Luk 8:9-32

⁹Kɔ acɛpsɛ ɔn darəŋ ŋayif kɔ ntɛ capafɔ cacɔkɔ cəloku mɔ.

¹⁰K’oloku: «Nəna ŋɔ asɔŋ kəcərɛ mɔgbɔpənɛ ma dɛbɛ da Kanu; kɔ akɔ dəcapafɔ aloku ŋa ti, mba: ‹Ŋagbətnɛ kɔ ŋantɔ kəc-nəŋk; kɔ ŋaŋcəŋkəl ta ŋaŋne-ɛ.›»

¹¹«Tedisrɛ ta capafɔ caŋcɛ tɛntɛ: Defet, toloku ta Kanu tɔ.

¹²Mɛŋgbɛn mmɛ mɛntɛmpɛnɛ dɔpɔ dacɔ mɔ, mi mɔyɔnɛ afum aŋɛ ŋaŋne mɔ; ŋɔŋk ŋɛlɛc ŋeder ŋeliŋ ŋa dəbəkəc toloku ta Kanu tɔkɔ ɛnane mɔ, ntɛ tɔŋsɔŋɛ payaməsər ŋa kəlaŋ nkɛ kəntam kəyac ŋa mɔ.

¹³Mɛŋgbɛn mɔkɔ meyi dəmasar mɔ, afum ŋɔ, aŋɛ ŋaŋc-kɔna-ne toloku ta Kanu, pəbɔt ŋa mɔ. Mba ŋayɔ fɛ ntɛntəl, ŋalaŋ tɛm tɔlɔma, kɔ tɛm teyeŋki tender ŋa-ɛ, ŋasak.

¹⁴Mɛŋgbɛn mmɛ mɛntɛmpɛnɛ dəbɛŋk mɔ, mi mɔyɔnɛ afum aŋɛ ŋaŋcəŋkəl moloku ma Kanu, kɔ ŋalasərnɛ mes mɔpɔŋ mmɛ mɛntasərnɛ ŋa mɔ: Mɛcɛm-cɛmnɛ mɛlarəm, kəsɔtɔ ka daka kɔ mɛfaŋ mobotu ma doru, ŋa ŋafɔsɔŋ yokom yololu.

¹⁵Mɛŋgbɛn mmɛ meyi antɔf ŋɔtɔt mɔ, afum ŋɔ, aŋɛ ŋaŋcəŋkəlɛ toloku abəkəc ŋɔtɔt ŋosoku, ŋamɛŋkərnɛ ti, ŋacəmɛ ti darəŋ mɔ, ŋa ŋaŋsɔŋ yokom yɔtɔt.»

¹⁶«Nwɛ o nwɛ ɔfɔmot lamp a pəkufun di kaloŋi, ɔfɔsɔ-bɛrsɛnɛ di kəfəŋc dəntɔf; mba ɛndɛt di kədɛt dəm, ntɛ tɔŋsɔŋɛ aŋɛ ŋambɛrɛ dukəlɔ mɔ, ŋanəŋknɛ pəwaŋkəra.

¹⁷Mpɛ o mpɛ pɛmɛŋkənɛ, antam pi kənəŋk. Ntɛ o ntɛ tɔŋgbɔpənɛ mɔ, antam ti kəcərɛ, towur tɛfəntərɛ pəwaŋkəra.

¹⁸Nəkɛmbərnɛ tɔkɔ nəŋcəŋkəl mɔ; bawo andekɔ-bɛrɛnɛ akɔ ŋayɔ mɔ; pabelər akɔ ŋantɔyɔ mɔ ali pɔkɔ ŋaŋgbɛkər mera kəyɔnɛ paŋan mɔ.»

¹⁹Kɔ iya ka Yesu kɔ awɛŋc ɔn ŋander ŋabəp kɔ, mba ŋaŋc-tam fɛ kəlɔtərnɛ kɔ ntɛ afum ŋala mɔ.

²⁰K’aŋkɔ paloku kɔ ti: «Iya kam kɔ awɛŋc’əm aŋa ŋayi nde doru, mən’ ɔ ŋafaŋ kənəŋk.»

²¹Kɔ Yesu oloku: «Iya kem kɔ awɛŋc’im aŋa, ŋayɔnɛ aŋɛ ŋaŋcəŋkəl toloku ta Kanu ŋacəmɛ sɔ ti darəŋ mɔ.»

²²Dɔsɔk dɔlɔma kɔ Yesu ɛmbɛkɛ debil kɔ acɛpsɛ ɔn darəŋ. K’oloku ŋa: «Pacali ntende kəba mokuru.» Kɔ ŋaŋkɔ.

²³Ŋayi kəcali, kɔ Yesu endirərnɛ. Kɔ afef ŋɔpɔŋ ŋɛyɛfɛ kəwur dəkəba kɔ abil ŋɛfaŋ kəkalɛ, kɔ ŋayi dəpəwɛy-wɛy.

²⁴Kɔ acɛpsɛ ɔn darəŋ ŋander ŋatimi kɔ, ŋac-kulɛ-kulɛ: «Wətəksɛ! Wətəksɛ! Kəfi kɔ sənder!» Ntɛ entimɛ mɔ, k’ɛyɛfɛ kəgbəŋ-gbəŋər afef, kɔ yam yɔpɔŋ yɔkɔ yɛnayɛfɛ mɔ, kɔ yɛsak few. Kɔ pəyɔ yeŋ, ali tes aŋc-ne fɛ sɔ.

²⁵Kɔ Yesu eyif ŋa: «Deke kəlaŋ konu kəyi-ɛ?» Ntɛ ŋanesɛ a kɔ cusu cəwos ŋa mɔ, kɔ ŋayifɛnɛ: «Anɔ ɔfɔ wəkawɛ? Wəkawɛ ɛŋgbəŋ-gbəŋər ali afef kɔ yam, yɛcəmɛ sɔ tɛfaŋ tɔn darəŋ!»

²⁶Kɔ Yesu ɔŋkɔ pənəŋk yecic yɔlɔma nde atɔf ŋa Kadara, nde pəntɛfərɛnɛ kɔ Kalile mɔ.

²⁷Ntɛ Yesu ontor dəntɔf mɔ, k’ɛnəŋk fum wəlɔma wəka dare dadɔkɔ fɔr yɔn kiriŋ, nwɛ yɔŋk yɛlɛc yɛlarəm yɛnacəmɛ darəŋ mɔ. Kəyɛfɛ ntɛ pənawon mɔ, ɛŋc-bɛrnɛ fɛ duma, ɛnayɔ fɛ kəlɔ kəyi, mɛnɛ pəyi nde aŋwupɛnɛ mɔ.

²⁸Ntɛ fum nwɛ ɛnəŋk Yesu mɔ, kɔ ŋɔŋk ŋɛlɛc ŋɔsɔŋɛ kɔ kəkulɛ-kulɛ, k’ɛntɛmpɛnɛ Yesu wɛcək dəntɔf, k’oloku pəpɔŋ: «Cəke cɔ məfaŋər’im-ɛ, Yesu, Wan ka Kanu Wəbɛ wəka dareŋc? Ilɛtsɛn’am ta mətɔrəs’im!»

²⁹Bawo Yesu oŋc-loku ŋɔŋk ŋɛlɛc nŋɛ ŋɛnabɛrɛ fum wəkakɔ dəris pəwon mɔ kəwur. Gbekce yɔ aŋc-kotərɛnɛ fum wəkawɛ dəkəcək kɔ afɛc ŋɔpɔŋ, mba oŋc-copu gbekce yayɔkɔ, ŋɔŋk ŋɛlɛc ŋosolɛ kɔ ŋekekərɛ nde dətɛgbɛrɛ.

³⁰Kɔ Yesu eyif kɔ: «Cəke cɔ aŋw’am-ɛ?» Kɔ fum nwɛ oloku Yesu: «Ina aŋwe «Pəlarəm».» Bawo yɔŋk yɛlɛc yɛlarəm yɛnacəmɛ kɔ darəŋ.

³¹Kɔ yɔŋk yɛlɛc nyɛ yɛlɛtsɛnɛ Yesu kəsak yi, ta pəsɔŋɛ yi kəwur yɔkɔ dəpəcuca.

³²Awa, ŋanabɔlɛnɛ fɛ sɔp yɛlarəm yɔlɔma nyɛ yɔŋc-sɔmət dəndo tɔrɔ kəroŋ mɔ. Kɔ yɔŋk yɛlɛc yontola Yesu kəwosɛ ka kəbɛrɛ ka dəsɔp nyɛ, kɔ Yesu owosɛ yi.