1Askal ćida pes majbut milje manuša, gajda kaj jek avrešće uštavenas e pungre. Ali o Isus prvo phendas pire učenikonenđe: “Len tumen sama kaj o farisejsko licemerje buljol sago o kvasco savo šukljarel sasto humer.
2Kaj avel e vrjama kana sa so si garado avela arakhado thaj sa so si tajno ašundola angle savorende.
3Zato, sa so phendine ande tama ašundola po svetlo thaj sa so phendine varekašće po kan ande sobe katar e krovurja propovedilape.”
4O Isus nastavisardas: “Phenav tumenđe mungre drugarenđe: na daran katar okola save šaj te mudaren samo o telo, a pale godova naštik ćeren tumenđe khanči.
5Ali phenava tumenđe kastar trubun te daran: daran katar o Del savo, šaj lel o trajo thaj askal čhudel les ando pakao. Lestar daran!
6Pa či li bićinenpe pandž čiriklja pale samo duj lovora? Pa palem ni jećhe lendar o Del či bistrel.
7A tumenđe si svako bal po šoro đinado. Zato na daran! Kaj sen e Devlešće maj vredne nego but e čiriklja!”
8Ko akate pe phuv anglo them priznajil kaj pripadil manđe, pale leste me o Čhavo e Manušesko phenava, angle anđelja e Devlešće kaj pripadil manđe.
9Ali okova savo odreknilpe mandar angle manuša akate pe phuv, gajda vi me odreknivaman lestar angle anđelurja e Devlešće.
10Ali phenav tumenđe ko god mothol alav protiv mande o Čhavo e Manušesko, jartolape lešće. Ali okolešće ko vređol (hulil) po Sveto Duho, či jartolape lešće.
11A kana anena tumen po sudo thaj ande sinagoge, angle poglavarja thaj angle vlast, na vodin briga so phenena te branin tumen!
12Kaj o Sveto Duho ande godova časo sikavela tumen so te phenen.”
13Vareko maškar o them phendas lešće: “Sikavneja, phen mungre phralešće te podelil manca so muklas amenđe amaro dad.”
14Pe godova o Isus phendas lešće: “Manuša, ko čhuta man te avav tumaro sudco ili deliv maškar tumende?
15Askal phendas savorenđe: “Lentumen majdur katar svako pohlepa, kaj o čačo trajo či avel katar okova so situmen.”
16Askal o Isus phendas lenđe akaja prispodoba: “Varesave barvale manušesće but bijanda e phuv
17thaj ačhilo te gndil ande peste: “So te ćerav? Kaj najman kaj te čhav sa akava so bijanda manđe e phuv.”
18Thaj phendas: “Ake so ćerava! Haravava mungre žitnice thaj vazdava majbare thaj okote čhava sa mungro điv thaj mungro lačhipe.
19Askal phenava korkoro manđe ake situ ande zalihe but lačhipe pale but e brš kaj aven. Dušo mungrije, akana odmoritu, ha, pi thaj veselitu!”
20Ali o Del phendas lešće: “Bigođavereja! Već arjat mereja! A sa so ćidan, kasko avela?
21Gajda avela okojeja kaj ćidel pešće barvalipe, a či ćidel barvalipe savo si vredno ande Devlešće jakha.”
22Askal o Isus phendas pire učenikonenđe: “Zato phenav tumenđe: na han holji palo trajo: so hana; ni palo telo so dena pe tumende.
23Kaj o trajo si maj vredno katar o habe, a o telo katar e drze.
24Dićhen pe gavranurja! Či sadin niti ćiden, najlen spremište ni žitnice, a palem o Del pravarelen. Kozom sen tumen majvredne nego e čiriklja!
25A ko tumendar šaj e brigenca te lunđarel piro trajo samo pale jek đes?
26Dakle, ako tumen naštik ćeren ni okova so si maj cara, sostar askal stalno han holji pale sa aver?
27Dićhen e poljske luluđa sar barjon! Niti trudinpe, niti štrikon pešće drze. A palem, phenav tumenđe: “Kaj ni o caro Solomon ande pire kuč e drze nas majl lčhardo katar ni jek lendar.
28Ako o Del del pe poljsko čar gajda šukar drze, savi ađes si, a već thejara čhudelpes ando bov te phabol, kozom majbut dela pe tumen šukar drze. Tumen cara paćivalen!
29Zato vi tumen: na samo gndisaren pe godova dali situmen dosta te han thaj te pijen. Na uznemirin tumen zbog godova!
30Sa godova roden e manuša save či pindžaren e Devles. Tumaro nebesko Dad džanel kaj sa godova trubul tumen.
31Nego roden o carstvo e Devlesko, a godova sa nadodajla pe tumenđe!”
32Na dara mungro cikno stado! Kaj si e volja tumare Dadešći te del tumen o carstvo.
33Bićinen okova so si tumen thaj e love den e čorenđe! Gajda ćidena tumenđe trjaste save či phurjon thaj blago savo či propadnila, večno blago savo si ando nebo kaj o čor či avel thaj kaj o moljco či halales.
34Kaj phenav tumenđe, kaj si tumaro barvalipe, okote avela vi tumaro ilo.”
35O Isus phendas lenđe vi akava: “Aven spremne te služin thaj tumare svetiljke neka phabon.
36Aven sago okola kaj ažućaren pire gospodare kana boldelpes andar e svaturja te odma putren lešće čim aresel thaj marel po vudar,
37Blago o kole slugonenđe saven o gospodari, kana avela, araćhel džungade! Čačes phenav tumenđe, kaj korkoro o gospodari čholalen pale sinija te bešen, thaj čhola pe peste o kecelko, te poslužil len.
38O gospodari šaj te boldel pes ande opaš e rjat ili ande zora a blago e slugenđe saven o gospodari araćhela kaj si još džungate thaj ažućaren les.
39Ali akava džanen: kana džanglasas o domaćino ande savi vrjama avela o čor, či muklasas te del ande lesko ćher.
40Vi tumen uvek aven spremne kaj me o Čhavo e Manušesko avava kana či nadina tumen.”
41Pe godova o Petar phendas: “Gospode, phenes li godoja usporedba samo pale amende ili vi pale savorende?”
42A o Gospod Isus phendas: “Ko si okova verno thaj razumno upravniko saves o Gospod čhola te vladil pe leše sluge thaj te delen habe ande pravo vrjama?
43Blago okole slugašće saves o gospodari kana boldelape, araćhel kaj gajda ćerel.
44Čačes, phenav tumenđe, o gospodari čhola godole slugone te upravljil lešće saste barvalipeja.”
45Ali ako godova sluga phenel ande piro ilo: “Mungro gospodari či avela gajda sigo” thaj ačhel te marel e slugonen thaj e sluškinjen, te hal, te pijel thaj te matol,
46avela o gospodari godole slugasko ando đes savo či nadilapes thaj ando časo savi či ni slutil; strogo kaznilales gajda kaj čhinela les pe kotora te delil e sudbina okolenca save či paćan.”
47O sluga savo pindžarel e volja pire gospodarišći, a khanči či ćerdas te pripremil pes pale vrjama kana boldela pes lesko gospodari, avela strogo kaznime.
48A okova sluga kaj či džanglas e gospodarešće volja, a ćerda vareso kaj zaslužisarel e kazna, cara avela mardo. A katar okola kašće but dijas lendar majbut vi rodela. Okolestar kasće si but poverime lestar but vi rodela pes.”
49“Askal o Isus phendas: “Me avilem te čhudav e jak e sudošći pe phuv! Sar volisardemas te već počnisardas te phabol!
50Ali majsigo trubul te pretrpiv e muke thaj o smrto, zurales si manđe pharo dok godova či avel gata!
51Gndisaren kaj me avilem te anav miro pe phuv maškar o them? Nisar. Avilem te anav razdor.
52Kaj katar akana e familije rspin pes: trin džene avena pe mungri rig, a aver duj protiv ili duj pe mungri rig a trin protiv mande.
53O čhavo avela protiv o dad thaj o dad protiv o čhavo, e dej protiv e čhej, thaj e čhej protiv e dej, e sokra protiv piri bori thaj e bori protiv e sokra.”
54A e bute themešće o Isus phendas: “Kana dićhen kaj o kalo oblako lelpes katar o more po zapado, odma phenen: Dela o bršnd!” Thaj gajda si.
55Kana dićhen kaj phurdel e bavlal katar e pustinja po jugo, phenen; “Avela tati vrjama”, thaj gajda avela.
56Licemerja! Džanen te prosudisaren o izgled e nebosko thaj e phuvjako. Sar askal či pinđaren mungre znakurja save trubuinesas te pindžaren!”
57Tumen korkoro trubuinesas te pindžaren so si ispravno!”
58Sago vi ako vareko prl tumen zbog o dugo savo či poćindine thaj kamel te inđarel tumen po sudo, još dromesa den sa tumendar te nagodbasa rešin tumen lestar, te či inkalel tut anglo sudo. O sudco delatut ko stražari, a o stražari čhudelatu ande tamnica.
59Phenav tuće: 'Či inkljeja okotar dok či poćines dži ke posljedno lovoro.'”
