Luku 5:4-27

⁴Ana nanekema huvama nereno'a Saimoninku anage hu'ne, Antuma timoma avu'hanihanima huneama'afi aretufe kantu antenka, kukonka'a nozamema avazu hananku atrenkago.

⁵Hianagi Saimoni'a kenona'a anage hu'ne, Ramoke, tagra tusi amuho huta meni keragera noza azeri naku tusi'a amuho eri'za erinonanagi, magora aze'oritfaza hu'none. Hianagi Kagrama hana kere kukoni'a ataregahue.

⁶Anama hute'za zamagra tusi nozamezga azerizageno kukozamimoa agafa huno tagato hu'za hu'ne.

⁷Anama hige'za, zamagra mago onensa ventefima maninaza knampa zamirega eme zamaza hihogu kezanke hugantu atrage'za zamagra e'za tarega onensa venterarena emeri avitageno, anantarega ventemokea tirami'za hu'na'e.

⁸Hianagi Saimon Pita'a negeno'a, Jisasi agafi renareno anage hu'ne, Ramoka nagri navatetira ogantua vuo. Na'ankure nagra kumimo avite'nea ne'tfa mani'noe!

⁹Na'ankure Pita'ene, ruga'a nagama agrane mani'naza nagamo'za nozamema zamagrama azeri'naza zankura, tusi'za hu'za antri hu'naze.

¹⁰E'i anazanke huke Zebedi ne'mofo Jemisike, Jonikea znagogogu hu'na'e, Saimoni ene tragote'za erizana e'nerizane. Higeno Jisasi'a Saimoninku anage huno asami'ne, Korera osuo, amaretima agafa hunka vnanana, vahera zamavregahane.

¹¹Onensa vente'zamia eri'za tinkenare'ma vute'za, mika zazmia anante netre'za, Jisasi amage ante'naze.

¹²Jisasi'ma mago ra kumapima umani'negeno'a, mago nera fugo namumo miko avufga azeri anovazi'nea ne'mo, Agrite e'ne. Jisasima eme negeno'a, avugosaregati mopafi prihuno unemaseno anage hu'ne, Ramoka nazeri so'e hunaku'ma kvemasisigenka, Kagra amane nazeri so'e huo.

¹³Higeno Jisasi'a azana avufare avako nehuno anage hu'ne, Nagrima navesiana, kagra so'e huo higeno, ana fugo namumo'a ame huno ana zupage atrente'ne.

¹⁴Anante Agra ana ne'ku hunteno, vahera ozamasmio. Hianagi kagra Prisi nete vunka, kagraka'a ome averinka Mosesima huneagante, ofa erinka ome hugeno, fugo namumo'a hago vgare hu'za vahemoza kageho.

¹⁵Hianagi anama hu'nea avu'avazamofo kemo vuno eno higeno, tusi'a vahe kevumo'za Agri ke nentahisageno, krizmia eriamane hanie hu'za e'naze.

¹⁶Hianagi anama hutageno, akoheno Jisasi'a zamatreno vahe omani ka'ma kopi viazamo nunamu ome hutere hu'ne.

¹⁷Mago knazupa Jisasima rempima hu'nezamige'za anampina Farisi vaheki, kasegerema ugagote'naza vahe'enena tavaoma'are mani'naze. (Zamagara mago mago kumateti Galilitima, Judiati'ma, Jerusaletima hu'za Agrane emani'naze.) Higeno Ra Anumzamofo vahe'ma zamazeri knamare hanavea, Agripi me'negeno zmazeri so'e hu'ne.

¹⁸Anama hutegenoa anante, mago'a vahe'mo'za sesenku hu'za avufa fri'nea ne' zafa hu'za e'naze. Zamagara ana krinera Jisasi avuga eri'za ufre'za ome antenaku ana'ana hu'naze.

¹⁹Hianagi eri'za ufre kankamuna hakare'za erifore osu'naze. Na'ankure tusi'a vahekrerfamo hiza hazageno, ana'nera eri'za nomote mareri'za, no amumpa eri akasine'za ana sesenku'aga atrageno vahe amu'nompinti Jisasina avuga fatgo huno uramine.

²⁰Jisasi'ma ana nagamokizmi zamentintima negeno'a, Agra anage hu'ne, Ronenimoke, miko kumika'a ama apase kantoe.

²¹Anante kasegere ugagota hunaza vahe'ene, Farisi vahe'moza agafa hu'za ke hakare hu'za, ama nera i'za Anumzamofona huhaviza nehie? Iza Agra huno kumira apasenegantoe nehie. Anumzamoke kumira apasegahianki?

²²Hianagi Jisasi'a ha'arente antahintahima antahi'zana nezmageno, Agra anage hu'ne, nahigetma tamagra e'inahu antahintahia tmagu'afina nehaze?

²³Inana kemo oza hanigena hugahue, Kumika'a apasegantoe kemopi, Otinka vuo hanua kemo'e?

²⁴Hu'neanagi e'inahu hanigenka, kagra kenka antahinka nehunka, Vahe'mofo Mofavremo'a ama'na mopafina, hanavea eri'neankino kumira amane apase zamantegahie hunka hugahane. Nehuno ana avufga fri'nea nera asami'ne, Nagra negasmue, otinka sesenkuka'a enerinka nonkarega vuo huno hunte'ne.

²⁵Hagi zamagri zamufi ame' huno otino, mase'nea tafe'a enerino Anumzamofo agi erisaga hume noma'arega vu'ne.

²⁶Anama hiazamo zamagrira zamazeri zamanovazige'za, ananteti agafa hu'za Anumzamofo agia erisga nehazageno, kore'zamo zamagripina avitege'za, ruzahu zantafa menina kone, hu'za hu'naze.

²⁷Anama huteno Agra megi'a nevuno omegeana, takisi zago zonegia nera agi'a Liva'e mago'a agi'a Matiu'e nehaza ne'mo zago zogi nompi mani'negeno agriku huno, Namage eno.