Luka 5:4-27

⁴A kana ačhilo te ćerel svato e themešće, phendas e Simonešće: “Otplovisar okote kaj si handuk o paj, thaj čhude e mreže ćire thaj astar e mačhen.”

⁵A o Simon phendas lešće: “Sikavneja! Sasti rjat trudisajlam, thaj khanči či astardam, ali ako tu gajda phenes, čhudava e mreže.”

⁶Kana ćerdine godova, astardine but mačhe, gaći kaj pharjonas e mreže lenđe.

⁷Dine znako pire drugarenđe ando aver čamco te aven te pomožin len. Kana von aviline, pherdine e liduj čamcurija gajda kaj gata potonisardine.

⁸A kana dikhlas o Simon Petar, pelo pe pire koča angle Isusešće pungre thaj phendas: “Džatar mandar, Gospode! Me sem bezehalo manuš.”

⁹Thaj sas ando čudo o Petar thaj savora save sas lesa zbog e bute e mačhe kaj astardine.

¹⁰A gajda vi o Jakov thaj o Jovano sas ando čudo. Von sas e čhave e Zevedeješće thaj e drugarja e Simonešće. A o Isus phendas e Simonešće: “Nadara. Katar akana e manušen ovisareja.”

¹¹Thaj crdine e čamcurja pe phuv, mukline sa, thaj teljardine pale leste.

¹²Kana sas o Isus ande jek gav, dijas pe jek manuš savo sas sa ande guba. Dikhla e Isuse thaj pelo angle leste e mujesa pe phuv, thaj zamolisardale: “Gospode! Te kames šaj te šlavesman katar e guba.”

¹³Vo čhuta po vas pe leste, thaj phendas: “Kamav, šlav tu!” Thaj e guba odma peli lestar.

¹⁴Thaj o Isus zapovedisardas lešće na phen khonikašće, nego dža thaj sikav tu e rašaješće, thaj prinesisar ćiri žrtva palo ćiro šilaipe, sar zapovedisardas o Mojsije. Godova avela sago dokazo e manušenđe.

¹⁵O glaso pale leste još majbut buljolas, thaj o but o them ćidelaspe te ašunen les thaj te sastarel len katar lenđe nasvalimata.

¹⁶A vo đelotar ande pustinja te molilpe e Devlešće.

¹⁷Jek đes dok o Isus sikavelas, bešenas lesa e fariseja thaj e sikavne e Mojsiješće zakonestar save aviline andar sa e gava galilejske thaj e judejske thaj andar o Jerusalim, a e sila e Gospodešći sas lesa te sastarel e nasvalen.

¹⁸Askal aviline varesošće manuša save inđarenas pe nosilje e manuš savo sas lino, Kamline te anenle andre thaj te čhonle anglo Isus.

¹⁹Kana zbog o but o them naštik dine lesa andre, linepe po krovo e ćheresko thaj kroz o krovo muklinele tele zajedno e nosiljasa maškare anglo Isus.

²⁰A vo kana dikhla o paćipe lengo, phendas lešće: “Manušeja Jartime si tuće ćire bezeha.”

²¹E fariseja thaj e sikavne e Mojsiješće zakonestar počnisardine te gndisaren thaj ande peste te phenen: “Ko si akava kaj hulil po Del? Ko šaj te jartosarel e bezeha osim o Del?”

²²A o Isus džangla lenđe gndimata, thaj phendas lenđe: “Sostar gajda gndin ande tumare ile?

²³So si maj loće te phenelpe: 'Jartime si tuće će bezeha' ili te phenelpe: 'Ušti thaj phir'?

²⁴Nego te džanen kaj e Čhave e Manušesće si vlast pe phuv te jartosarel e bezeha...” Aska phendas e linešće: “Tuće phenav: 'Ušti, le ćire nosilje thaj džatar tuće ćhere!'”

²⁵Vo odma uštilo angle lende, thaj lija pe soste pašljolas, thaj đelotar pire ćherešće thaj hvalilas e Devle.

²⁶Savora sas ando čudo, slavinas e Devle, thaj pherde dar phenenas: “Čudurja ađes dikhlam!”

²⁷Pale godova o Isus inkljisto, thaj dikhla e careniko savo bučholas Levije kaj bešel pe carina, thaj phendas lešće: “Av pale mande.”