Lom 2:1-22

¹Ɩlɛ nyɑ́ wei n footiɣi nyɑ́ lɛlʋ tɔ, pɑɑ n kɛ́ we te, n fɛɩnɑ tɑmpɑnɑ. Pǝ tɑɣɑ pʋlʋ, nyɑ́ footiɣi lɛlʋ pǝyele ḿpʋ́ɣʋ́ nyɑ́ mɑɣɑmɑɣɑ nyɑ́ lɑkɩ tɔ, n kʋɣɩ nyɑ́ tɩ tɔm kɛ́.

²Tǝ nyǝmɑ́ sɩ tɑmpɑnɑ kɛ Ɩsɔ tǝŋǝɣɩ nɑ ɩ́ hʋʋkǝnɑ pɑ tǝnɑ mpɑ pɑ lɑkɩ mpʋ ɩnɩ pǝ tɑkɑ tɔ te.

³Ɩlɛ ɑpɑŋnyɑ, ɩsɩɩ nyɑ́ footuɣuu mpɑ pɑ lɑkɩ mpʋ, pǝcɔ nyɑ́ mɑɣɑmɑɣɑ nyɑ́ lɑkɩ teitei ɩsɩɩ pɛlɛ tɔ, n hʋʋ sɩ Ɩsɔ kɑɑ pɔɔsɩ-ŋ?

⁴Ɩsɔ kʋcɔɔʋ ntɛ́ n mǝlɑ ń kpɑlǝɣɩ nɑ ń kisiɣi ɩ suulu sɩ ɩ́ tɑɑ wii nyɑ́ pǝtɔɔtǝlɛ? N tɑ nyɩ sɩ Ɩsɔ lɑkɩ-ŋ kʋpɑntʋ kɛ ḿpʋ́ɣʋ́ sɩ ɩsɔwɛɛ n kɑ́ lɑɣɑsɩ tɔntɛ?

⁵Nyɑ́ lɑŋkpɩɩsǝŋ ɩnɛ. Amɑ nn cɑɑ lɑɣɑsʋɣʋ se. N lɑkʋɣʋ mpʋ tɔ, sɑlǝkɑ kʋkǝlʋ kɛ n cɑɑkɩ nɑ ń kɔŋnɑ nyɑ́ nyʋɣʋ tɑɑ kɛ́ kʋyɑŋku Ɩsɔ kɑ́ cɑɣɑ nɑ ɩ́ hʋ́lɩ́ ɩ pɑ́ɑ́nɑ́ nɑ ɩsǝnɑ ɩ tǝŋǝɣɩ siɣisuɣu nɑ ɩ́ hʋʋkǝnɑ tɔ.

⁶Kʋyɑkʋ ŋkʋɣʋ Ɩsɔ kɑ́ fɛlɩ pɑɑ wei kɛ́ ɩ kʋlɑpʋtʋ.

⁷Mpɑ pɑ sɔɔlɑ kʋpɑntʋ lɑpʋ kɛ tɑm, nɑ pɑ́ pɛɛkǝɣɩ Ɩsɔ kiŋ teeli, nɑ sɑm nɑ tɑm wɛɛtʋ tɔ, mpɛɣɛ Ɩsɔ kɑ́ hɑ weesuɣu ŋku kɩɩ tɛŋ tɔ.

⁸Amɑ mpɑ pɑ sɔpɑ nyʋɣʋ nɑ pɑ nyǝntʋ tɛlǝsʋɣʋ kɛ lɔlɔ, nɑ pɑɑ tǝŋǝɣɩ tɑmpɑnɑ, nɑ pɑ́ lɑkɩ pǝ tǝnɑ mpi pǝ fɛɩ teu tɔ, Ɩsɔ kɑ́ hʋ́lɩ́ pɛlɛɣɛ ɩsǝnɑ ɩ tɑɑ kpɑɑnɑ-wɛ nɑ pɑ tɔm tɑ mɑɣɑ-ɩ tɔ.

⁹Wɑhɑlɑ nɑ lɑŋwɑkǝllɛ sɔsɔɔlɛ kɑ́ kpɑ pɑ tǝnɑ mpɑ pɑ lɑkɩ ɩsɑɣɑtʋ tɔ. Yutɑ nyǝ́mɑ kɛ kɑncɑɑlɑɣɑ, pǝ wɑɑlɩ kɛ́ mpɑ pɑ tɑ kɛ Yutɑ nyǝ́mɑ tɔ.

¹⁰Amɑ mpɑ pɑ lɑkɩ kʋpɑntʋ tɔ, Ɩsɔ kɑ́ kʋsɩ pɛlɛ pɑ nyʋɣʋ nɑ ɩ́ sɑ-wɛ nɑ ɩ́ hʋlǝsɩ pɑ lɑŋɑ. Yutɑ nyǝ́mɑ kɛ kɑncɑɑlɑɣɑ, pɑ wɑɑlɩ kɛ́ mpɑ pɑ tɑ kɛ Yutɑ nyǝ́mɑ tɔ.

¹¹Mpi tɔ Ɩsɔ ɩɩ fɑɣɑsǝɣɩ yǝlɑɑ tɔ se.

¹²Mpɑ pɑ tɑ nyɩ Moisi kʋsǝsɩɩtʋ nɑ pɑ́ pǝntǝɣɩ tɔ, pɑɑ le nɑ kʋsǝsɩɩtʋ ntɩ tǝ tɔm tɑ nɑ-wɛ. Amɑ mpɑ pɛlɛ pɑ nyǝmɑ́ Moisi kʋsǝsɩɩtʋ nɑ pɑ́ tɔŋnɑ pǝntʋɣʋ tɔ, kʋsǝsɩɩtʋ ntǝɣɩ pɑɑ kɛɛsǝnɑ nɑ pɑ́ hʋʋnɑ-wɛɣɛ tɔm.

¹³Mpi tɔ pǝ tɑɣɑ yǝlɑɑ mpɑ pɑ nɩɩkɩ kʋsǝsɩɩtʋ tɔm kɛ kʋnɩɩ tɔ mpɛɣɛ Ɩsɔ nyǝnǝɣɩ kʋpɑmɑ se. Amɑ mpɑ pɑ tɔkɑ-tɩ tɔɣɔ.

¹⁴Ye piitim lɛmpɩ nyǝ́mɑ nɔkɑɑ nɑ pɑ́ tǝŋǝɣɩ mpi Yutɑ nyǝ́mɑ kʋsǝsɩɩtʋ kɛɛsǝɣɩ tɔ, pǝyele nɔɣɔlʋ tɑ hʋlɩ-wɛ, ɩlɛ pɑ kʋsǝsɩɩtʋ wɛ pɑ mɑɣɑmɑɣɑ pɑ tɑɑ kɛlɛ, pɑɑ nɑ pɑ tɑɑ fɛɩnɑ-tɩ tɔ.

¹⁵Pɑ lɑkʋɣʋ mpʋ tɔ, pɑ hʋ́lǝ́ɣɩ́ kɛlɛ sɩ, pɑɑ pɑ tɑɑ fɛɩnɑ kʋsǝsɩɩtʋ, pǝ tʋ Moisi nyǝntʋ ntɛ́ pɑ lotunɑɑ tɑɑ. Nɑ pǝ nɑɑkɩ ḿpʋ́ɣʋ́ pɑ lɑɑkɑlǝnɑɑ tɑɑ. Pǝ tɑɣɑ pʋlʋ tɔɔ, wutee wutee pɑ pǝtǝɣɩ pɑ kʋlɑpʋtʋ tɑɑ kɛ́, nɑ wutee wutee pɑ wɛnɑ nɑɑni.

¹⁶Ḿpʋ́ɣʋ́ pɩɩ lɩɩ teitei kɛ́ kʋyɑŋku Ɩsɔ kɑ́ yele sɩ Yesu Kilisiti ɩ́ hʋʋnɑ yǝlɑɑ kɛ pɑ mukɑɣɑ tɛɛ kʋlɑpʋtʋ tɔɔ tɔ. Nɑ pǝ mɑɣɑmɑɣɑ kɛ Lɑɑpɑɑlɩ Kʋpɑŋ wei mɑ kpɑɑlǝɣɩ tɔ ɩ hʋ́lǝ́ɣɩ́.

¹⁷Amɑ nyɑ́, n yɑɑ nyɑ́ tǝɣɩ Yutɑ tʋ Yutɑ tʋ, nɑ Moisi kʋsǝsɩɩtʋ ntǝɣǝlɛ Moisi kʋsǝsɩɩtʋ, nɑ ń mʋɣʋlǝɣǝnɑ nyɑ́ Ɩsɔ.

¹⁸Pǝ́cɔ́ n nyǝmɑ́ mpi Ɩsɔ cɑɑ sɩ ń lɑ tɔ, nɑ kʋsǝsɩɩtʋ ntɩ tǝ kulɑ nyɑ́ ɩsɛ kɛ teu sɩ ń cɛkǝnɑ kʋpɑntʋ.

¹⁹N nyǝnǝɣɩ nyɑ́ tǝɣɩ yʋlʋmɑɑ hɔntʋ nɑ sǝkpɛtʋɣʋ tɛɛ nyǝ́mɑ ɩsɛntɔɔ cɛtʋ,

²⁰nɑ ɩsǝkpɛɛtɛɛ nyǝ́mɑ ɩsǝkullu, nɑ piyɑ sɛɣɛsǝlʋ. Mpi pǝ tɔɔ n nyǝnǝɣɩ nyɑ́ tǝɣɩ mpʋ tɔ, n tɛɛlǝɣɩ kɛ́ sɩ nyɑ́ nɑnɑ pǝ tǝnɑɣɑ kʋsǝsɩɩtʋ ntɩ tǝ tɑɑ, pɑɑ nyǝm, pɑɑ tɑmpɑnɑ.

²¹Aŋhɑ, nyɑ́ wei n sɛɣɛsǝɣɩ lɛlɑɑ tɔ, nn sɛɣɛsǝɣɩ nyɑ́ tɩ suwe? Nyɑ́ wei n lɑkɩ wɑɑsʋ sɩ pɑ́ tɑɑ ŋmɩɩlɩ tɔ, pepe tɔɔ kɛ́ nyɑ́ ŋmɩɩlǝɣɩ?

²²Nyɑ́ wei n tɔŋ sɩ pɑ́ tɑɑ lɑ wɑsɑŋkɑlǝtʋ tɔ, pepe tɔɔ kɛ́ nyɑ́ lɑkɩ? Nyɑ́ wei nn cɑɑ tɩɩŋ tɔm kɛ pɑɑ pǝcɔ tɔ, pepe tɔɔ kɛ́ n nɑɣɑlǝɣɩ ɩ tɛɛ kʋpɑmpɑm?