1Jek savato, kana o Isus naćhelas maškar e njive, lešće učenikurija trgonas o điv e vastenca thaj hanas.
2A varesave katar e fariseja phendine lenđe: “Sostar ćeren so naj muklino te ćerelpe ande e Mojsijasko zakono savatone?”
3A o Isus phendas lenđe: “Zar či čitosardine ando Sveto Lil okova so ćerda o David kana bokhajlo, vo thaj okola kaj sas lesa?
4Kana dija ando ćher e Devlesko, thaj lijas e mangre save sas posvetime, hala thaj dija vi okolenđe save džanas pale leste. A khonik prema e Mojsijasko zakono čitromanas te hal osim e rašaja.”
5Thaj phendas lenđe: “Isto gajda, o Čhavo e Manušesko majbaro si vi katar o savato.”
6A jek aver savato o Isus dija ande sinagoga thaj sikavelas, a okote sas o manuš savesko desno vas sas šuko.
7E farizeja thaj e sikavne e Mosiješće zakonestar inćarenas pe jakha pe leste te dićhen dali sastarela ando savato te došaren les.
8A vo džanglas e gndimata lenđe, thaj phendas e manušesće e šuće vastesa: “Ušti thaj ač maškaral.” A vo uštilo thaj ačhilo maškaral.
9A o Isus phendas lenđe: “Te phučav tumen: “So si muklino savatosa te ćerelpe, lačhipe ili bilačhipe? Te spasilpes o trajo ili te hasarelpe?” A von samo ačhenas.
10A o Isus dikhlas pe lende savorende thaj phendas e manušesće e šuće vastesa: “Inzar ćo vas.” A vo ćerda gajda thaj o vas lesko sastilo thaj sasto sago vi aver.
11Akala e fariseja thaj e sikavne e Mojsiješće zakonestar holjajle thaj ćerdine svato maškar pende so te ćeren e Isuseja.
12Ande godoja vrjama o Isus đelo pe gora te molilpes. Okote ačhilo sasti rjat thaj molilas pe e Devlešće.
13Thaj kana avilo o đes, akhardas pire e učenikonen, thaj losarda maškarlende e dešudujen, thaj akhardalen apostolurja a lenđe alava sas:
14O Simon (saves o Isus dija alav Petar), thaj o Andrija (e Petresko phral), o Jakov thaj o Jovan, o Filip thaj o Vartolomej,
15o Matej thaj o Toma, o Jakov (savo sas čhavo e Alfejevesko) thaj o Simon (savo sas pobunjeniko),
16o Juda (čhavo e Jakovesko), thaj o Juda (andar o gav Iskariot, savo izdaisardale).
17Pale godova o Isus fuljisto lenca tele thaj ačhile po ravno than. Okote sas baro brojo lešće učenikurija thaj o silno them andar o krajo e judejako, andar o Jerusalimo, andar o Tiro thaj andar o Sidon e gava po more.
18Von aviline te ašunenles thaj te sastarelen katar lenđe nasvalimata, a avenas vi okola saven mučinas e bilačhe duhurja, thaj o Isus oslobodilas len.
19Thaj sa o them rodelas te čhon pe vas pe leste, kaj andar leste inkljelas e sila thaj von sa sastonas.
20Vo dikhla pe pire učenikurija thaj phendas: “Blago tumenđe save sen čore, kaj si tumaro o carstvo e Devlesko.
21Blago tumenđe save sen akana bokhale, kaj čaljona. Blago tumenđe save akana roven, kaj asana.
22Blago tumenđe kana e manuša mrzana tumen, kana odbacina tumen, kana ladžarena tumen, thaj kana phenena pale tumende kaj sen bilačhe, zbog godova kaj sledin e Čhaves e Manušesće!
23Aven bahtale ande godola đesa thaj ćhelen, kaj dik, bari si tumari poćin ando nebo. Kaj sa godova bilačhipe isto gajda amaro them ćerelas amare prorokonenđe ande lenđe vrjama.
24Ali teško tumenđe save sen akana barvale, kaj već primisardine e uteha tumari.
25Teško tumenđe kaj sen akana čaljarde, kaj bokhavona. Teško tumenđe kaj asan akana, kaj rovena thaj tuguina.
26Teško tumenđe kana savora lačhe mothona pale tumende, kaj isto gajda amaro them ćerelas amare hohamne prorokonenđe ande lenđe vrjama.”
27“Ali tumenđe save ašunen phenav: Volin tumare dušmajen! Ćeran lačhipe okolenđe save mrzan tumen!
28Blagoslovin okolen kaj dentumen romaja! Molintumen e Devlešće pale okola save vređon tumen.
29Ako vareko pećel tut pe jek rig e muješći, bolde lešće vi aver rig. Ako vareko lijas ćiro ogrtači, deles vi ćiro gad.
30Ko manđel tutar, deles. A okolestar kaj otmil ćiro na rode palpale.
31Thaj askal, sar kaman te ćeren e manuša tumenđe, gajda ćeren vi tumen lenđe.
32Thaj ako volin samo okolen kaj tumen volin, sošći avela tumari poćin? Kaj vi e bezehale volin samo okolen save len volin.
33Thaj ako ćeren lačhipe samo okolenđe kaj tumenđe ćeren lačhe, sošći avela tumari poćin? Kaj vi e bezehale ćeren gajda.
34Thaj te den udžile samo okolen katar save ažućaren te bolden tumenđe, sošći avela tumari poćin? Kaj vi e bezehale den e bezehalen udžile te šaj palem dobin palpale.
35Volin tumare dušmajen, ćeren lenđe lačhipe, den len udžile thaj na ažućaren khanči te bolden tumenđe. Ako ćeren gajda, avela bari tumari poćin, thaj avena čhave e Majbarešće, kaj si vo lačho čak vi okolenđe kaj si nezahvalne thaj vi e bilačhenđe.
36Aven dakle bare ileja sago kaj si vi tumaro nebesko Dad bare ileja.
37Na sudisaren, thaj či sudilape tumenđe. Na osudisaren thaj či avena osudime. Jartosaren thaj jartolape tumenđe.
38Den, thaj dela pe tumenđe. Čhordola pe tumenđe ande angalja lačhi mera, nabime, ćhinosardi thaj preobilno kaj sošće merava merisaren kasavijava vi tumenđe merilape.
39Thaj phendas lenđe akaja usporedba: “Dali šaj o koro e kore te vodil? Či li perena liduj ande hv?
40Naj o učeniko majbaro katar piro sikavno. Svako savo si sikado dži ko krajo, avela sago vi o sikavno lesko.
41Sostar dićhes e kaštešći prušuk ande jak ćire phralešći, kana či haćares o baro kaš ande ćiri jak?
42Sar šaj phenes ćire phralešće: 'Phrala, ažućar te inkalav e kaštešći prušuk savo si ande ćiri jak', kana ni korkoro či haćares o baro kaš ande ćiri jak? Dvolično! Maj sigo inkal o baro kaš andar ćiri jak, thaj majlačhe dićheja e kaštešći prušuk te inkales andar ćire phralešći jak.”
43Lačho kaš či bijanel bilačhe plodurja, thaj bilačho kaš či bijanel lačhe plodurja.
44Kaj svako kaš pe piro plodo pindžarelpe. E smokve thaj e drak či kušenpe katar e kangre.
45Lačho manuš, andar e lačhi riznica pire ilešći inkalel lačhipe, a o bilačho manuš andar e riznica bilačhe ilešći inkalel o bilačhipe, kaj andar o muj inkljel sova si pherdo o ilo.
46“Sostar akharen aman: 'Gospode! Gospode!' a naj sen pačivale okolešće so phenav tumenđe?
47Sikavava tumenđe pe kaste anel svako savo avel mande, ašunel mungre alava thaj si pačavilo mungre alavenđe:
48Slično si sago o manuš savo gajda ćerel o ćher: hanada handuk thaj postavisarda o temelji pe stena. Kana avili e poplava, o paj navalisarda po ćher, ali naštik haradales kaj sas lačhe sagradime.
49A kova savo ašundas mungre alava a naj pačavilo mungre alavenđe, vo si sago o manuš savo vazdas piro ćher pe phuv bi temejesko, pe savo navalisarda o paj, odma harada o ćher, thaj katar godova ćher nastanisarda bari ruševina.
