Lucangundru 5:4-27

⁴Nulu matja mudana jaura jatana, Nau Simoningu jatana wonti: “Ngapa mandraia bota ngarilkamai, ja jama jurani woranau paru patala!”

⁵Ja Simonali kalabana wonti ja jatana wonti nunkangu: “Kaparajai, ngaiani tinkawirdi jiglerali ngankana warai ja panila patana warai; ja jinkani jaurani ngato jama worala nganai.”

⁶Ja tanali jenia ngankana, tanali paru marapu patana wonti, ja jama tanani puraterina wonti.

⁷Ja tanali kamaneli tanani bota nguruni marali karkana wonti tana wokarananto marangokala; ja tana wokarana wonti ja bota wulana manamiri ngankana wonti ngampu kunakutinanto.

⁸Simon Petrulu jenia najina, nau Jesungu pantjani woraterina wonti ja jatana wonti: “Kaparajai, ngakangundru dunkau, ngangau ngani kana madlentji nganai!”

⁹Ngangau nau japali ngaruparana wonti, ja pratjana nunkangunto, jenia paru marapundru, tanali jelali patana warai.

¹⁰Jeruja bakana Jakobus ja Johannes Zebedäuni ngatamura wulu Simonani kamaneli. Ja Jesus Simoningu jatana wonti: “Wata japali nganau; ngangau kararindru jidni kana maninietja nganala nganai!”

¹¹Ja tanali bota wulana dirkalani tirimalkana wonti ja pratjana worarana wonti ja nunkangu karipaterina wonti.

¹²Ja jendranguta Nau ngura kulnuni nganana wonti, ja mai, kana kulno gambanto, nulu Jesus najina, nau mudlani woraterina wonti ja nunkangu ngatjina wonti ja jatana wonti: “Kaparajai, jidni jertapaterinani, jidni ngurunguru nganai ngana kulikiri ngankala.”

¹³Ja Nau mara warpina wonti ja nina karakarana wonti ja jatana wonti: “Ngani jertapateriai, kulikiri nganamai!” ja nurujeli gamba nunkangundru kutingana wonti.

¹⁴Ja Nulu nunkangu jirijiribana wonti wata kulnuni jenia kaukaubala, a-ai, wapau, ja Priestani wondrateriau, ja jinkani kulirkanandru jenia poto jinkiau, worderu Mosili jirijiribana wonti, tanangu malka nganananto.

¹⁵Ja jaura nunkangundru kanani marurina wonti, ja kana wolara nunkangu jurborina wonti nina ngarala, ja tanani muntjandru nunkangundru tepi manila.

¹⁶Nau kurukurumalkaterina wonti pitarani ja ngatjina wonti.

¹⁷Ja jendranguta ditji kulnuni Nulu ngujangujara jinkina wonti; ja jerra Pharisaia ja jirijiribani jaura jinkinietja ngamana wonti, tana Galilaia ja Judaia ngura pratjanandru ja Jerusalemingundru wokarana wonti; ja Kaparaia ngurula nganana wonti tanana tepi ngankala.

¹⁸Ja mai, materali kana kulno wokaralkana wonti turarani pirini paranani, nau tjunduru nganana wonti; ja tanali wontina wonti nina wirilkala ja nunkangu terkibala.

¹⁹Ja tanali kana wolarandru wata mankamankana wonti, worderu tanali nina wirilkananto, tana punga mangatandrani tarana wonti, ja nina turarani pirieli punga mangatandrandru ngarilkana wonti, tanangu terti Jesungu.

²⁰Ja Nulu tanani morlalu ngundrana matja najina, Nau nunkangu jatana wonti: “Kanajai, madlentji jinkani matja worana warai!”

²¹Ja jaura jinkinietjali ja Pharisaiali wonina wonti ngundrala ja jatana wonti: “Worana Naupini nganai, Nulu ngirkibani jaura jatai Godani? Worana ngurunguru nganai madlentji kalingala, kalitakali Goda kulnulu?”

²²Jesulu tanani ngundrana matja talku ngujamana, Nulu kalabana wonti ja tanangu jatana wonti: “Mma jura ngarali juranali ngundrai?

²³Mina morla ngaua nganai jatala kara: Madlentji jinkani matja worana, jatala kara: Terkakamai ja wirariau?”

²⁴Ngangau jura ngujamananto Kanaia Ngatamurajeli ngurula ngamalkai mitani madlentji worala, Nau tjundurani jatana wonti: “Ngani jinkangu jatai: Terkakamai, turarani piri jinkani patau, ja pungaia jinkanaia tikau!”

²⁵Ja nurujeli nau tanangu milkini terkakana wonti, ja nulu turarani piri, nunkangu nau parana, patana wonti, ja pungaia nunkanaia tikana wonti ja Goda jurakokana wonti,

²⁶Ja pratjana pirna ngaruparana wonti, ja tanali Goda jurakokana wonti ja japali pirna pantjina wonti ja jatana wonti: “Ngaiani nguja tula karari najina warai.”

²⁷Ja ngadani Nau wapana wonti, ja Nulu mardatandra kampanietja najina wonti, tala nunkani Levi, kampani pungani ngamanani, ja Nau nunkangu jatana wonti: “Ngakangu karipateriau!”