Lukaj 5:4-27

⁴I lao kaimwijokela a majan, ap majani on Jimon: Jeijei kowei waja lol, ap kaduedi oma uk kan, pwe koma en jaikidi.

⁵A Jimon japen potoan on i: Main, je laiter pon lao lel waja ran, ap jota jaik at, ari jo ar majan, me i pan kaduekidi uk en.

⁶Irail lao wiadar met, rap oro pena mam toto; ara uk ari ola.

⁷Irail ari olole kij arail oko, me mi nin apot jop, pwe re en kodo jauaja irail. Irail ari kodo, kadirela jop riapot, ira ari pan mauidi.

⁸Jimon Petruj lao kilaner mepukat, ap poridi jan Iejuj, potoan on: Main, re kotiwei jan ia, pwe aramaj jued amen nai.

⁹Pwe a puriamuiki o ir karoj, me ian i, pweki jaik ar, me re jaikidi.

¹⁰A pil dueta Iakopuj o Ioanej nain Jepedäuj ol oko, me ian Jimon. Iejuj ap kotin majani on Jimon: Koe der majak, pwe jan anjau wet kokola koe pan jaikidi aramaj.

¹¹Irail kaikilon on liman jap ar jop oko, re ap kajela karoj, idauendo i.

¹²Kadekadeo ni a kotikot nan eu kanim, kilan, ol amen mia, me dir en tuketuk. A lao kilaner Iejuj, ap pupekidi maj a, poeki re a potoan on: Main, ma re kotin kupura, re pan kak on kamakel ia da.

¹³I ari kotin kapawei lim a jair i majani: I men, koe en makelekel. Ari, a tuketuk madan modi jan.

¹⁴I ari kotin inapwiedi i, en der indan meamen; a kola kajale on pein uk jamero ko, o kida mairon, pweki om makelekeladar, me Mojej majanier, pwen kadede on irail.

¹⁵A a madan indand jili o pokon kalaimun pokon pena, pwen ron i o kelailada jan ar jomau kan.

¹⁶I ari kotin kelepela nan jap tan, pwen laolao.

¹⁷Kadekadeo eu ran ni a kotin kaukaweweda, Parijär o jaunkawewe kan, me mod imp a, irail pwarado jan kanim en Kaliläa o Iudäa karoj o jan Ierujalem; a rojon en Kaun o pwili wei jan i, kakelada amen amen.

¹⁸A kilan, ol akai roado aramaj amen me kokon madak, rap raparapaki duen ar pan kak walan lole, pwilikidi mo a.

¹⁹A ni ar jota kak diar waja, me re pan kai don impa pweki pokon o, rap dauda pon im o, kakiridi i nan oj ianaki pet, lao nan pun arail mon Iejuj.

²⁰A lao mani arail pojon, ap kotin majani: Aramaj o, dip om akan lapwa jan uk er.

²¹A jaunkawewe o Parijär akan ap monemoneloleki indada: Ij men et, me kin lalaue? Ij me kak lapwada dip akan, pwe Kot eta?

²²A Iejuj lao mani ar monemonelol, ap kotin japen majani on irail: Da me komail kin monemoneloleki lol omail?

²³Da me monai ren inda, dip om akan lapwa jan uk er, de inda, uda, aluwei?

²⁴A pwe komail en aja, me Nain aramaj manaman on lapwada dip akan nin jappa, iei me a kotin majanieki on me kokon madak: I indai on uk, uda, ale ki om kola deu om!

²⁵A madan uda mo ’rail, kida a pet, me a wonon poa, koieilan im a kapikapina Kot.

²⁶Ir karoj ap puriamui kida o kapikapina Kot, o dire kila majak indada: Ran wet kitail kilaner me kapwuriamui melel.

²⁷Murin mepukat a kotila jan waja o, ap majani jaunopwei amen, ad a Lewi momod nan wajan nopwei, ap majan on i: Idauen ia do!