LUCAS 5:4-27

⁴Chene wluzh wnii Ne lo yra mén guin, re Ne lo Simon: ―Gutsano bark ledne gyëtdee, lex gutxoon xgyix de chen ynëëz de mël.

⁵Wke Simon, re Simon: ―Maxter, ydebgyëëlendxee kalaa noo dxiin yra noo; bet mël wnëëzdet noo. Per kom laa de rkyeen, tsatxoon noo we ste.

⁶Chene wtxoon meno, kesentyent ndal mël wnëëz men, axtegue rrëz xgyix men.

⁷Lex wluu men senye lo xkompanyer men ne nuu ste lenbark guin, chen tsa men gun men xyudar men. Lex wa men, wsezaa men mël yrup bark axtegue mer nzebgyëto.

⁸Ne wii Simon neguin, wzuzhib men lo Jesus, re men: ―Gubetxee lo noo Dechey, porke mendol nak noo.

⁹Kesentyent wdxe Simon yra Simon men ne ndxinno Simon nga por tant ndal mël wnëëz Simon yra Simon men.

¹⁰Zenga ke wdxe Xwa yrup Xwa Jacob ne nak xkompanyer Simon; xpee Zebedew nak yrup menree. Orguin re Jesus lo Simon: ―Ydxedet de. Desde orree gak de men ne ylaa mén xpén Dëdyuzh.

¹¹Chene wdxinno men bark runis, wsan men yrandxoo. Lex zanal men Jesus.

¹²Tebtir chene ka Jesus te gyëz, wdxiin te mgyeey ne rzak gyiz ne la lepra; zegne wii men Jesus, wzuzhib men lo Ne axtegue wtee lo men lyu, wnab men lo Ne, re men: ―Dechey, belnaal yna de zun de gan yneseyaken de noo.

¹³Lex wzegaa Ne nya Ne wtee No led men, re Ne lo men: ―Sna noo. Gugyaken. Orgueguin wyaken led mén guin.

¹⁴Lex re Ne lo men: ―Rut lo guedet de neree; nonchee lo fxuz gutsa gutsaluu led de no gutsaron xgoon de ne che wakndaa de nes lo Dëdyuzh zegne zëëd lo ley ne wdee Dëdyuzh lo Moises chen gaknan mén ne che wyaken led de.

¹⁵Per dxe kon dxe mazre zarëëts diiz yra ne rlaa Jesus, no ndal mén rdop lo Ne chen gon men ne rzëët Ne no chen yneseyaken Ne men.

¹⁶Per rrunsu Ne lo men yra men, ra Ne ledne yëtet mén ranab Ne lo Dëdyuzh.

¹⁷Te dxe ne kaneluu Jesus mén, nga zob tebëd men ne nak farisew no le tebëd maxter ley ne wruu yra gyëz ne nak lo lyu ne la Galilea no le ne nak lo lyu ne la Judea no le Jerusalén. Wdee Dëdyuzh poder lo Jesus chen yneseyaken Ne mén.

¹⁸Lex wdxiin tebëd mén wdxinneey men te mgyeey ne noze waknet led, zhoob men te lo lonwin. Rlaan men ndee men lenyuu chen ngyix men mengyiz guin lo Ne.

¹⁹Per rakdet tee men por tant ndal mén ndxin. Orguin wyeep men xtoo yuu, wlis men tebëd tezh; lex nes guin wlit men mengyiz guin ydebxloon men, wgyix men men lo Ne gwrooltee lad yra mén guin.

²⁰Chene wii Ne ne rlaleedx yra mén guin Ne, re Ne lo mengyiz guin: ―Le xdol de che wak perdon.

²¹Orguin nuu lextoo men ne nak farisew yra men maxter ley: “¿Txu nak ménree ne rnii men diznyaan por Dëdyuzh? Rut rundet gan gun perdon xdol mén, sinke nonchee Dëdyuzh run gan run perdon xdol mén.”

²²Per wdeegue Jesus kwent gan kox nuu lextoo men, lex re Ne lo men: ―¿Penak rlebleedx de zegwa?

²³¿Pe mazre mbëëdee gue noo lo mén: “Le xdol de che wak perdon”, u ne gue noo: “Gutsaxee, gugya”?

²⁴Orree kwii de yra de gante ne Men ne wdxiid wak Mén rap men poder nee gyëzlyuree por ne gun men perdon xdol mén. Lex re Ne lo mengyiz guin: ―Yna noo lo de, gutsaxee gulis xloon de, gugya ruxyuu de.

²⁵Orgueguin waxee men nes lo yra mén guin, wlis men xloon men ne waa men lo, lex sya men ruxyuu men, ryaldet rzaknon men Dëdyuzh.

²⁶Wzee wzak yrandxee mén guin, wzelo men no men wzaknzoon Dëdyuzh; kesentyent rdxe men yra men, re men: ―Nedxeree wii be ne gardetlel kwii be.

²⁷Zhich guin wruu Jesus nga. Lex wii Ne lo te men ne la Leví ne rgoob zeg impwest, zob men ledne rezh zeg impwest, lex re Ne lo men: ―Gutanal noo.