Lucas 5:4-27

⁴Echiriꞌ xukꞌis rukꞌutunik, jewaꞌ xubꞌiꞌij che ri Simón: —Woꞌora chakꞌama bꞌi ri barco chupa ri mar pa lik cho wi y chilikꞌij taq kꞌu ri atarraya chiriꞌ chaꞌ jelaꞌ kebꞌichap kar —xcha che.

⁵Ri Simón xukꞌul uwach: —Lal tijonel, ronoje raqꞌabꞌ xojchakunik y na jinta kar xqachapo. Noꞌj we rilal kintaq la, kanꞌan riꞌ —xcha che.

⁶Echiriꞌ xkilikꞌij bꞌi ri atarraya, xekichap ukꞌiyal kar y ri atarraya xujeqo karaqarobꞌik.

⁷Ekꞌuchiriꞌ, xkiꞌan pan kiqꞌabꞌ chike ri kachbꞌiꞌil e kꞌo chupa ri jun chik barco chaꞌ kepetik y kebꞌoꞌlkitoꞌoꞌ. Echiriꞌ xebꞌopon ri kachbꞌiꞌil, junam xkibꞌalij lo ri kebꞌ barco che kar y ruma laꞌ ya laj kemuqutajik.

⁸Ri Simón Pedro echiriꞌ xril waꞌ, xuxuk ribꞌ chwach ri Jesús y jewaꞌ xubꞌiꞌij che: —Chel ko la wukꞌ, Wajawal. Na taqal ta chwe kꞌo la wukꞌ ma in jun achi aj mak —xcha che.

⁹Xubꞌiꞌij waꞌ ri Pedro ma ruma rukꞌiyal kar xekichapo, lik xok xiꞌin ibꞌ rukꞌ junam kukꞌ konoje ri e kꞌo rukꞌ pa ri barco;

¹⁰jekꞌulaꞌ xok xiꞌin ibꞌ kukꞌ ri Jacobo y ri Juan; rike e ukꞌajol ri Zebedeo y e rachbꞌiꞌil ri Simón. Pero ri Jesús xubꞌiꞌij che ri Simón: —Maxiꞌij awibꞌ; chwi woꞌora katuꞌan at aj molol tikawex pachaꞌ aꞌanom lo chike ri kar —xchaꞌ.

¹¹Ekꞌuchiriꞌ xkesaj lo ri barcos chupa ri mar, xkiya kan ronoje waꞌ y xeterej bꞌi chirij ri Jesús.

¹²Ri Jesús kꞌo chupa jun tinamit re Galilea echiriꞌ xopon jun achi rukꞌ, yey waꞌchi lik katajin uqꞌayik rucuerpo ruma ri yabꞌil lepra. Rire echiriꞌ xril uwach ri Jesús, xuxuk ribꞌ chwach, xuqasaj rupalaj chuꞌlew y xutzꞌonoj che: —Wajawal, we kaꞌaj ko la, josqꞌij la ri nucuerpo che wa yabꞌil —xchaꞌ.

¹³Ekꞌuchiriꞌ, ri Jesús xuchap pana rukꞌ ruqꞌabꞌ y jekꞌuwaꞌ xubꞌiꞌij che: —Kuaj, chuꞌana bꞌa chom riꞌ racuerpo —xchaꞌ. Xew kꞌu xukꞌis ubꞌiꞌxikil waꞌ, na jampatana xsach ri yabꞌil kꞌo che rachi.

¹⁴Ekꞌu ri Jesús xutaq che na kutzijoj ta waꞌ che junoq. Xubꞌiꞌij kꞌu che: —Jat chwach raj chakunel pa Rocho Dios chaꞌ rire karilo na jinta chi lepra chawe. Y ruma rajosqꞌikil, chayaꞌa kꞌu chwach ri Dios ri qasaꞌn xtaqan kan ri Moisés che, chaꞌ kaqꞌalajin chikiwach ri tikawex at kunutajinaq chik —xchaꞌ.

¹⁵Na rukꞌ ta kꞌu riꞌ, e ruma taq ri kuꞌan ri Jesús, rutzijoxik Rire katajin más retaꞌmaxik kuma ri winaq y lik kꞌu e kꞌi kakimol kibꞌ chaꞌ kakita ri kubꞌiꞌij y kekunutaj bꞌi che ri kiyabꞌil.

¹⁶Noꞌj ri Jesús kel bꞌi, keꞌek pa taq luwar katzꞌintzꞌotik re kuꞌana orar.

¹⁷E xuꞌan waꞌ jun qꞌij echiriꞌ ri Jesús kakꞌutun chikiwach ri winaq. Etzꞌul kꞌu chiriꞌ ri fariseos y raj kꞌutunel re ri tzijpixabꞌ; rike e petinaq Jerusalem y pa taq ri tinamit y raldeas re Galilea y re Judea. Yey ruchuqꞌabꞌ ri Dios Qajawxel kꞌo rukꞌ ri Jesús chaꞌ kakunanik.

¹⁸Y xekꞌun kꞌu lo jujun achijabꞌ kitelem lo jun achi sik chwa chꞌat. Xkaj kꞌu kakikoj bꞌi pa ja chaꞌ kakiya chwach ri Jesús,

¹⁹pero na xkiriq taj saꞌ rukojik bꞌi kuma rukꞌiyal winaq. E uwariꞌche xebꞌaqꞌan chwi ri ja, xkesaj julepaj che ruwiꞌ, xkiqasaj kꞌu lo ri sik e laꞌ kotzꞌol chwa ruchꞌat y xkiya chwach ri Jesús chikinikꞌajal ri winaq.

²⁰Echiriꞌ ri Jesús xril ri kubꞌulibꞌal kikꞌuꞌx rukꞌ, jewaꞌ xubꞌiꞌij che ri sik: —Achi, ronoje ramak kuytajinaq chik —xchaꞌ.

²¹Ekꞌuchiriꞌ, raj kꞌutunel re ri tzijpixabꞌ y ri fariseos xkijeq kakichꞌobꞌ raqan: «¿Saꞌ ruwach waꞌchi? Rire kamakun chirij ri Dios echiriꞌ kubꞌiꞌij kukuy mak. Ma ¿na xew ta nebꞌa ri Dios aj kuyul mak?»

²²Ekꞌu ri Jesús xunaꞌbꞌej saꞌ ri kakichꞌobꞌo; ruma kꞌu riꞌ, xubꞌiꞌij chike: —¿Suꞌchak jelaꞌ katajin chikꞌuꞌx alaq?

²³¿Saꞌ kꞌu ri na kꞌayew taj kambꞌiꞌij: “Ronoje ramak kuytajinaq chik” o “Chatyaktajoq y chatbꞌinoq”?

²⁴E kuaj kꞌut ketaꞌmaj alaq waꞌ: Ralaxel Chikixoꞌl Tikawex yaꞌtal puqꞌabꞌ kukuy taq ri mak ke ri winaq che ruwachulew —xchaꞌ. Xubꞌiꞌij kꞌu riꞌ che ri sik: —Chatyaktajoq, chakꞌama bꞌi rachꞌat y jat chaꞌwocho —xchaꞌ.

²⁵Chupa kꞌu laꞌ la joqꞌotaj xyaktaj ri sik chikiwach. Xukꞌam kꞌu bꞌi ruchꞌat pa ri kotzꞌol wi y xeꞌek chirocho, e riꞌ lik kuyak uqꞌij ri Dios.

²⁶Konoje kꞌu riꞌ lik xkam kanimaꞌ che y xkijeq kakiyak uqꞌij ri Dios. Y ruma ri xiꞌin ibꞌ kꞌo pa kanimaꞌ chwach ri Dios, xkibꞌiꞌij: «Waqꞌij qilom ruchuqꞌabꞌ ri Dios» xechaꞌ.

²⁷Chukꞌisbꞌal re waꞌ, xeꞌek ri Jesús y xril jun achi aj tzꞌonol puaq re tojonik, Leví rubꞌiꞌ, tzꞌul pa ri luwar pa kaꞌan wi ri tojonik che ri gobierno. Y ri Jesús xubꞌiꞌij che: —Chat-terej lo chwij —xchaꞌ.