Lucas 5:4-27

⁴Y conda cꞌapa ucanse e gente, uyare e Pedro y che: —Yara chic abarco tiaꞌ más intam e jaꞌ y juric chic ichijr tuaꞌ ixcorma, che e Jesús.

⁵Pero e Simón Pedro uyare e Jesús y che: —Pero Niwinquiraret, tunor e acbꞌar war capatna y ma incojt chay catajwi, pero cocha net war awareon tuaꞌ caxin cayari cachijr otronyajr, caxin cache bꞌan cocha war awareon era, che e Simón.

⁶Y conda uyariobꞌ e chijr tama e jaꞌ y cay uquerejbꞌobꞌ tari uchijrobꞌ otronyajr cay uwirobꞌ que bꞌutꞌur uchijrobꞌ taca e sian chay este que cꞌanix awejrtzꞌa.

⁷Entonces e Pedro cay uche e seña tut upiarobꞌ xeꞌ turobꞌ tama otronteꞌ barco tuaꞌ watar utacriobꞌ tuaꞌ ulocsiobꞌ e chijr taca e sian chay. Entonces yopobꞌ y cay ubꞌutꞌiobꞌ chatertiꞌ e barco era taca e sian chay este que cꞌanix amuctzꞌa e barco macuir e jaꞌ umen ubꞌarir e sian chay.

⁸Pero e Simón Pedro conda uwira lo que numuy era ixin cotuan tut e Jesús y che: —Loqꞌuen tama niwejtzꞌer, Niwinquiraret, porque nen ajmabꞌambꞌaniren toit, che e Pedro.

⁹Bꞌan ojron e Pedro umen que bꞌacta uwira e sian chay lo que cormobꞌ, y bꞌan ubꞌan tunor tin e turobꞌ tacar.

¹⁰Y bꞌan ubꞌan e Santiago y e Juan xeꞌ jax uyunenobꞌ e Zebedeo xeꞌ war apatnobꞌ taca e Pedro. Pero e Jesús sutpa uyare e Pedro y che: —Ira ibꞌacta, porque coner era net tuaꞌ icay icorma pero mixto jax chay yaꞌ sino que winicobꞌ tuaꞌ apejca taca uyojroner e Dios, che e Jesús.

¹¹Entonces conda cꞌapa uqꞌuechiobꞌ ixin e barco esto tutiꞌ e jaꞌ, uyactobꞌ tunor lo que ayan ani tuobꞌ y ixiobꞌ taca e Jesús.

¹²Pues entonces tama inyajr conda e Jesús turu tama inteꞌ chinam, cꞌotoy inteꞌ winic tuyejtzꞌer xeꞌ ayan cora sian chec tut xeꞌ ucꞌabꞌa lepra xeꞌ uyacta ubꞌa cotuan tut e Jesús y uchꞌubꞌa ujor xijrcojt este tut e rum tuaꞌ ucꞌajti tuaꞌ atacarna. Y uyare e Jesús y che: —Niwinquiraret, jay net acꞌani atzꞌacpesen uyubꞌiet ache, porque meyra ayan acꞌotorer, che e winic.

¹³Entonces e Jesús upacbꞌu ucꞌabꞌ tama ujor e winic y che: —Nen incꞌani intzꞌacpeset. Cꞌani inware e chec era que: “Loqꞌuen actan e winic era”, che e Jesús. Y conda cꞌapa ojron e Jesús, wacchetaca quetpa tzꞌacpesbꞌir e winic.

¹⁴Entonces e Jesús uyare e winic que machi tuaꞌ uchecsu tut e gente lo que chena tacar. Y de allí ojron e Jesús y che: —Quiqui tama e templo tama e chinam Jerusalem y chectes abꞌa tut inteꞌ sacerdote y ajcꞌun incojt arac tuaꞌ apurutna tujor e altar bꞌan cocha chꞌar tzꞌijbꞌabꞌir tama uley e Moisés. Y tamar era erer unatobꞌ tunorobꞌ que net tzꞌacpesbꞌiret inyajrer, che e Jesús. Entonces e winic ixin uche bꞌan cocha arobꞌna umen e Jesús.

¹⁵Pero cay tajttzꞌa meyra e Jesús umen tunor e gente tamar lo que cay uche. Y meyra gente war umorojse ubꞌobꞌ tut e Jesús tuaꞌ uyubꞌiobꞌ uyojroner y tuaꞌ atzꞌacpesnobꞌ umener ubꞌan.

¹⁶Pero e Jesús locꞌoy ixin tama inteꞌ choquem lugar tuaꞌ ucꞌajti taca e Dios.

¹⁷Pues entonces tama inteꞌ día e Jesús war acanseyan tut e gente, y ya turobꞌ cora fariseobꞌ y cora ajcanseyajobꞌ tama uley e Moisés xeꞌ war uyubꞌiobꞌ. Pues cꞌotoyobꞌ tunor e nuquir winicobꞌ era tama tunor e chinamobꞌ tama e departamento Galilea y tama e departamento Judea y tama e chinam Jerusalem. Y tama e hora era checta ucꞌotorer Cawinquirar Dios tama e Jesús tuaꞌ utzꞌacpes tin e ajmuac.

¹⁸Entonces cꞌotoyobꞌ cora winicobꞌ tuyejtzꞌer e Jesús xeꞌ war uqꞌuechiobꞌ axin inteꞌ winic xeꞌ chamen ucuerpo tama uchꞌacteꞌ. Cꞌani ani uyosiobꞌ macuir e otot tuaꞌ uchꞌabꞌuobꞌ tut e Jesús.

¹⁹Pero cocha machi utajwiobꞌ tiaꞌ tuaꞌ oꞌchoyobꞌ umen e sian gente, tꞌabꞌayobꞌ tama ujor e otot y upasiobꞌ ujor e otot y uyemsiobꞌ e ajmuac tama uchꞌacteꞌ tujam e gente tut e Jesús.

²⁰Y conda e Jesús uwira e winicobꞌ era que meyra war acꞌupseyanobꞌ tama e Dios, uyare e ajmuac y che: —Winiquet, natan que incꞌumpa tacaret tuaꞌ asatpa tunor amabꞌambꞌanir, che e Jesús.

²¹Pero tin e ajcanseyajobꞌ tama uley e Moisés cay ubꞌijnuobꞌ taca e fariseobꞌ jaxobꞌ taca y chenobꞌ: —¿Chi ca nic e winic era que war uqꞌuijnes e Dios tacar uyojroner? Porque mamajchi erer usati e mabꞌambꞌanir sino que ajtaca e Dios, che e nuquir winicobꞌ era.

²²Pero cocha e Jesús war unata tucꞌa war ubꞌijnuobꞌ ojron jaxir y che: —¿Tucꞌa tuaꞌ war ibꞌijnu cocha era?

²³Ma erer inata jay erach niwojroner jay inware que: “Imabꞌambꞌanir ayix e cꞌumpar tamar”, porque ma chequer tiut jay ayan e cꞌumpar o jay machi. Pero jay inware: “Achpen”, wacchetaca erer iwira jay erach niwojroner jay achpa axana e winic o jay machi.

²⁴Pero tuaꞌ inata que nen xeꞌ Uyunenen e winic ayan nicꞌotorer tuaꞌ incꞌumpa tama e mabꞌambꞌanir tara tor e rum, cꞌani inware e winic era xeꞌ chamen ucuerpo tuaꞌ achpa axana tuaꞌ achecta tiut que ayan nicꞌotorer bꞌan cocha war inwareox, che e Jesús. Entonces e Jesús uyare e winic xeꞌ chamen ucuerpo y che: —Inwaret era que achpen waren chꞌama achꞌacteꞌ y cuchu quiqui toꞌtot, che e Jesús.

²⁵Y wacchetaca achpa e winic tut e sian gente era, uchꞌami uchꞌacteꞌ xeꞌ chꞌar ani tamar, y ucuchi ixin tama uyotot war utattzꞌi ucꞌabꞌa e Dios.

²⁶Y tunor e sian gente bꞌactobꞌ ubꞌijnuobꞌ tamar lo que numuy y cay utattzꞌiobꞌ ucꞌabꞌa e Dios. Y war abꞌactobꞌ y chenobꞌ: —Ma tiaꞌ cawira anumuy lo que uche e winic era, che e winicobꞌ era.

²⁷Pues entonces locꞌoy e Jesús tama e otot era y cay xana cora y tamar era uwira ut inteꞌ ajmorojseyaj tumin tuaꞌ e gobierno xeꞌ ucꞌabꞌa Leví xeꞌ turu tama ulugar war ucꞌajti e tumin tama e impuesto. Entonces ojron e Jesús taca e Leví era y che: —Incoꞌ tacaren, che e Jesús.