Luka 5:4-27

⁴I ribaribalautom, abo i ribalau Simona arinai, i ene, “U dobi gabotum eai, hiana u galaedi u eama.”

⁵Simona arinana i heuio i ribalau ia arinai i ene, “Tanuagagu e, boni ai eama maratom, ai hesabaasa ai boau: taiede na oa u riba wa abo hiana ea galaei.”

⁶Se galaeyao, eama gamagamagari se heonadi: edi hiana se heaipurisi, arinai

⁷adi sasaguyao hari waga eai wa se nimaoidi, bena se laoma se saguidi. Isi se laoma waga labui wa se usahesahesariridi.

⁸Simona Petero ie ita, i guridobi Iesu turina gegesina eai, i ene, “U laugabaegu; Guiau e, eau tau baaea.”

⁹Paana ia, eo isi gamagaridi maenayao eama se hai wa, se noonooei:

¹⁰Iamesi, eo Ioane, Sebedaio nanatunayao, Simona ana sasaguyao, hinage se noonooei. Iesu abo i ribalau Simona arinai, i ene, “Tabu u matausi; maraitom asubena tatao abo u aiaitoa.”

¹¹Edi waga se herisaedi, edi ginauri gamagamagari abo se laugabaedi ia se hemuriwatai.

¹²Ia eanua esau eai, tau esau tauna maudoina lepera i laugirihai, ia Iesu ie ita i gurisalaoba matana eai, i aibodalau ia arinai, i ene, “Guiau e, ena u henua abo u heaagu.”

¹³Iesu nimana i helelelaei, i abiita, i ene, “Ea henua: abo u aa.” Ma esega abo tau wa ana lepera i lautom.

¹⁴Iesu tau wa i lauhesom, i ene, “Tabu u wasawasaei tau esau arinai, se heaam wa arinai u lau mo Kohena arinai, doha Mose i ribaei abo u mosei, ina laulau ta u hemasaraha aridi eai.”

¹⁵Taiede, ia wasana lailai ie tubugorigori, moutuadi lailai se tupagogoma ia arinai bena se ataiei, eo edi asiebo bena i hemauridi.

¹⁶Na ia i lausuara barbara eai, i lauuura.

¹⁷Asubena esau eai, i heaheatadi, Parisea eo tausonoga tataodi headi se babawa ia gegesina eai, eanua gamagamagari Galilaia eai, eo Iudea eai, eo Ierusalema hinage aridi eai se laoma: Guiau ena gigibori eai arinai i hemauridi.

¹⁸Tatao headi tau esau i palisi ma hatahatana se baheiama: bena se heawasae, se tore Iesu matana eai, dobila se eooi.

¹⁹Bena se heawasae moutuana se guduguduidi dobila se eooasa, arinai se awasae numa dagelana eai, atohi se soelapai abo se hedawedobei boeadi eai Iesu nuanuana eai.

²⁰Edi sunuma wa ie ita, i ribalau ia arinai, i ene, “Tau e, em baaea se ribagigiridio.”

²¹Tauuriuri eo Parisea abo se heunaboisaha, si ene, “Ina eai Eaubada i arina baaeai? Eai baaea ribagigiridi abina i ata na Eaubada iabom mo?”

²²Iesu edi nuatu i nuatulobaidio, edi nuatu i heuio i ribalau aridi eai, i ene, “Aue saha au heuheunaboisaha nuamiu eai?

²³Aitea i masamasaraha ede, ea ’ne, ‘Em baaea se ribagigiridio,’ e ea ’ne, ‘U toro u laulau?’

²⁴Na bena abo au ita Tau Natuna tanoubu eai ta ia gigiborina eai baaea i ribagigiridi, (arinai asiebo palisi tauabina i heriba, i ene,) ‘ea heribam ta, u toro, em eba u launou, u lau em numa eai.’”

²⁵Ma esega abo matadi eai i torohai, ena abaeno i abiisini, i laugabaedi i lau ena numa eai, Eaubada i hedebasae.

²⁶Isi gamagaridi se noonooei eo Eaubada se hedebasae, se matausi dumaduma, si ene, “Ginauri sahasahadi wau ta ta itadi?”

²⁷Ginauri wa muridi eai abo ie lau, takisi tautano esana Levi ie ita, numa telona eai ie bawa: i ribalau ia arinai, i ene, “U hemuriwataiguma.”