Lucas 5:4-27

⁴Leettsa ngwalo mloo Jesús lo re men, tsa nzhab Jesús lo Simún: ―Btsig goo kano lo nit, ne blebi goo yex goo, tsa niit goo mbel.

⁵Tsa nzhab Simún lo Jesús: ―Maestr, dita yaal mke nee tsiin ne neeka thib mbel mniitta nee, per tak lu ney, kona kobi nee yex nee leen nit.

⁶Ne leettsa mloo re zha yex leen nitdoo, kwaro mbel mniit zha, ne asta ndrat yex.

⁷Tsa mtsow re zha seny lo re altaa zha kuu nzo leen tedib kano, tsa yaad re zhaʼa tsow ayud re zha. Ne myaad re zhaʼa mtsow ayud zha, ne mtse zha ropta kano, ne nlaa nlaa tab naats kano leen nitdoo.

⁸Ne leettsa myeen Simún Pey kwathoz mbel mniit re zha, tsa mtobxub Pey lo Jesús ne nzhab Pey: ―¡Beche lon, Zha Nabee, tak zha ndab falt nakʼn!

⁹Kwathoz mzegey leettsoo Simún kon re altaa Simún, tak kwaro mbel mniit re zha.

¹⁰Ne noga Santiag ne Juan kuu nak rop xgann Zebedeo, rop zhaʼa nak altaa Simún. Per lee Jesús nzhab lo Simún: ―Tsebta, tak desde naltseree gaka zha kuu niit men par Diox.

¹¹Leettsa ngwalo mtsino re zha kano roo nitdoo, tsa mlaa zha reta kwaa ne mndeke zha dits Jesús.

¹²Thib wiz leettsa ndo Jesús thib re yeza, tsa mzin thib zha kuu ndak yiz kuu ndeye lo Jesús, ne or mwii zha lo Jesús, mtobxub zha lo Jesús asta mdiinn yeklo zha lo yu, ne nzhab zha: ―Zha Nabee, os leeʼa nlaaza, tak tegweʼa na lo yiz ree.

¹³Tsa mxoob Jesús yaa Jesús yek zha, ne nzhab Jesús lo zha: ―Nlazʼn weʼa. Ne oraaka mgwe zha.

¹⁴Tsa nzhab Jesús lo zha: ―Neeka thib lo zha yent kwan gaba. Sinke gwa lo ngwleyy, tsa ne zha leeʼa mgweʼa lo yiz kuu mzhaaka, ne btaa gona taxal mnabee Moisés.

¹⁵Per lee re kuu mtsow Jesús masraa mraats, ne kwathoz men mkaltaa mkenza kuu mni Jesús, ne noga mkaltaa re zha tsa tegwe Jesús zha lo yiz kuu ndak zha.

¹⁶Per lee Jesús mbeche lo re men ne nda Jesús ta yent men, ne tya mndediz Jesús lo Diox.

¹⁷Thib wiz leettsa lee Jesús ngeloo lo re men, xid re mena ndob chop tson fariseo ne chop tson maestr kuu nloo xkiiz Diox, re zhaʼa ndyaad re yez kuu nzi dita ta nabee Galilea, Judea ne Jerusalén, ne nap Jesús yalney chaan Diox ntegwe Jesús re mbyiz.

¹⁸Tsa mzin chop tson mbyi kuu ngwano thib zha mthans kuu nzoob lo luun, ne nlaaz re zha ko zha mthans leen yuu, tsa kix zha mthans lo Jesús.

¹⁹Ne ngogt gataab zha leen yuu, tak kwaro men nzi tya, tsa mkendab zha yek yuu, ne mxaal zha lut yek yuu, ne tya mriid zha dib luun mthans, ne mdix zha mthans lo Jesús.

²⁰Ne myeen Jesús lee re zha kuu myaadno mbyiza wlipaa nyelaaz Diox, tsa nzhab Jesús lo mbyiz: ―Lee re falta myuyya.

²¹Tsa lee re maestr kuu nloo xkiiz Diox kon re fariseo mndelo mtsow xgab: “¿Cho nak mbyi ree? ¿Chebee tabaa mbez mbyi ree? Beeta Diox nak cho kuu tak tuyy re falt chaan re men.”

²²Per lee Jesús myeen naa kwan ntsow re zha xgab, tsa nzhab Jesús lo re zha: ―¿Chebee tabaa ntsow goo xgab?

²³¿Kwan ntsow goo xgab? ¿Kwan mas nagant gapʼn lo mbyiz: “Lee re falta myuyya”, o tegwen zha ne gapʼn lo zha: “Gwache, bzhen luuna ne tyee”?

²⁴Per tsowʼn koree lo goo, tsa ne goo lee na, Kuu Mzin Ngok Men, napʼn yalnabee tuyʼn re falt goo. Tsa nzhab Jesús lo zha mthansa: ―Loʼa nin, gwache, bzhen luuna ne tyee liza.

²⁵Ne oraaka lee zhaʼa ngwache, ne mzhen luun, ne ngeyol zha lo Diox ndya zha liz zha.

²⁶Kwathoz mzegey leettsoo reta men ne mbil men lo Diox, ne lo tseb re zha nzhab zha: ―¡Naltseree si mwiiʼaa thib kuu thoz kuu mtsow Diox!

²⁷Bluz leettsa ngwalo mriid re koree, tsa mroo Jesús ne mwii Jesús thib zha kuu ntsow kobral temi chaan yezlyu, kuu nzhax lo zha Roma, zhaʼa le Leví, ndob zha roo mes ta nya re men ngix lo zha. Tsa nzhab Jesús lo Leví: ―Bteke ditsʼn.