Luka 5:4-27

⁴Jaza qazuc efârerâ Simoŋ ʒiŋuc âzâcnewec: “Riqic ʒâʒâŋiŋko rarâ wasaŋ behepie qowi jowaoc.”

⁵Mume Simoŋzi ʒiŋuc âzâcnewec: “Qaqazu, nâŋe ŋafe ʒora wasaŋ behe‐bipiehuc qowi moc mi rombeneŋ, gore micte ine sifu mocwâc behepemu.”

⁶Eme wasaŋ behepie qowi bocjaha jâmbâŋ jowame wasaŋ tâcnezo ewec.

⁷Eme fâre‐bipierâ âgofâc‐jeŋic woke mocko jumbiŋ jaŋe meoric qajarepie ware bafic‐jopambiŋ. Ehuc qowi ropie woke jajahec huku fusucmame ŋeutuckezo epic.

⁸Eme Simoŋ Petorozi i honerâ Jesure maŋfuŋko fodaperâ muwec: “Wofuŋ, no ŋic sâqocnere behecnu rac.”

⁹Qowi guru sâko honerâ e jahacne â ŋic gâcne mâmâc manapie hâhâwicne eme iŋuc hâcne muwec.

¹⁰Erâ e jahacne sawa mâcne, âgo jahec‐ticne Jakobo â Johane, Ʒebedaiore ŋokâ, jahe iŋuc jaha ejactewec. Eme Jesuzi Simoŋ ʒiŋuc âzâcnewec: “Go mi hâwicguoc, go qowi rorozi ŋic roro erâ jucmu.”

¹¹Iŋuc mume jaŋe woke moŋgeŋko fârepie feme wiac sasawa beherâ Jesu bâjâpembiŋ.

¹²Jesu e juku hae mocko fisirâ juhame ŋic moc wicsanaŋzi sahacne banʒaŋne‐fârewec, eki Jesu honerâ ware maŋfuŋnao ʒâŋe maine mâreŋko hetutuckerâ ʒiŋuc muhuc wâsickewec: “Wofuŋ, go bâsomiecnuzo murâ sâcne bâsomiecnucmu.”

¹³Mume Jesuzi meticne sicnerâ sahacne bâuahuc muwec: “Mana‐garekopacte fâsâec.” Mume izia sahac‐ticne fâsâe‐fârewec.

¹⁴Eme Jesuzi dâŋ ʒiŋuc âzâcnewec: “Go irec dâŋ binaŋ ŋic mi jazahuc mâc rarâ sahacge taha bapa jâututec honezejec, ehuc fâsâekomecte Mosere micdâŋte bâzi riketec fuŋne mana taranʒepieŋ.”

¹⁵Eme ŋic fâsâewec irec biŋe hae sâc rafâreme ŋic jaŋe manarâ mitire mecne â hucte mecne qiŋ qururuŋko Jesurao fisihuc domambiŋ.

¹⁶Fisihuc boc ecnepie mâreŋ herâricne mocko ra juhuc nunumu gie bawec.

¹⁷Ʒoaŋ mocko Jesuzi ŋic miti jazahuc juwec. Eme Galilaia mâreŋkonec â Judaia mâreŋkonec â Jerusalem haeonec farisaio â sâcmutâc qaqazu jaŋe fisirâ ŋic jaŋere ŋondeŋko mâmâc ŋembiŋ. Ŋehapie Wofuŋte tâpirizi Jesu neŋgoc ŋesiŋ ŋecnehame ŋic bâpiaŋ‐jopawec.

¹⁸Ehame mi ŋic ʒeke puriŋ moc kanʒeo reŋke warenʒepieŋ i! Erâ ficko baferâ Jesure maŋfuŋko râeniŋte ŋic jaŋerao hetakirembiŋ.

¹⁹Iŋuc erâ fic bupuo baferâ bâropierâ ŋic kanʒehec âke suepie ŋicŋondeŋko Jesure maio wahawec.

²⁰Iŋuc epie Jesuzi mamanasiŋ‐jeŋicte fuŋne hone manac erâ ŋic ʒeke puriŋ ʒiŋuc âzâcnewec: “Ŋicmae, sâqocne mutâmire‐garekicne.”

²¹Mume miti qaqazu â farisaio jaŋe dâŋ i manarâ maŋjeŋiczi ʒiŋuc manasumbiŋ: “Hâc, e wemo‐ticnere Anutu âkehockekac, sâqocne bâbâtâmire i Anutuzi buc eekac.”

²²Iŋuc manasupie Jesuzi maŋjeŋicko dâŋ i mana tararâ ʒiŋuc jazawec: “Maŋŋeŋiczi wemocte dâŋ iŋucne manasuŋgopieŋ?

²³Gie wenimo izi afecne? Ŋic ʒeke puriŋ ʒiŋuc âzâcnezo: ‘Sâqocnege bâtâmire‐garekicne’ me ʒiŋuc âzâcnezo: ‘Fahare rac’?

²⁴Ŋic Fâri Wâtuŋne e mâreŋko sâqocne bâtâmireocte tâpiri focnekac irec fuŋne hone tarariŋ.” Iŋuc murâ ŋic ʒeke puriŋ ʒiŋuc âzâcnewec: “No gazape faharerâ fofoge rorâ haegao rac.”

²⁵Mume izia ʒâŋe mai‐jeŋicko faharerâ fofo‐ticne rorâ haeo rahuc Anutu muteŋkewec.

²⁶Eme ŋic jaŋe i honerâ manapie hâhâwicne eme warecke sâqorerâ Anutu mucne bacnehuc mumbiŋ: “Miŋecgac wiac ʒâŋe furu fuame honeŋgopeneŋ.”

²⁷Eme Jesuzi fickonec waharâ hata rawec. Rarâ takesi roro ŋic moc ʒâŋene Lewi e moneŋfic‐ticnao ŋehame honerâ ʒiŋuc âzâcnewec: “Ware bâjâpecnuc.”