ᤗᤢᤁᤠ 5:4-27

⁴ᤂᤢᤏᤧ᤹ ᤐᤠ᤺ᤵᤔᤠ ᤛᤢᤖᤢᤀᤠᤱ ᤛᤡᤔᤥᤏᤧᤴ ᤔᤧᤳᤋᤢ. “ᤂ᤺ᤱᤒᤣᤴ ᤏᤠ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤖᤧᤀᤠᤱ ᤕᤥ᤺ᤱᤅᤡᤴ ᤗᤧᤵᤋᤧ᤹॥”

⁵ᤜᤧᤰᤁᤣ᤺ᤸᤗᤧ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤏᤠᤶᤍᤠ᤺ᤳᤋᤠ᤺ᤳ ᤕᤥ᤺ᤱ ᤗᤧᤵᤔᤏᤠᤛᤠᤱ ᤅᤠᤎᤡᤰᤁᤠᤱ ᤔᤧᤕᤠᤱᤄᤢᤶᤒᤧᤴᤗᤥ. ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤗᤧᤵᤋᤢᤱᤛᤠ᤹ᤖᤢᤱᤗᤥ॥”

⁶ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣ ᤕᤥ᤺ᤱᤅᤡᤴ ᤗᤧᤵᤋᤢᤸᤗᤧ ᤕᤖᤡᤰ ᤅᤠᤜᤠ᤹ ᤔᤧᤎᤩᤧᤀᤠᤱ ᤕᤥ᤺ᤱᤅᤡᤴᤏᤣ ᤋᤧ᤺ᤱᤔᤠ ᤀᤡ᤺ᤳᤋᤧᤖᤥ॥

⁷ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤘᤣ᤹ ᤂᤢᤏᤡ᤹ ᤋᤣ᤺ᤱᤈᤢᤶᤜᤠ᤹ ᤘᤣ᤹ ᤂ᤺ᤱᤒᤣᤴ ᤑᤧᤳᤋᤧᤶᤔᤧ᤹ᤀᤠᤱ ᤀᤠᤓᤠ᤹ᤖᤧᤶᤔᤧ᤹ᤀᤥ ᤗ᤹ᤖᤡᤰ ᤜᤢᤰᤆᤠ᤺ᤸᤁᤡ᤺ᤸᤗᤧ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤏᤧᤵᤔᤠᤱ ᤂ᤺ᤱᤒᤣᤜᤠ᤹ ᤅᤠ᤺ᤸᤗᤧ ᤋᤡᤶᤛᤧᤀᤠᤱ ᤏᤡ᤺ᤶᤔᤠ ᤀᤡ᤺ᤳᤋᤧ॥

⁸ᤛᤡᤔᤥᤏ ᤐᤋᤪᤢᤛᤖᤧ ᤁᤴ ᤏᤡ᤺ᤛᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤛᤠ᤹ᤖᤡᤰ ᤗᤠᤕᤥᤒᤠ ᤔᤏᤠᤀᤠᤖᤥ. ᤂᤧᤏᤧ᤹ᤏᤢ ᤘᤠ᤹ᤔᤠ ᤔᤧᤗᤠ᤹ᤀᤠᤴᤗᤥ. ᤗᤧᤖᤠᤱ ᤌᤩᤠᤱᤅᤧ᤹ᤀᤥ॥”

⁹ᤌᤣᤀᤠᤱᤓᤧᤸᤗᤧ ᤛᤡᤔᤥᤏ ᤏᤢ ᤁᤢᤴᤈᤢᤶᤜᤠ᤹ᤖᤧ ᤔᤧᤎᤠᤛᤢᤛᤡᤒᤠ ᤅᤠᤜᤠ᤹ ᤔᤧᤀᤡ᤺ᤳᤋᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥

¹⁰ᤛᤡᤔᤥᤏᤖᤧ ᤁᤢᤴᤈᤢᤶ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺ᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤛᤡᤖᤧᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤛᤡᤔᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹. ᤅᤠ ᤁᤧᤍᤧᤶᤛᤢᤒᤠ ᤜᤧᤰᤁᤣᤀᤣ ᤀᤠᤸᤗᤀᤠᤱᤎᤥ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤏᤠ ᤁᤧᤍᤧᤶᤒᤠ ᤁᤧᤍᤠ᤺ᤵᤐᤠ ᤁᤧᤒᤥ᤺ᤱᤗᤥ॥”

¹¹ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂ᤺ᤱᤒᤣᤜᤠ᤹ ᤁᤢᤕᤠᤀᤥ ᤔᤧᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤗᤧᤖᤢ ᤔᤧᤎ᤺ᤀᤠᤱ ᤕᤧᤛᤢ᤺ᤴ ᤔᤧᤏᤠ᤺ᤳᤋᤢᤖᤥ॥

¹²ᤌᤡᤰ ᤕᤧᤴ ᤕᤧᤛᤢ᤺ᤴ ᤗᤳᤇᤠ ᤐᤠᤱᤈᤢᤶᤔᤥ ᤘᤕᤧᤸᤗᤧ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠᤎᤡᤰ ᤂᤧᤵᤔᤥ ᤋᤩᤧ॥ ᤂᤧᤸᤗᤧ ᤕᤧᤛᤢ᤺ᤴ ᤏᤡ᤺ᤛᤢᤀᤠᤱ ᤁᤢᤍᤃᤡ ᤛᤠᤶᤒᤥ᤺ᤴ ᤑᤴᤇᤡᤱᤗ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤗᤥᤃᤣ᤹ᤗᤠᤶ ᤘᤣ᤺ᤶᤔᤠ ᤁᤧᤛᤢᤰᤁᤠᤖᤥ॥”

¹³ᤕᤧᤛᤢᤖᤧᤀᤠᤱ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤛᤢ᤺ᤛᤢᤖ ᤂᤧᤴ ᤔᤏᤠ᤺ᤴ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤁᤧᤏᤢ᤹ᤖ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥” ᤜᤧᤰᤁᤩᤠᤱ ᤂᤡᤔᤥ ᤂᤧᤴ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠ᤺ᤴ ᤏᤢ᤺ᤖᤧᤖᤥ॥

¹⁴ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤔᤧᤳᤋᤢ. “ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤴᤏᤧ᤹. ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤧᤛᤠ᤹ᤖ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹. ᤜᤧᤰᤁᤩᤠᤱ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤔᤏᤠᤜᤠ᤹ ᤏᤢ᤺ᤖᤠᤱ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠᤛᤡᤖᤧ ᤗᤠᤃᤡ ᤛᤡᤍᤢᤱᤈᤓᤠ ᤆᤥᤃᤧ᤹ᤀᤥ॥”

¹⁵ᤁᤖᤛᤠᤱ ᤁᤴ ᤐᤠ᤺ᤴᤏᤡᤴ ᤁᤠᤰ ᤐᤡᤛᤠᤱ ᤛᤧ᤺ᤖᤧᤀᤠᤱ ᤕᤧᤛᤢᤖᤧ ᤁᤢᤒᤠ᤺ᤴ ᤂᤧᤶᤛᤧ ᤏᤢ ᤂᤢᤏᤡ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤏᤢᤛᤡᤱᤛᤧ ᤕᤖᤡᤰ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤩᤧ॥

¹⁶ᤁᤖ ᤕᤧᤛᤢ᤺ᤴ ᤀᤧᤳᤗᤧᤱ ᤔᤏᤠᤗᤢᤶᤔᤥᤗᤠᤶ ᤛᤧᤴᤇᤡᤱᤅᤠᤱ ᤋᤢᤘᤠ ᤆᤥ᤺ᤰᤛᤧ ᤀᤣ᤺ᤰᤛᤠᤍᤧᤴᤏᤥ ᤐᤣᤖᤥ॥

¹⁷ᤌᤡᤰ ᤕᤧᤴ ᤕᤧᤛᤢ᤺ᤴ ᤔᤏᤠᤜᤠ᤹ ᤂᤠᤜᤢᤴ ᤜᤢ᤹ᤖᤢᤛᤡᤖ ᤕᤢᤅᤧᤸᤗᤧ ᤂᤧᤵᤔᤥ ᤃᤠᤗᤡᤗ ᤏᤢ ᤕᤜᤢᤍᤡᤕᤠᤛ᤻ᤔᤠ ᤕᤖᤡᤰ ᤐᤠᤱᤈᤢᤶᤔᤥᤗᤠᤶ ᤜᤧᤰᤁᤩᤠᤱ ᤕᤖᤢᤛᤗᤧᤔᤗᤠᤶ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤠᤱ ᤔᤧᤍᤩᤧᤀᤠᤱ ᤂᤠᤜᤢᤴ ᤔᤧᤄᤧᤵᤛᤢᤖ ᤔᤧᤕᤢᤅᤧ॥ ᤕᤧᤛᤢᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤘᤣ᤺ᤶᤔᤠ ᤁᤢᤔᤢᤰᤛᤠᤶᤔᤡᤴ ᤁᤳᤋᤢᤀᤠᤱ ᤘᤕᤧ.

¹⁸ᤜᤧᤰᤁᤩᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤗᤱᤗᤧ᤺ᤱᤘᤠ ᤔᤏᤠ᤺ᤴ ᤁᤢᤏᤧᤳᤏᤠ᤺ᤴᤏᤢᤀᤣ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤋᤣ᤹ᤔᤠᤀᤠᤱ ᤏᤧᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢ.

¹⁹ᤁᤖ ᤂᤧᤵᤔᤥ ᤕᤧᤛᤢ᤺ᤴ ᤘᤕᤧᤒᤠ ᤜᤡᤶᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤀᤠᤱ ᤔᤧᤕᤢᤅᤧᤒᤠᤸᤗᤧ ᤆᤥᤃᤢᤸᤗᤧ ᤛᤡᤃᤠᤱ ᤋᤣ᤹ᤔᤠ ᤔᤧᤴᤇᤢᤰᤋᤢᤴ॥ ᤜᤧᤰᤁᤣ᤺ᤸᤗᤧ ᤌᤥ ᤂᤠᤶᤒᤢᤀᤥ ᤔᤧᤗᤠ᤺ᤛᤧᤀᤠᤱ ᤂᤠᤶᤒᤢ᤺ᤴ ᤔᤧᤜᤴᤍᤢ॥ ᤜᤧᤰᤁᤩᤠᤱ ᤗᤱᤗᤧ᤺ᤱᤘᤠ᤺ᤴ ᤁᤢᤏᤧᤳᤏᤠᤏᤢᤀᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤕᤧᤛᤢᤖᤧ ᤁᤢᤍᤃᤡ ᤕᤥ ᤔᤧᤜᤥᤛᤢ ᤔᤧᤎᤠᤛᤢᤖᤥ॥

²⁰ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤏᤡ᤺ᤛᤢᤀᤠᤱ ᤂᤧᤴ ᤗᤱᤗᤧ᤺ᤱᤘᤠ ᤔᤏᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤖᤥ॥”

²¹ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤀᤰᤂᤣᤗ᤹ᤖᤡᤰ ᤔᤧᤀᤡ᤺ᤳᤋᤢ. “ᤁᤴ ᤔᤏᤠ᤺ᤴ ᤜᤠ᤺ᤵᤐᤣ᥅ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤁᤧᤒᤠ᤺ᤵᤐᤠ ᤁᤴ ᤔᤏᤠ᤺ᤴ ᤜᤠ᤺ᤵᤐᤣ᥅ ᤗᤠᤕᤥᤗᤠᤶ ᤗᤧᤵᤔᤡ ᤐᤡᤔᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧᤀᤠᤱ ᤔᤧᤛᤢᤰᤋᤢᤴᤗᤥ॥”

²²ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤌᤧᤔᤠ ᤔᤧᤀᤡ᤺ᤳᤋᤢᤖ ᤔᤧᤕᤢᤱ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡ᤺ᤛᤢᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤰᤋᤱᤒᤠ ᤌᤣᤀᤠᤱ ᤁᤧᤀᤡ᤺ᤳᤋᤢᤶᤒᤠᤒᤣ᥅

²³ᤁᤴ ᤗᤱᤗᤧ᤺ᤱᤘᤠ᤺ᤴ ‘ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧ’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅ ᤀᤡ ‘ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠ᤺ᤴ ᤂᤵᤛᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰ᥅

²⁴ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤴᤇᤠᤶᤛᤠ᤺ᤸᤗᤧ ᤗᤠᤕᤥ ᤗᤧᤵᤔᤡ ᤐᤡᤔᤠ ᤕᤢᤰ ᤁᤳᤋᤢ᤹ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ.” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤗᤱᤗᤧ᤺ᤱᤘᤠ ᤔᤏᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤁᤧᤜᤡᤶᤔᤥ ᤌᤠᤛᤡᤱᤅᤧ᤹॥”

²⁵ᤂᤡᤔᤥ ᤂᤧᤴ ᤂᤢᤏᤡ᤹ ᤋᤃᤡᤀᤣ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤢᤏᤧᤳᤏᤠ᤺ᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤁᤢᤜᤡᤶᤔᤥ ᤌᤠᤛᤡᤱᤗᤥ॥

²⁶ᤁᤧᤖᤧᤰᤗᤧ ᤂᤢᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤕᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤔᤧᤒᤡᤖᤢᤖ ᤔᤧᤒᤠ᤺ᤳᤋᤢ. “ᤀᤰᤋᤱᤒᤠᤃ ᤀᤠᤏᤡᤃᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤡᤃᤧᤖᤥ॥”

²⁷ᤕᤠᤱᤛᤡ ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤗ᤺ᤴᤍᤧ ᤐᤣᤀᤠᤱ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠ ᤗᤧᤒᤡ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠ᤺ᤴ ᤀᤣ᤺ᤱᤕᤠᤱ ᤑᤥ᤺ᤱᤔᤠ ᤋᤧᤴᤏᤥ ᤕᤢᤅᤧᤒᤠ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”