Luk 5:4-27

⁴Ntɛ ɛsak kəlok-loku mɔ, k’oloku Simɔŋ: «Məcɔŋnɛ nde pəntukmɛ mɔ, nəgbal manta monu nəsumpər lop.»

⁵Kɔ Simɔŋ oloku kɔ: «Wəkiriŋ, pibi pampɛ fəp səc-gbal manta, mba ali paka səsɔtɔ fɛ. Mba ntɛ məloku ti mɔ, kəgbal k’inder manta.»

⁶Ntɛ ɛŋgbal manta mɔ, k’osumpər lop yɛlarəm haŋ kɔ manta moŋcop kəwalɛ.

⁷Kɔ ŋawe anapa aŋan akɔ ŋanayi abil ŋa mɛrəŋ ŋɔkɔ disrɛ mɔ, kədemar ŋa. Kɔ akakɔ ŋander, kɔ ŋalas cəbil cacɔkɔ mɛrəŋ haŋ cəc-faŋ kəkalɛ.

⁸Ntɛ ɛnəŋk tatɔkɔ mɔ, kɔ Simɔŋ Piyɛr ɛntɛmpɛnɛ Yesu wɛcək dəntɔf, k’oloku: «Wəbɛ, məbɔl’em! Fum wəciya iyɔnɛ.»

⁹Kɔ kusu kəwos kɔ, nkɔn kɔ akɔ ŋanayi mɔ fəp, teta lop yɔkɔ ŋanasumpər mɔ.

¹⁰Itɔ pənayi sɔ asol a Simɔŋ, Sak kɔ Saŋ, awut a Sebede. Kɔ Yesu oloku Simɔŋ: «Ta mənesɛ! Kəyɛfɛ mɔkɔ, afum ŋɔ mənde məc-fɛkəs oŋ.»

¹¹K’asumpər lop akakɔ ŋampɛnɛ cəbil dɛgbɛp, kɔ ŋasak ca fəp, kɔ ŋaŋcɛpsɛ Yesu darəŋ.

¹²Dare dɔlɔma dɔ Yesu ɛnayi. Kɔ wərkun wəlɔma nwɛ sen sənasumpər dis fəp mɔ, ender. Ntɛ ɛnəŋk Yesu mɔ, k’ɛntɛmpɛnɛ dəntɔf, k’ɛŋcəpɛ Yesu tobu, k’ɛlɛtsɛnɛ kɔ: «Wəbɛ, kɔ məfaŋ-ɛ, məntam kəsɔkəs’im.»

¹³Kɔ Yesu ɛntɛŋc kəca, k’oŋgbuŋɛnɛ kɔ, k’oloku: «Ifaŋ ti! Məsɔk!» Gbəŋcana babɔkɔ kɔ sen səsak fum wəkakɔ.

¹⁴Kɔ Yesu oloku kɔ: «Ta məloku ti fum o fum, mba məkɔ məmentərnɛ wəloŋnɛ ka Kanu. Məloŋnɛ sɔ teta kəsɔkəs kam pəmɔ tɔkɔ Musa ɛnacic ti mɔ, ntɛ tɔŋsɔŋɛ afum fəp ŋacərɛ a məntamnɛ mɔ.»

¹⁵Tewe tɔn tɛŋc-sam kəsam dəm, afum alarəm ŋac-loŋkanɛ kəcəŋkəl kɔ, kətɛn ka kətaməs ka docu daŋan.

¹⁶Mba kɔ Yesu owur afum dacɔ, k’ɔŋkɔ nde dətɛgbɛrɛ dəkəlok-lokər Kanu.

¹⁷Dɔsɔk dɔlɔma Yesu pəc-təksɛ. AFarisi kɔ atəksɛ a sariyɛ ŋandɛ. Ŋayɛfɛ-yɛfɛ sədare sa tɔf ya Kalile kɔ Yude, kɔ dare da Yerusalɛm. Kɔ fənɔntər fa Kanu Kəpɔŋ fəyi kɔ Yesu, ntɛ tɔŋsɔŋɛ pəc-taməs acuy mɔ.

¹⁸Kɔ afum ŋander, ŋagbaŋnɛ wətɔkɔt dəyala, ŋac-sɛp kəbɛrɛ kəkɔ-boc kɔ fɔr ya Yesu kiriŋ.

¹⁹Ntɛ dɛlay da afum dɔsɔŋɛ ŋa kətɔsɔtɔ dəkəbɛrɛ mɔ, kɔ ŋafərəŋk kəlɔ kəroŋ, kɔ ŋaŋkɔ ŋafeni kəlɔ dareŋc kəfo kəlɔma, kɔ ŋantorɛ wətɔkɔt nwɛ pəyi dəyala yɔn afum dacɔ, Yesu fɔr kiriŋ.

²⁰Ntɛ Yesu ɛnəŋk kəlaŋ kəŋan mɔ, kɔ Yesu oloku fum nwɛ: «Aŋaŋnɛn’am kiciya kam!»

²¹Atəksɛ sariyɛ kɔ aFarisi ŋayɛfɛ kəcɛm-cɛmnɛ, ŋac-yifnɛ: «Fum wəre ɔfɔ wəkawɛ ɛŋfani Kanu mɔ? Ana ɛntam kəŋaŋnɛnɛ kiciya, kɔ pəntɔyɔnɛ Kanu sona-ɛ?»

²²Kɔ Yesu ɛŋcərɛ pɛcɛm-cɛmnɛ paŋan, k’oloku ŋa: «Ta ake tɔ nəŋcɛm-cɛmnɛnɛ mɛcɛm-cɛmnɛ mamɛ dəbəkəc-ɛ?

²³Ake ’cuca kəloku pətas: ‹Aŋaŋnɛn’am kiciya kam,› kɔ kəkulɛ ka fɔ: ‹Məyɛfɛ məkɔt-ɛ?›

²⁴Awa kəsɔŋɛ konu kəcərɛ a Wan ka fum ɛntam nnɔ doru kəŋaŋnɛnɛ ka kiciya: K’oloku wətɔtam kəkɔt, ‹Ic-lok’əm: Məyɛfɛ! Məlɛk yala yam, məkɔ nde ndaram!›»

²⁵Gbəŋcana babɔkɔ kɔ fum wəkakɔ fɔr yaŋan kiriŋ, k’ɛlɛk yala yɔn, k’osumpər dɔpɔ kəkɔ nde ndɔrɔn pəc-cam debeki da Kanu.

²⁶Kɔ cusu cəwos afum fəp, kɔ ŋayɛfɛ kəcam debeki da Kanu. Kɔ kənesɛ kəyi ŋa, ŋac-loku: «Sənəŋk mɔkɔ ntɛ səntatɔ-nəŋk mɔ.»

²⁷Ntɛ tatɔkɔ teŋcepər mɔ, kɔ Yesu owur k’ɛnəŋk wəbaŋəs dut wəlɔma, nwɛ aŋc-we Lewy mɔ, pəndɛ nde aŋgbaŋcan ŋa abaŋəs dut. Kɔ Yesu oloku kɔ: «Məyɛfɛ məcəm’em darəŋ.»