Luka 5:4-27

⁴Gêjac mata nê biŋ su ma kêsôm gêdêŋ Simon gebe “Asiŋ asa gêdim ana e au nêm wasaŋ êsêp gebe alô i.”

⁵Tec Simon gêjô eŋ awa gebe “Mêtêmôkê, gêbêc samuc tonec aêac ajam wasaŋ e tekweŋ gêbac ma atap ŋanô teŋ sa atom. Mago kêtu aômnêm biŋŋa tec najau wasaŋ êtiam.”

⁶Sêu wasaŋ ma sêkêŋ i taêsam auc e gebe êŋgôŋ wasaŋ êŋgic.

⁷Tec sêjac kajo nêŋ lau waŋ teŋ gebe nasênam jaôŋ sêwi ŋ êsêac, tec sêja ma sêjac i tulu kêsêp waŋ lulu e gebe ênê.

⁸Simon Petere gêlic e gêu tau jagêc Jesu akaiŋŋa ma kêsôm gebe “Apômtau, ômoa nêm lêtêgeŋ, gebe aê ŋac sec.”

⁹Petere to lau samob, taŋ sêwiŋ eŋ naŋ, têtakê kêtu i taêsam, taŋ sêlô naŋŋa.

¹⁰Sebedai latuagêc, Jakobo agêc Joaŋ, taŋ sêwê kaiŋ kôm sêwiŋ Simon naŋ, têtakê amboac tonaŋgeŋ. Go Jesu kês jm gêdêŋ Simon gebe “Ôtêc taôm atom, galoc oc ôlô ŋamalac amboac tonaŋ.”

¹¹Ma êsêac sêsiŋ e jasêsô bau, go dedec nêŋ waba samob gêc ma têdaguc eŋ.

¹²Ŋasawa teŋ Jesu gêmoa malac teŋ ma ŋac teŋ kamocbôm gêjam eŋ auc gêŋgôŋ. Eŋ gêlic Jesu e gêu tau jagêc nom, go keteŋ eŋ gebe “Apômtau, embe têmtac êwiŋ, go ôŋgôm aê jatu selec.”

¹³Tec Jesu kêmêtôc lêma jakêmoasac eŋ ma kêsôm gebe “Aê gabe ôtu selec.” E gacgeŋ ênê kamocbôm gêwi eŋ siŋ.

¹⁴Jesu gêjac jao gebe “Ôsôm biŋ tonec êndêŋ lau teŋ atom.” Ma kêjatu eŋ gebe “Naôtôc taôm êndêŋ dabuŋwaga ma ôkêŋ da êtu kôtu selecŋ a êtôm Mose kêjatu, gebe êwaka nêm biŋ sa êndêŋ êsêac.”

¹⁵Tageŋ Jesunê wae kêtu tapa kêlêlêc, tec lau taêsam sêkac sa sêmêŋ sebe sêŋô ênê biŋ ma êŋgôm êsêacnêŋ gêmac tokaiŋ-tokaiŋ ŋajam êsa.

¹⁶Go eŋ kêtaiŋ tau su kêsa gamêŋ sawaŋageŋ jaketeŋ mec.

¹⁷Gêdêŋ bêc teŋ Jesu kêdôŋ mêtê gêmoa, ma Parisai to biŋsutau aŋga malac Galilaia to Judaiaŋa samob ma aŋga Jerusalem mêŋsêŋgôŋ. Ma Apômtaunê ŋaclai gêjam eŋ sa gêgôm lau gêmac ŋajam kêsa.

¹⁸Ma lau sêbalaŋ ŋac ŋatêkwa kêtu goloŋ teŋ kêsêp mê, tec têtu kêka-kêka sebe sejoŋ eŋ sêsô andu natetoc eŋ ênêc Jesu laŋônêmŋa.

¹⁹Mago têtap lêŋ sejoŋ eŋ sêsô sênaŋa sa atom, gebe lau taêsam. Tec sêpi salôm jasêkip salôm sa ma sêlêwaŋ eŋ tomêgeŋ kêsêp ŋaluŋgeŋ jagêc Jesu laŋônêm.

²⁰Jesu gêlic êsêac sêkêŋ gêwiŋ, tec kêsôm gebe “Ŋac tau, aê kasuc nêm sec ôkwigac.”

²¹Ma biŋsutau to Parisai sêôc aweŋ sa ma têtu kênac gebe “Ŋac tonec asa, tec kêsôm biŋ alôb-alôb amboac tonec nec. Asa gebe êsuc sec ôkwi, Anôtô taugeŋ.”

²²Mago Jesu kêjala biŋ, taŋ êsêac taêŋ gêjam naŋ, ma gêjô êsêac aweŋ gebe “Amboac ondoc tec taêm gêjam biŋ amboac tonaŋ gêc nêm ŋalêlômgeŋ.

²³Biŋ ondoc oc tasôm ŋagaô. Tasôm tonec gebe ‘Aê kasuc aômnêm sec ôkwi’ nec, me tasôm gebe ‘Ôndi sa ma ôsêlêŋ.’

²⁴Ma aê gabe amac ajala gebe Ŋamalacnê Latu kêtu ŋatau aŋga nom gebe êsuc sec ôkwi,” go kêsôm gêdêŋ ŋac ŋatêkwa kêtu goloŋ gebe “Aê jasôm êndêŋ aôm gebe Ôndi sa. Ôluŋ nêm mê sa ma ôêc ôna nêm andu.”

²⁵Ŋac tau gêdi sa sep tageŋ gêdêŋ êsêac mateŋanô sêlic, go kêluŋ nê mê, taŋ eŋ gêc naŋ, sa ma gêc gêja nê andu ma kêlanem Anôtô.

²⁶Lau samob têtakê ŋanô ma sêlambiŋ Anôtô tonêŋ ŋalêlôm ŋatutucgeŋ ma sêsôm gebe “Ocsalô tonec aêac alic gêŋ kaiŋ teŋ.”

²⁷Jesu gêgôm tonaŋ su, go kêsa gêja e gêlic teloŋ teŋ, ŋaê Lewi, gêŋgôŋ teloŋ maleŋ ma kêsôm gêdêŋ eŋ gebe “Ôndaŋguc aê.”