Luk 5:4-27

⁴Eme sahou tan ano le badeh, iy tiye i ta Saimon, “Ado kasowe kame len, ya ado kakeh kubwin tado ki gwa, kawe-ek ni.”

⁵Eme Saimon anya, “Ndramak ta leheya, aso badeh, ndramekes na ben ari buruwen ndra-au, arile aso bakohok se ni bwe. Arile, in hamon ta bohom ou ndratiye, jo kameh akeh kubwin ili gwa ja.”

⁶Eme oro akahei kubwin i gwa, eme ya kubwin toro anya katarah, tasah ni badeh, solo-an labai.

⁷Eme oro anyoleh i toro lau toro are ndron ra-ei ja kame kaseben oro. Ano oro weleyani ndron toro, ma lu-ei na ni, ma ndron toro anya katuh.

⁸Eme Saimon Pita anyolom lakou dah asahan, ma iy taku i andri na bwili ndru-un udu kati Jises, ma tiye i buku doh, “Ou sado madak Laban, ou au. Jo badeh, kandriyen tek ndra-in!”

⁹Ya eme Saimon hawe oro lau tan ta ni are hawen badeh, mani oro atur labai, tasah ni oro kuhiy solo-an labai.

¹⁰Ma uru lau badu hawe Saimon, Jemis uru Jon nadu Sebedi badeh, mani uru atur ale. Ano Jises tiye i ta Saimon, “Kabwai, ou sanoh; na dah, ma na len hamon eme, ou kameh akohok iri ndramak, i buku ou awe-ek ni badeh.”

¹¹Eme oro aluwi ndron toro eme babi eme loken, ano oro ruwani lakou toro mari udu api, ma oro an hamon ta Jises.

¹²Ano na len ari ja, Jises udu kon tinan ari, ya udu loboho doh badeh, ndramak ari sik lepra ini badan mari. Iy eme atou Jises le badeh, iy morahani iy i andri anyolou iy anya, “Laban, i buku ou aseken ou winiyan mesekei jo kamwenen ja udu mada Kindrei!”

¹³Eme Jises atehei minen i badan ma tawi iy, ano iy tiye, “Jo aseken. Ya ou amwenen ja.” Eme ma sik lepra tan amai i le rasan.

¹⁴Ano Jises tiye i tan, “Ou satiye lakou dah, sala ta ari ndramak labai; arile ou ales ala hawe iri pris, leheya badam ki tiri kanyolom; ano ou adeu salom ta asun i le buku Moses mene ndrabatanau. Ya eme iri kanyolom ma katanan ou badeh, ndramwenen ja.”

¹⁵Arile, sahou ta nyala Jises badeh, ndraseker ndra tinan labai, eme ya iri lau solo-an ame ta anuhun sahou tan, ma hawe kamekes iri kamwenen.

¹⁶Arile len solo-an badeh, Jises iu ili kon lau aliy bwe ta asolom.

¹⁷Ano na len ari ja, Jises leheya iri lau mwan ma badih udu bolo asiu ari. Eme iri Parasi, hawe iri lau ta leheya kandriyen tiri Juwis, badu bolo kon tinan Galili, iri badu Judiya ma hawe badu Jerusalem ame manyah anuhun Jises asehek sahou. Ya eme boto-on ta Laban badeh, eme la-u Jises ta amekes iri lau sik udu tiri kamwenen.

¹⁸Eme lau rayah badeh, bwese-ei ndramak ari, badan imek udu bada sau eme. Oro anya kabwese iy keme bolo asiu, ma kadeu iy kudu mada Jises.

¹⁹Arile iri lau solo-an labai, eme oro san ta bwese iy ili bolo asiu bwe. Eme oro bwese-ei ndramak dah i loke bwele-e asiu, ano oro bosokei bwele-e asiu dah, ma atehei ndramak dah, in bada nyahan i andri bolo lau nane dah, ili udu mada Jises.

²⁰Ya eme Jises anyolom budon toro handru, eme iy tiye i ta ndramak dah, “Kawas tek, kandriyen ndra-in tam ndrasikinei ndra-au.”

²¹Eme oro lau ta leheya kandriyen tiri Juwis, hawe oro Parasi badeh, asehek i toro ari ari anya, “Iy ndramak kede-eh bobose o! Iy aluhe Kindrei kede-eh! Ari ndramak winiyan basikine kandriyen ndra-in bwe; Kindrei le ari, kabwe!”

²²Eme Jises badeh, ndratanan budon toro, eme iy tiye i toro, “Tasah handru ado ndremenya solo-an udu ndrine ado?

²³San manamun ndraheh, katiye, ‘Kandriyen ndra-in tam ndrasikine ndra-au,’ deh, bwe katiye, ‘Ou suri ou, ma ou adek.’

²⁴Jo winiyan leheya ewek tado ma ado ki tana ado, ta Nadu Ndramak Awas badeh, boto-on labai udu bwele-e munyak dah ta tiye i ta ndramak ta mani kandriyen ndra-in tan iu.” Eme Jises tiye i ta ndramak badan imek dah, “Jo tiye tam, ou suri ou, ou andrei nyahan tam ma ou au a kon!”

²⁵Ano suwi labai, iy suri iy eme loken udu mada iri mari, ma andrei nyahan tan nane, ma iy atudun Kindrei udu bohon, ma iu i kon.

²⁶Eme iri mari badeh, mani iri atur handru en, ma iri atudun nyara Kindrei. Ya boho iri asak, ma iri tiye i buku doh, “Taha na dah badeh, ndranyolom kalem randrah labai.”

²⁷Ano Jises eme len badeh, iy atou ndramak ari ta akohok luk ta takis, nyaran Libai, iy manyah ereu bolo asiu tan ta gok ta akohok luk ta takis. Eme Jises tiye i tan, “Ou ame an hamon tek.”