Lucas 8:9-32

⁹Lee re xaa mseed lo Jesús mnabdizh lo Jesús: —¿Xomod nak kwent ne?

¹⁰Jesús mkeb lo re xaa nu nzhé xaa: —Dios mzaa yek re gu zee ne gu xomod nak re kwaan nanyunt cheen pa nabeyy Dios; per lee lo stub naz xaa nii na duzna kwent nabix, nu zee nixa wii xaa nu naluta lo xaa, nu nixa gon xaaya nu nalata yek xaa.

¹¹’Snee nak kwent nabix ne: Lee nzhobxtil nak kwenta xtizh Dios.

¹²Lee nzhobxtil kwaan mla leen naz nak kwenta re xaa nzhon xtizh Dios, per lee Maxuu nzha nkiiba lo xaa zee nawiit xaa lo Dios nu zee nalet xaa gan yalnaban kwaan tira.

¹³Lee nzhobxtil kwaan mla lo ke pa nyent zyen yo nak kwenta re xaa nzhon xtizh Dios, nu nyakdoola xaa mkayaa xaaya, per nanyet nzo xaa lo xtizh Dios; ngwii xaa lo Dios tub tyemp, per gorna nzhin tub yalzi lo xaa zee nlaa xaa Dios.

¹⁴Lee nzhobxtil kwaan mla leen yag yich nak kwenta re xaa nzhon xtizh Dios, per chepse chepse lee re xgab yizhyo ne nle gan lo xaa nu re demi kwaan nkano xaa nu re kwaan nlu chul cheen yizhyo ne, ngin xtizh Dios lextoo xaa nu kwaane nle zee nanzaat xaa xle. Lee xaa nak kwenta tub nzhobxtil kwaan ngin yag yich nu nanzaata nzhobxtil.

¹⁵Per lee nzhobxtil kwaan mla neb lo yo wen, nak kwenta re xaa nzhon xtizh Dios kwaan dub lextoo xaa, nu nle xaa re kwaan nzhé xtizh Dios, nu nye nzo xaa lo xtizh Dios, nu xaa ne nzaa zyen doo xle.

¹⁶Noka nzhé Jesús: —Nik tub xaa nankeet tub bruj nu nsaaw xaa yeka kwaan tub almud o chep xaaya xan loon, sinka nzob xaaya pa ya nzeb, zee zaaya xni lo re xaa rep leen yoo.

¹⁷Nik tub kwaan xlaan nyent mod nalut, nixa tub kwaan nzholaan nyent mod nanet re xaa loya.

¹⁸’Kenzha wen gu re kwaan nii na. Nel re xaa nkano kwaan, kayaa xaa masraya; per lee re xaa nankanota axta chep re kwaan nkano xaa yiib lo xaa.

¹⁹Xnaa Jesús nu re wech Jesús mzhin pa nzo Jesús, per nyent mod bii xaa gax lo Jesús nel zyen doo myet nzhi baa.

²⁰Nu gorzee nzhé lak xaa lo Jesús: —Xnaa lu nu re wech lu nzo naz jwer, nzhekla re xaa nii xaa lo lu.

²¹Lee Jesús mkeb nzhé: —Re xaa nzhon xtizh Dios nu nle kwaan nzhéya, re xaa zee nak mod xnaa na nu mod re wech na.

²²Tub mbizh Jesús mzeeb leen tub kano kwaan re xaa mseed lo xaa, nu nzhé xaa lo re xaa: —Ya be stub ta roo nistoo. Zee nzhaze xaa nzha xaa leen nistoo.

²³Nu gorna nzhaze re xaa leen nistoo, ta ngot Jesús. Nu lee tub mbi dox doo mroo leen nistoo, nu mzelo nis nguzhe leen kano, nu nzho reyez la kano naz xan nistoo, nu kaded doo xaa bid.

²⁴Kwaanzee mloo xaa mkaal lo Jesús nu nzhé xaa: —¡Maestr! ¡Maestr! ¡Nzhalaw be leen nistoo! Jesús nguxche nu mgalno nistoo nu mbi, nu gorzee lee nistoo nu mbi zheta ngok.

²⁵Gwluzh nzhé xaa lo re xaa mseed lo xaa: —¿Chozhiin nzheb re gu? ¿Ma kwaan ngwii gu lo Dios? Per lee re xaa mzheb doo nu mdedyall xaa, nu mnabdizh xaa lo wechxinn xaa: —¿Cho nak xaabyi ne, nu axta nistoo nu mbi nzhon xtizh xaa?

²⁶Mzhin xaa stub ta roo nistoo cheen Galilea yizhyo kwaan le Gadara.

²⁷Nu gorna mla Jesús leen kano zee mroo tub xaa yezh, mbii gax lo Jesús. Xaa ne nzho mbi mal lextoo. Nzha zyen doo mbizh nanzhaktra xaa xab xaa, nixa nanzhotra xaa li xaa, sinka lee xaa nyu duzna leen yeer pa nyu re xaa ngut.

²⁸Gorna ngune xaa lo Jesús, nu mkichxub xaa lo Jesús nu mbazhe xaa nzhé xaa: —¿Chozhiin nze lu lo nu, Jesús Xgann Dios, xaa nzob naz yiba? ¡Naab na lo lu nateedt lu nu bid!

²⁹Nzhé xaa kwaane, nel Jesús mgalno re mbi mal kwaan nzho lextoo xaa, zee mrooya lextoo xaa. (Zyen welt nzen nye mbi mal xaa. Nu nixa nkado re myet yaa xaa nu nii xaa kwaan kaden, per nle xaa gan nchoog xaaya nu nzhe mbi mal xaa naz wen.)

³⁰Jesús mnabdizh lo xaa: —¿Cho le lu? Nu lee xaa mkeb nzhé: —Na le Zyen Doo. Nzhé xaa kwaane, nel zyen doo mbi mal nzho lextoo xaa.

³¹Nu lee re mbi mal ngunaab lo Jesús: —Nagubit lu re nu leen yerdoo.

³²Nel gax zee nzhi zyen doo kuch kayaw, zee lee re mbi mal nzhé lo Jesús: —Laa zeeb re nu lextoo re kuch ba. Nu zee lee Jesús mzeyal.