Lukas 5:4-27

⁴Na tahuna i vara lobo, i takia e Simon, i ta maea, “O vore pori na hini i utu, o ru purua a vuko vomu, o lakavu a manu.”

⁵E Simon i koli, i ta maea, “Bakovi Dagi, mi ru a vuko na rodo i vano i palala a hini, pali mi ngopu. Pali ga ru tabua a vuko, a vuhuna o taki iau ga rua.”

⁶Lakea e huriki a tahodari ri ru tabua a vuko. I uka ma i tabaka, ri koro a maka manu i kupo hateka, lakea a vuko i popote ge marape.

⁷Lakea ri gale e huriki a turane ria na aga tara ri gi valai ri gi kori ria. Ri lakavu rike a maka manu, ri vakavonu a aga nga, i popote ru gu mabubu.

⁸Na tahuna e Simon Petrus i masia a maki i bele maea, i turume puru tabukoi na vahane Isu i ta maea, “Bakovi Dagi, o ha nau. Iau a bakovi hale!”

⁹I ta mavonga, a vuhuna i turutu vona a maka manu ri lakavu i kupo gala hateka.

¹⁰E Iakop, e Ioanes, re tune Sebedi, rua a tahodari turane Simon. Rua ranga ru turutu. Muri e Isu i takia e Simon i ta maea, “Naha ni mangenge. Muga o lakavu a manu, pali ngane bara o tuli e huriki a bakovi ri gi valai nau.”

¹¹Lakea ru kaka rike na lavu a aga, ru taparaki vonga a maka maki lobo ne rua, ru muri maia e Isu.

¹²Na parava tara e Isu i made na tanga tara. A bakovi tara, i ratapilea a patala, i valai maia. Na tahuna i masia e Isu, i tabuli barara puru na malala i nanea e Isu i ta maea, “Bakovi Dagi, ioe bara o ngaru, o vakamatapado iau.”

¹³Lakea e Isu i toto talea a limana, i padoia, i ta maea, “Iau a ngaru go matapado. O matapado.” I malaviriri kunana i malaharuri vona a patala.

¹⁴Lakea e Isu i taki tora ia, i ta maea, “Naha ni vakalongoa tara viri. Pali o vano, o vakasiri ioe na prister, o habi a nihabi na viri ni vakamatapado, ge manga a hini e Moses i here puru hosi. O rata mavonga, e huriki ri gi matakilaka vona ioe ni vakamatapado pali.”

¹⁵Pali a velengane Isu ni longo na tanga lobo. Lakea i kupo e huriki ri valai ne Isu, ri gi longoa a nitana, ri ngarua ge vakamahuri ria.

¹⁶Pali na parava i kupo i ha taro ria, i lakea na robo i ngeki, i vasileki vonga.

¹⁷Na parava tara e Isu i vara e huriki. E huriki a Pariseo, a mari na vinara, ria ranga ri made vonga. Ri valai na tanga lobo na tabeke ne Galili, ne Iudea, ne Ierusalem. A Vure i habi a nitora na Bakovi Dagi, ge vakamahuri e huriki na gilanga.

¹⁸I uka ma i tabaka e huriki a bakovi ranga ri kaloho vilia a bakovi i beu i mahita na moke. Ta ga ri gi bole dilia na roho, ri gi ru tabukoi ia na matane Isu.

¹⁹Pali ri keri ni bole dilia, a vuhuna i ala kupo hateka e huriki ri vapesihi lae, ri longoa e Isu i vara. Lakea ri bole rikea na mapana ruma, ri pukea a mapana ruma, ri vakatavore purua turana moke vona, i puru na kurukurune huriki tabukoi na ngalane Isu.

²⁰Na tahuna e Isu i matai ria ri luhoi torea, i takia a bakovi i beu, i ta maea, “Turagu, a puga vuroki a naro hale vomu.”

²¹Lakea e huriki a Pariseo, a mari na vinara ri vanana, “E rei ra bakovi iea, ra i ngaru ni bole a murina Vure? I uka tara bakovi tavula ge puga a naro hale, a Vure kikeri kunana.”

²²E Isu i lohoka vona a niluhoi ne ria, lakea i nana ria, “I navai mu luhoi mavonga?

²³I vai a ngava i kavakava ga takia? Ga taki, ‘A puga vuroki a naro hale vomu,’ o ga ta maea, ‘O pesi rike o laho?’

²⁴A ngaru mu gu matakilaka vona a Tuna Bakovi i tahoka a nitora koea na malala ge puga vuroki a naro hale.” Lakea i takia a beu i ta maea, “A taki ioe, o pesi rike, o bolea a moke vomu, o hamule na ruma vomu.”

²⁵I malaviriri kunana i pesi rike na matane ria, i bolea a moke vona. I laho lakea na ruma vona, i kavurikea a Vure.

²⁶E huriki lobo ri ngapa, ri kavurikea a Vure. Ri turutu vona a maki ri masia, lakea ri ta maea, “Mona si masia a maki ni turutu vona.”

²⁷Muri e Isu i pagitala, i masia a bakovi ni bole a takis, a rana e Levi. I mamade na roho na takis. Lakea e Isu i takia, “O muri nau.”