Lukas 8:9-32

⁹Iwe, nöün Jesus kewe chon kaiö ra aisini Jesus met wewen ei pworausen awewe.

¹⁰Jesus a pölüeni, “Kot a fen mwüt ngenikemi pwe oupwe silei ewe pworaus usun ekewe monomonen Mwün Kot, nge ren ekewe ekoch aramas a toriir lon pworausen awewe, pun repwe nenengeni, nge resap küna och, repwe pwal rongorong, nge resap wewe ren.

¹¹“Iei wewen ewe pworausen awewe: Ewe pwükil ina ewe kapasen Kot.

¹²Ekewe pwükil mi mworotiu lepekin al ra wewe ngeni chokewe mi rong kapasen Kot, nge Satan a feito o angei ewe kapas seni lon leluker, pwe resap lükü o eäni manau.

¹³Ekewe pwükil mi mworotiu lon lenien föüföü ra wewe ngeni chokewe mi rongorong kapasen Kot o etiwa fän pwapwa. Nge pokiten ewe kapas esap tongeni warar lor, ra chök lükü lon fansoun mochomoch. Nge lupwen fansoun sosot a toriir, ra müttir kuf.

¹⁴Ekewe pwükil mi mworotiu lein ekewe iräfölüföl ra wewe ngeni chokewe mi rong kapasen Kot, nge öürek me wöün fanüfan, pwal pwapwan ei manau ra tolong lon leluker o amopu ewe kapas, pwe uar esap tongeni mau.

¹⁵Nge ekewe pwükil mi mworotiu lon pwül mi mürina ra wewe ngeni chokewe mi rongorong kapasen Kot o amwöchü lon eu leluk mi mürina o aleasochis, ra likitü tori ra ua.

¹⁶“Esap wor eman a keni eu lamp o anomu fän eu sepi are fän eu peet. Nge epwe isetä won lenian, pwe aramas repwe küna ewe saram lupwen repwe tolong leimw.

¹⁷Mettoch meinisin mi opola epwe chök pwäpwäla, nge mettoch meinisin mi pwölüla epwe fatala o tolong lon saram.

¹⁸Iei mine oupwe föröchü usun ämi aüseling. Pun iö a wor an, Kot epwe achomongala, nge iö esap wor an, Kot epwe mwo nge angei seni ewe ekis a ekieki a nom ren.”

¹⁹Iwe, inen Jesus me pwiin kewe ra feito ren Jesus, nge resap tongeni tolong ren pokiten chomongun ekewe aramas.

²⁰Eman a üreni Jesus, “Inom me pwiüm kewe ra nom lükün o mochen churuk.”

²¹Nge Jesus a üreniir, “Inei me pwii ir chokewe mi rongorong kapasen Kot o aleasochis ngeni.”

²²Lon eu rän Jesus me nöün kewe chon kaiö ra tötä won efoch wa. Iwe, a üreniir, “Ousipwe saila epek ewe noom.” Iei mine ra sai.

²³Lupwen ra seres lon ewe noom, Jesus a möürüla. Eu asepwäl mi pöchökül a müttir eniti lon ewe noom o ekewe no ra nulong leföön ewe wa pwe a arapakan ngeni an epwe kokola.

²⁴Iwe, ra feila ren Jesus, ra föngünätä o üreni, “Sounemenem, sounemenem, arapakan chök sipwele mäla.” Iwe, Jesus a pwätä o a allük ngeni asepwäl me no, iwe, ewe asepwäl a sötiu, a pwal lüala won matau.

²⁵Mürin Jesus a üreni ekewe chon kaiö, “Ifan ämi lükülük?” Iwe, ra niuokus o weitifengeniir o kapasfengen lefiler, “Iö chök ätei? A chök allük ngeni ewe asepwäl me ekewe no, iwe, ra aleasochisi.”

²⁶Iwe, Jesus me nöün kewe chon kaiö ra seresila tori ewe fanü Kerasa mi nom epek ewe nomun Kalilea.

²⁷Lupwen Jesus a tiwelong wilifanü, eman mwän seni ewe telinimw mi wor anün rochopwak won a churi. Fansoun langatam ei mwän esap üföüf och, esap pwal nonom lon imw, nge a chök nonom lein ekewe peias.

²⁸Iwe, lupwen a küna Jesus, a puchörütä, a aturala le pwül arun pechen Jesus o a leüömong le apasa, “Jesus Nöün Kot, ewe mi Unusen Tekia, met ka mochen föri ngeniei? Üa tüngor ngonuk, pwe kosap ariaföüüei.”

²⁹A nöünöü ei ititin fos, pun Jesus a fen allük ngeni ewe anün rochopwak, pwe epwe towu seni. Fan chomong ewe anün rochopwak a tötä won. Inamwo ika ra kalapusei o föti pöün me pechen ngeni selimächä, nge a chök mwütifeseni ewe selimächä. Iwe, ewe anün rochopwak a cheela lon ewe fanüapö.

³⁰Jesus a aisini, “Ifa itom?” Ewe mwän a pölüeni, “Itei mwichemong,” pun chomong anün rochopwak ra nom won.

³¹Iwe, ekewe anün rochopwak ra tüngor ngeni Jesus, pwe esap asürela lon ewe leni mi fokun alolol.

³²Iwe, a wor epwi pwiin pik ra mongöfeil won ekewe chukutekison mi arap ngeni ewe leni. Iei mine ekewe anün rochopwak ra tüngor ngeni Jesus pwe epwe mwüt ngeniir pwe repwe tolong lon ekewe pik. Iwe, Jesus a mwüt ngeniir.