ROMUDENƆ 2:1-22 - Luda yã takada kũ Bisã yão

ROMUDENƆ 2:1-22

Click on verse(s) to share them!

¹Abire yãi mↄkↄ̃n kũ ndì gbɛ̃ pãnde taari e, ń kutɛkɛna vĩro. Tó n gbɛ̃ pãnde taari è, n n zĩda dà yãmmɛ, zaakũ mↄkↄ̃n gbɛ̃taari'eri ndì kɛ lɛ se dↄ.

²Ó dↄ̃ kũ Luda yãkpatɛkɛna kũ yã bire taka kɛ̀rinↄ kun a zɛ́amɛ.

³Mↄkↄ̃n kũ ndì yã bire taka kɛ̀rinↄ taari e, akũ ndì kɛ se, ntɛn da ĩni bo Luda yãkpatɛkɛnan yá?

⁴Ke ntɛn dↄkɛ kũ Luda nnakɛnnɛna zↄ̃kↄ̃ↄo kũ a mɛnao kũ a sùruuomɛ? Ń dↄ̃ kũ Luda tɛni a nna kɛnnɛ de ǹ n nɛ̀sɛ litɛ yãinloo?

⁵N sãgbãna kɛ̀, ńdi nɛ̀sɛ litɛro, ntɛn pↄfɛ̃ kakaranyĩ ari Luda pↄfɛ̃kipammana gↄrↄ zĩ, tó Luda yãkpatɛkɛnaa kũ gbɛ̃nↄ a zɛ́a bò gupuraa.

⁶Ani fĩna bo baadinɛ a yãkɛnaaa.

⁷Gbɛ̃ kũ òtɛn gakuri kũ bɛ̀ɛrɛɛo kũ mɛ̀vãnasario wɛtɛ, akũsↄ̃ òtɛn yã mana kɛ kũ mɛnaonↄ ni wɛ̃̀ndi kũ àdi lákaro le.

⁸Gbɛ̃ kũ ń zĩda pↄyeina tɛn dońnɛ arɛ ò gì yãpurai ò tɛ́ yã vãninↄ sↄ̃, Luda ni pↄfɛ̃ kũ pɛ̃tɛ̃o kipaḿma.

⁹Wɛ́tãmma kũ wãwão ni yãvãnikɛri sĩnda pínki le, atɛ̃nsa Yudanↄ, ń gbɛra buri pãndenↄ.

¹⁰Luda ni yãmanakɛri sĩnda pínki gba gakuri kũ bɛ̀ɛrɛɛo kũ aafiaao, atɛ̃nsa Yudanↄ, ń gbɛra buri pãndenↄ.

¹¹Zaakũ Luda dì gbɛ̃ke wɛ́ gwaro.

¹²Gbɛ̃ kũ à durunna kɛ̀ Musa doka dↄ̃naa sari ni kakatɛ lɛ doka pìi sari. Gbɛ̃ kũ à durunna kɛ̀ nana doka pì ↄĩ sↄ̃, Luda ni yãkpatɛ kɛ kãao doka pìi musumɛ.

¹³Adi kɛ gbɛ̃ kũ àtɛn doka ma kũ são mɛ́ à mana Ludanɛro. Gbɛ̃ kũ àtɛn zĩ kɛa mɛ́ ani bo mana.

¹⁴Tó buri kũ ò Musa doka dↄ̃ronↄ yã kũ à kↄ̃ sìoo kɛ̀ kũ ń zĩdao, ò doka vĩ ń zĩdaaamɛ.

¹⁵Òtɛn mↄwɛrɛ kũ yã kũ à kú doka pìi gũn kú ń nɛ̀sɛmmɛ. Ń laasun tɛni a yãpura o dↄ, zaakũ ń laasun mɛ̀n doro, a kenↄ dì ń da yãn, a kenↄ dì ń bon.

¹⁶Lɛmɛ yãkpatɛkɛgↄrↄ zĩ Luda ni yãkpatɛ kɛ kũ bisãsirinↄ yã kũ à utɛna ń nɛ̀sɛn musu Kirisi Yesu gãi, lákũ baaru nna kũ matɛn kpá ò nà.

¹⁷Mↄkↄ̃n Yuda inaa, n zɛ kũ n Yudakɛo, ń Musa doka náani vĩ, ntɛni ĩa dã kũ Ludao.

¹⁸Ń Luda pↄyenyĩna dↄ̃ kũ yã kɛ̃ à zɛ́ vĩo, kũ ò doka pìi dàdannɛ yãi.

¹⁹Ntɛni da ń de vĩ̀nanↄ wɛ́de ũ, gbɛ̃ kũ ò kú gusira gũnnↄ fitila ũ,

²⁰wɛ́siradenↄ yãdannɛri ũ, gbɛ̃ dufunↄ kyódari ũ. Ntɛni da Luda dokamɛ dↄ̃na kũ yãpurao mì ũ.

²¹Mↄkↄ̃n kũ ndì yã da gbɛ̃ pãndenↄnɛ, bↄ́yãi ndì da n zĩdanɛroo? N pì òsun kpãni oro, mↄkↄ̃n ndì o se yá?

²²Ndì pi òsun zina kɛro, akũ ndì kɛ se yá? Ndì tãnanↄ gya bo, akũ ndì ń kpɛ́ pↄ́nↄ kpãni o se yá?