mendeme ipao baa kandanyia-pyaa. Akali doko lapalapa yonge peepi wamba waka napyoo papataka katea doko mee katenge-pyaa. Baa anda mendenya palya nayao endakali malu kananda dupanyaka katenge-pyaa.

²⁸Akali dokome Jisasa kandatala baanya moko kateamo dosa tombauli sepala puu lao ae lao dapa lea-pyaa: “Emba Gote Etete Ketae Katenge dokonya Ikiningi Jisasa, embame namba aipa pitipi? Embame namba tanda andake nandipoko!” lea-pyaa.

²⁹Jisasame akali doko-kisa enjele koo paleamo doko kandao akali doko yakinatala pena leamosa akali dokome pii dopa lea-pyaa. Wamba enjele koo dokome paa longosa akali doko minanjetae kateamosa endakali dupame akali doko isoo katao kingipi mokopi dupa ŋili kendepi anengapupi dupame anjetala pilyaminoaka doko, baame dupa pindao nepata pingi-pyaa. Enjele koo mendeme akali doko lungu piseta pilyamosa baa endakali napalenge yuu dupanya pata pingi-pyaa.

³⁰Mana dopale dupa minao katenge doko Jisasame pisoo, “Emba kenge apipi?” lea-pyaa. Baame Jisasanya pii yanu pyao, “Namba kenge Longo lengena,” lea-pyaa. Enjele koo longo baa-kisa paleamino tenge dokonya kenge Longona lea-pyaa.

³¹Dopa lateamopa enjele koo dokaitame Jisasa lamaiyoo, “Embame naima watao yuli koo etete koko dokonya pyandala nayape!” lao kongo leami-pyaa.

³²Nyakama kateami manda dokonya mena elyambu mende nao kateaminopa enjele koo dokaitame puu lao Jisasa kandao, “Naima mena dupanya koko landa pyamanalena, embame naimanya kaita lyokala nayapoko!” leami-pyaa. Dokopa Jisasame kaita lyokala naenya pena kaya-pyaa.